18 ناۋرىز كەشكىسىن الماتىداعى “سۇڭقار” تۇرعىن ءۇي كەشەنىندە ۆيرۋس جۇقتىرعان ادام تابىلىپ، كوپقاباتتى باسپانا كارانتينگە جابىلىپ، پوستار قويىلعان. ەندى “سۇڭقاردىڭ” ماڭىنداعى – دوستىق 42, دوستىق 42ا، قابانباي باتىر 68 مەكەنجايىنداعى ۇيلەر دە كارانتيندە.

تۇرعىندار ءوز ءۇيىنىڭ اۋماعىنان 14 كۇن بويى ەشقايدا شىعا المايدى. قازاقستاندا قازىر 44 ادامنان (الماتىدا 19, نۇر-سۇلتاندا 25 ناۋقاس) ۆيرۋس تابىلعان.

قازاقستاندا 15 ساۋىرگە دەيىن توتەنشە جاعداي. 19 ناۋرىزدان باستاپ الماتى مەن نۇر-سۇلتان قالالارى كارانتينگە كوشتى. ساۋدا جانە ويىن-ساۋىق ورتالىقتارى، تاماقتان باسقا زات ساتاتىن دۇكەندەر مەن ساۋدا ورىندارىنىڭ جۇمىسى توقتاتىلدى. كارانتين رەجيمى كەزىندە قوعامدىق تاماقتاندىرۋ ورىندارى مەن مەيرامحانالار تۇتىنۋشىعا اس-سۋدى ۇيىنە جەتكىزىپ بەرەدى. 22 ناۋرىزدان باستاپ الماتى قالاسىندا تەمىر جول جانە اۋە قاتىناسىن تولىق توقتاتۋ جوسپارلانعان.

وتكەن جىلدىڭ سوڭىندا قىتايدا العاش رەت تىركەلگەلى بەرى الەمدە كوروناۆيرۋس 217 مىڭنان استام ادامعا جۇقتى. سودان بەرى 8,8 مىڭ ادام قازا بولىپ، 80 مىڭنان استام ناۋقاس دەرتتەن ايىقتى. دۇنيەجۇزىلىك دەنساۋلىق ساقتاۋ ۇيىمى Covid-19 كوروناۆيرۋسىن "پاندەميا" دەپ جاريالاعان.

Abai.kz