سارسەنبى, 27 مامىر 2020
COVID-19 قازاقستاندا. جۇقتىرعاندار — 9304. جازىلعاندار — 4746. قايتىس بولعاندار — 37
607 1 پىكىر 27 ناۋرىز, 2020 ساعات 12:23

استانادا قايتىس بولعان ايەل الماتىعا قۇدالىققا بارعان

كوروناۆيرۋستان قايتىس بولعان 64 جاستاعى ايەل الماتى مەن شۋعا بارعان. بۇل تۋرالى اقمولا وبلىسىنىڭ اكىمى ەرمەك مارجىقپاەۆ ايتتى،

"ول الماتىعا قۇدالىققا بارعان، سوسىن شۋعا قوناققا بارعان. بارلىق جاققا پويىزبەن بارعان. جەكە ۇيدە تۇرعان", - دەدى وبلىس اكىمى.

كەشە، 26 ناۋرىزدا اقمولا وبلىسى قوسشى اۋىلىندا تۇراتىن ايەلدىڭ كوروناۆيرۋستان قايتىس بولعانى حابارلانعان ەدى. بۇل - كوروناۆيرۋس پاندەمياسى بويىنشا قازاقستاندا تىركەلگەن العاشقى ءولىم.

"ناقتى مالىمەت ازىرشە جوق. ول تۋىستارىنان كەلگەن. الماتى مەن شۋدا قوناقتا بولعان. ونى 25 ناۋرىزدا تاڭعى ۋاقىتتا جەتكىزدى، 26 تامىزدا تاڭعى ساعات 8-دە قايتىس بولدى. 64 جاستا ەدى", - دەدى اكىم.

مۇنىڭ الدىندا دەنساۋلىق ساقتاۋ مينيسترلىگى ايەلدىڭ ينتەنسيۆ تەراپيانىڭ جۇرگىزىلۋىنە قاراماستان قايتىس بولعانىن ايتقان ەدى.

«دەنساۋلىق ساقتاۋ مينيسترلىگى تۋىستارى مەن دوستارىنا كوڭىل ايتادى. مۇنىڭ سەبەبى ەكى جاقتى پنەۆمونيا، تىنىس جەتىسپەۋشىلىگى، قانت ديابەتى، سەپسيس، گيپەرتونيا جانە اتەروسكلەروز. پنەۆمونيانىڭ سەبەبى - كوروناۆيرۋس بولىپ تابىلادى.

بۇل ناۋقاس اقمولا وبلىسىنا تۇرعىلىقتى جەرىنە تىركەلگەن، كوپ سالالى ايماقتا بولعان. اۋرۋحانا نۇر سۇلتان قالاسىندا ورنالاسقان»، - دەلىنگەن دەنساۋلىق ساقتاۋ مينيسترلىگىنىڭ حابارلاماسىندا.

سونىمەن قاتار، قر پرەزيدەنتى ق.توقاەۆ قايتىس بولعان ناۋقاستىڭ وتباسى مەن جاقىندارىنا كوڭىل ايتتى.

- 64 جاستاعى ايەلدىڭ كوروناۆيرۋستان قايتىس بولۋى بۇل ىندەتتىڭ اسا قاۋىپتى ءارى كارانتيندى ساقتاۋ وتە ماڭىزدى ەكەنىن كورسەتەدى. تۋعان-تۋىستارىنا كوڭىل ايتامىن. ەلوردا مەن الماتىدا كارانتين شارالارىن كۇشەيتىپ، شىمكەنتتە شەكتەۋلەر ەنگىزۋ جونىندە شەشىم قابىلداندى،- دەپ جازىلعان پرەزيدەنتتىڭ Twitter پاراقشاسىندا.

ال الماتى وبلىسى اكىمدىگىنىڭ ءباسپاسوز قىزمەتى قاۋىپتى ۆيرۋستەن قايتىس بولعان ايەلمەن بايلانىستا بولعان 5 ادامنىڭ كارانتينگە جاتقىزىلعانىن حابارلادى.

Abai.kz

1 پىكىر