بەيسەنبى, 28 ناۋرىز 2024
46 - ءسوز 3686 7 پىكىر 21 ناۋرىز, 2020 ساعات 12:32

ءبىز قازىر سوعىس جاعدايىندامىز

ءبىز قازىر سوعىس جاعدايىندامىز، كوزگە كورىنبەيتىن جاۋمەن سوعىستامىز. سونى ەلىمىز تۇسىنسە ەكەن.

الەمدە اۋىرعان ادام سانى دا، ءولىم دە اسپانداپ بارادى. مىنا جەردە جاندى شۇبەرەككە ءتۇيىپ، ءوزىمىز بىردەڭە ىلەستىرىپ المايىق دەپ، ەشكىمگە كەسىرىمىز تيمەسىن دەپ ۇيدەن شىقپاي وتىرمىز. اركىمنىڭ يممۋندىق جۇيەسى ۆيرۋسقا ءار ءتۇرلى جاۋاپ بەرەدى. ءبىرى ەكى كۇننەن كەيىن-اق قىزۋى كوتەرىلەدى، ءبىرى ەكى اپتا بويى ساپ-ساۋ كىسىشە ءجۇرۋى مۇمكىن. اسىرەسە جاستاردىڭ كوبىندە سيمپتوم بولمايدى، سوندىقتان تەست تاپسىرمايىنشا ەشكىم دە "ساۋمىن" دەپ ايتا المايدى.

دۇكەنگە ءسۇت الۋعا شىعىپ كەلدىم، بىراق ءۇيدىڭ ەسىگىن اشقاندا، ءليفتتىڭ پەرنەسىن باسقاندا، نە دۇكەننەن العان ءسۇت بوتەلكەسىن ۇستاعاندا بىردەڭە ىلەسىپ كەلمەگەنىنە كەپىل بولا المايمىن. سوندىقتان ءسۇتتىڭ بوتەلكەسىن دە، كىلتىمدى دە، كارتوچكا مەن تەلەفوندى دا ۇيگە كىرگەندە دەزينفەكتسيالاۋعا، قولىمدى سابىنمەن جۋعا ءتيىسپىن. سىرتقا كيگەن كيىمدى كىرە بەرىستەگى گاردەروبقا بولەك قويامىن. بۇل ويىنشىق ەمەس.

ءبىر ادام مىڭداعان ادامدى اۋرۋ قىلادى. 2003 جىلى قىتايدان گونكونگقا ۇشىپ بارعان جالعىز ادام SARS-تى شامامەن 2000 ادامعا جۇقتىردى، 350 ادام قايتىس بولدى. ءبىر كونتاكتىدەن. بىراق SARS ءالسىز بولىپ شىقتى. Coronavirus وتە مىقتى ۆيرۋس ەكەنىن كىسى شىعىنىنان-اق كورىپ وتىرسىز.

ال بىزدە جان-جاقتان كەلگەن قازاقتار الماتى مەن استانامىزدا شاۋىپ ءجۇر دەپ ەستيمىز. شەكارادان ۇستاپ الىپ بىردەن كۇشتەپ كارانتينگە جاپپاسا ءوزىن تىيا المايدى. ءوزىڭ ءولىپ قالماسسىڭ، بىراق وزىڭنەن گورى اۋرۋشاڭ بىرەۋگە، نە قاريالاردىڭ بىرىنە جۇقتىرىپ كورگە يتەرەم دەپ قورىقپايسىڭ با؟

بۇگىن مەشىتتە جۇما نامازعا كىرگىزبەدى دەپ "كوتەرىلىس" جاساپ جينالىپ تۇرعان باۋىرلارىمنىڭ ۆيدەوسىن كورىپ قانىم باسىما تەپتى. (يراندا ۆيرۋستىڭ قالاي تاراعانىنا قاراساڭدارشى!) بۇل - جاۋاپكەرشىلىكتىڭ جوقتىعى عانا ەمەس، ناداندىق. سول جەردە تۇكىرىگى شاشىراپ داۋلاسىپ تۇرعاندار ۆيرۋس تاراتىپ تۇرماعانىنا كىم كەپىل؟ كولىگىنە جانارماي قۇيىپ جاتىپ، نە دۇكەننەن نان الىپ جاتىپ، بىردەڭە ىلەستىرمەگەنىنە اركىم جاۋاپ بەرە الا ما؟ قازاقستاندا 36 ادام با؟ دەمەك ۆيرۋس كەزىپ ءجۇر دەگەن ءسوز، ەشكىم دە ودان ساقتالماعان.

بريتانيادا دا 1 ادامنان باستالعان، ءبىر جارىم اي بۇرىن. قازىر 71 ادام قايتىس بولدى، 2000 ادام دەرتتى. 50 000-عا جۋىق ادام تەست تاپسىرعاندا انىقتالعانى وسى. بيلىك اۋرۋلار سانى 10-20 مىڭ ۇستىندە دەيدى، تەك ءبارىن انىقتاۋعا تەست جەتپەي جاتىر. ال قازاقستاندا قانشا ادام تەستتەن ءوتتى؟

لوندوندا پاب-مەيرامحانالار جابىلمادى، مەكتەپتەردى بۇگىن عانا جاپتى، ترانسپورت ءجۇرىپ تۇر. بىراق كوشەدە كىسى سانى كۇرت ازايدى. دۇكەندەر بوس.

باتىستا جاعداي ۋشىعىپ تۇر، بىراق قازاقستان مەنى كوبىرەك الاڭداتادى. ويتكەنى باتىستا جەتپەي جاتقان اپپاراتتار قازاقستاندا جەتپەيتىنى ەكى باستان. ءارى قالاعا اسكەر كىرگىزىپ كارانتين جاريالاپ جاتسا تۋعان كۇن تويلاعىسى كەلەتىن، نامازدى مەشىتتە وقىعىسى كەلەتىن بەيعام حالقىم بار.

ءبىز ءبىر-ءبىرىمىزدى شايعا شاقىرىپ، توي تويلاعاندى جاقسى كورەمىز عوي. قازىر ءبىر-ءبىرىمىزدى جاقسى كورگەنىمىزدى، باعالايتىنىمىزدى كەزدەسۋگە بارماي، الاقان بەرىپ امانداسپاي كورسەتۋگە قاجەتتى ۋاقىت.

سوسىن، قۇداي ءۇشىن، ءبۇتىن ۇلتتاردى "جاۋ" دەپ، "جاۋىز" دەپ، بالاعاتتاۋدى قويايىقشى. ءبىز ءوزىمىز دە ۇلتتىق نەگىزدە كەمسىتىلىپ كەلگەن حالىقپىز عوي، ونىڭ قانداي بولاتىنىن بىلەمىز عوي. پاندەميا شىعاتىنى انىق بولعان، الەمگە تەز تارايتىنى دا انىق بولعان، جانە بۇل العاشقى دا، سوڭعى پاندەميا ەمەس. قازىرگى تەحنولوگيامەن، ەرسىلى-قارسىلى جۇرىسپەن كەز كەلگەن بالە سولاي تارالادى.

بىراق وسىنداي ساتتەردە ادامگەرشىلىك سىنالادى، بۇل دۇرمەكتە ساسىق پايداكۇنەمدىك - مۇناي باعاسى تۇسكەن، كوروناۆيرۋس جايلاعان نەگاتيۆتى جاعدايعا نەگاتيۆ قوسا بەرەدى. ەرتەڭ وكپەسىنە اۋا جەتپەي، اپپارات قاجەت ەتەتىن جاعداي بولسا بىزدە "كىمنىڭ تانىسى بار، سوعان بۇيىرادى" دەگەن جاعدايعا جەتە مە، حالىق اشىنىپ، ءبىرىن-ءبىرى ءتۇتىپ جەي مە دەپ قورقامىن. مورالدىق دەگراداتسيا ءدال ۆيرۋستىڭ وزىندەي قاۋىپتى. ءبىر-ءبىرىمىزدى قورعايىق، ءوزىمىزدى ساقتايىق.

ءاسيا باعداۋلەتقىزىنىڭ الەۋمەتتىك جەلىدەگى جازباسى

Abai.kz

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3522