مەملەكەت باسشىسى قاسىم-جومارت توقاەۆ قازاقستان حالقىن ۇلىستىڭ ۇلى كۇنى ناۋرىز مەرەكەسىمەن قۇتتىقتادى.

قۇرمەتتى وتانداستار! بارشاڭىزدى ۇلىستىڭ ۇلى كۇنى – ناۋرىز مەرەكەسىمەن شىن جۇرەكتەن قۇتتىقتايمىن!

ءاز-ناۋرىز – جاڭاشىلدىق پەن جاسامپاز رۋحتىڭ جارشىسى. وسى كۇندەرى جەر-انا قايتا تۇلەپ، تىرشىلىك اتاۋلى تۇگەل جاندانادى.

تاعىلىمى مول بۇل مەرەكە – جاڭارۋ مەن جاڭعىرۋدىڭ، ادام مەن تابيعات اراسىنداعى ۇندەستىكتىڭ، كەلىسىم مەن تاتۋلىقتىڭ التىن ارقاۋى.

حالقىمىز قاشاندا جىل باسىن ىزگى نيەتپەن، ۇكىلى ۇمىتپەن، اق جارما تىلەكپەن قارسى الادى.

ۇلىستىڭ ۇلى كۇنىندە ۇرپاقتار ساباقتاستىعى، دوستىق قارىم-قاتىناستار مەن قوناقجايلىق سالتى دارىپتەلەدى. سونداي-اق، تەرەڭنەن تامىر تارتاتىن قۇندىلىقتارىمىز، ۇلكەنگە قۇرمەت، كىشىگە ىزەت كورسەتۋ ءداستۇرى ەرەكشە سالتانات قۇرادى.

ناۋرىز – ۇلتىنا، دىنىنە قاراماستان، بارشا جۇرتتى ۇيىستىراتىن جالپىۇلتتىق مەيرام. بۇل مەرەكە حالقىمىزدى بەرەكە-بىرلىك پەن ورتاق مۇددەگە جۇمىلدىرادى. ءبىز ءاردايىم قيىن ساتتە ءبىر-بىرىمىزگە قول ۇشىن سوزىپ، قولداۋ كورسەتۋگە دايىنبىز.

وكىنىشكە قاراي، بيىل ناۋرىز مەيرامى ادەتتەن تىس جاعدايعا تۇسپا-تۇس كەلىپ وتىر. پاندەمياعا اينالعان كوروناۆيرۋستىڭ كەڭىنەن تارالۋى جاھاندىق ەكونوميكامەن قاتار ءبىزدىڭ ەلىمىزگە دە ايتارلىقتاي زاردابىن تيگىزۋدە. بۇكىل الەم كۇردەلى سىناقتى باستان وتكەرۋدە.

وسىعان وراي، مەنىڭ جارلىعىممەن 2020 جىلعى 16 ناۋرىزدان باستاپ قازاقستان اۋماعىندا توتەنشە جاعداي ەنگىزىلدى. مەملەكەتتىك كوميسسيا قۇرىلىپ، ازاماتتارىمىزدىڭ دەنساۋلىعىن قورعاۋ جانە ەلىمىزدەگى ەكونوميكالىق احۋالدى تۇراقتاندىرۋ ءۇشىن ناقتى شارالار قولعا الىندى.

ءبىز ىرىس-ىنتىماعىمىزدىڭ ارقاسىندا بۇل قيىن-قىستاۋ كەزەڭنەن دە سۇرىنبەي وتەمىز دەپ سەنەمىن.

سىزدەرگە زور دەنساۋلىق، باق-بەرەكە جانە تولايىم تابىس تىلەيمىن!

ءاز-ناۋرىز ءار شاڭىراققا شاتتىق پەن قۋانىش اكەلسىن!

ۇلىس وڭ، اق مول بولسىن!

Abai.kz