سارسەنبى, 23 قىركۇيەك 2020
COVID-19 قازاقستاندا. جۇقتىرعاندار — 107374. جازىلعاندار — 102064. قايتىس بولعاندار — 1699
ەستەلىك 1167 1 پىكىر 30 ناۋرىز, 2020 ساعات 12:29

عابباس قابىشۇلى. سىر-نيەت

كوپەن ءامىر-بەكتىڭ ءوزىن كورۋ – بىرباسقا دا، جۇمساق قىرىلمەن كومكەرىلگەن كۇلكىسىن ەستىگەن سايىن، ءازىل-سىقاق ولەڭ-اڭگىمەلەرىن وقىعان سايىن سوناۋ ءبىر جىلدارى «لەنينشىل جاس» گازەتى رەداكتسياسىنا تۇڭعىش اڭگىمەسىن اپارىپ، ءوزى ايتقانداي، «بىلەگى توقپاقتاي» وسپانحان اۋباكىروۆ اعاسىنان باتا العان بوزبالا كەيپىن كوز الدىڭا كەلتىرۋ – بىرباسقا، ەگەر كەلتىرە الساڭ.

بۇگىن جاسى 70-كە تولعان جۋانتىق، ە، ءيا، ءاۋ باستا تالشىبىقتاي بولعان كوپەن قازاق ساتيراسىنىڭ ساردارى بولعالى قاشان!. بارشعا بەلگىلى ءومىربايانىن، ءازىل-سىقاققا سىقا تولى شىعارمالارىن شۇبىرتىپ ايتۋىم ارتىق بولار، ويتكەنى قالامى ىلمەگەن تاقىرىپ جوق. پروزا مەن پوەزيانىڭ قىرىندا دا، ويىندا دا ءىزى سايراپ جاتىر. 

«بىلەگى توقپاقتاي» ۇستازى، تاعدىردىڭ تىزىمىمەن باقيعا تىم ەرتە اتتانىپ كەتكەن كلاسسيگىمىز – وسپانحان سۇيكىمدى ءىنىسىنىڭ جاسى 35-كە تولعاندا بىلاي دەگەن ەدى:

«كوزى شەگىر كوپەن شاكىرتىمە

جالعاندا جالعىز ەر بار كوپەن دەگەن،
ادام جوق مۇنىڭ ءسوزىن كوتەرمەگەن.
باسىن كەسىپ الامىن بىرەۋ بولسا:
«كوپەنى وسپانحاننان بوتەن» دەگەن!..
باتا بەرىپ، اۋزىنا تۇكىرگەنمىن،
سودان كەيىن كوپەنىم جوتەلمەگەن».

وسەكەڭ كوپەندى كورگەندە: «تاكسي كوز كوپەنىم كەلە جاتىر» دەپ ءماز بولاتىن. اي-حاي، اعا مەن ءىنىنىڭ سيلاستىعى-اي!

ءيا، كوپەن سودان بەرى جوتەلگەن جوق. ويتۋىنە استە بولمايدى دا. ادامبەكوۆ سادىقبەك اعامىز كوپەندى «سايقىمازاقشى سارى بالا» دەگەن. ال قۋشىكەش مىرزا ءالي قادىر اعاسىنىڭ:

«...جۇرمەڭىزدەر شاتاسىپ،
بەرىپ كەتكەن باتاسىن
الدار كوسە –
كوپەننىڭ سەگىزىنشى اتاسى، - دەپ سۇيىنە سيپاتتاعان سەزىمدەرىنىڭ استارىندا: «ءىنىمنىڭ ءومىر جولى ۇزاق بولسا ەكەنى» دەگەن ىزگى تىلەك جاتقان-دى. 

كوپەننىڭ وزىنە ءوزى ارناعان قاعىتپاسىندا (پارودياسىندا) قوجاناسىر اپەندىمەن رۋلاس بولا جازداعانىن جازعانى بار. ەگەر جارىق دۇنيەگە قوجەكەڭ كەشىرەك، نەمەسە كوپەن ەرتەرەك كەلسە، رۋلاس قانا ەمەس، تۋىسقان بولۋلارى دا مۇمكىن ەدى. الدە، ونىسىز-اق، قوجاناسىر – كوپەننىڭ توعىزىنشى اتاسى شىعار، كىم بىلەدى. كوپەننىڭ ءىزباسار ىنىلەرى بۇل ماسەلەنى قادىرشا زەرتتەۋلەرى كەرەك. ال ءبىز، اعالارى، ينشاللا جازارى ءالى دە كوپ كوپەننىڭ جاڭا تۋىندىلارىن اسىعا كۇتىپ، الدىمىزعا كەلگەنىن اپىل-عۇپىل ءبىر وقىپ، اسىقپاي ەكى وقىپ، ەكى ەزۋىمىزگە يە بولا الماي وتىرايىق!

عابباس قابىشۇلى

Abai.kz 

1 پىكىر