جەكسەنبى, 7 ماۋسىم 2020
COVID-19 قازاقستاندا. جۇقتىرعاندار — 12511. جازىلعاندار — 7135. قايتىس بولعاندار — 53
ءبىرتۋار 4772 5 پىكىر 19 ناۋرىز, 2020 ساعات 13:16

قازاقتى جاھانعا تانىتقان جەلاياق - عۇسمان قوسانوۆ

بيىل قازاقتىڭ داڭقتى جەلاياعى عۇسمان قوسانوۆتىڭ تۋعانىنا 85 جىل تولادى. وسىعان وراي  عۇسمان قوسانوۆتىڭ قارىنداسى ناعيما سيتتىققىزىمەن از-كەم اڭگىمەلەسكەن ەدىك. 

مامىردىڭ 25 جۇلدىزى ءاربىر شىعىسقازاقستاندىقتار، ونىڭ ىشىندە سەمەيلىكتەر ءۇشىن ءجونى بولەك. ويتكەنى، بۇل كۇنى قازاققا ءبىرىنشى وليمپيادا جۇلدەسىن الىپ بەرگەن الاشتىڭ اتاقتى جەلاياعى عۇسمان سيتتىقۇلى قوسانوۆتىڭ دۇنيەگە كەلگەن كۇنى. 1995 جىل ءار يزاتۋللالىقتىڭ ەسىندە قالدى. ويتكەنى، تاپ وسى جىلى اتاقتى قازاق سپورتشىسىنىڭ 60 جىلدىعىن جەرلەستەرى بۇكىل قازاق بالاسىنىڭ باسىن قوسىپ، كەڭ كولەمدە تۋعان اۋىلىندا اتاپ ءوتتى.

عۇسمان نەگە ۇلتتىڭ ەسىندە قالدى دەگەن ساۋالدىڭ تۋى دا ورىندى. الماتى جەڭىل اتلەتيكا مەكتەبىنىڭ تاريحى تىم تەرەڭدە دەسەك تە، ۇلتىمىزدىڭ سول كەزدەگى قالاداعى ۇلەس سالماعى از بولعانى بەلگىلى جانە قازاق جۇگىرۋگە ەمەس، كۇرەسۋگە بەيىم حالىق ەكەندىگى دە شىن. قازاق ەلىن وسى سپورت تۇرىنەن وزگە ۇلت وكىلدەرى تانىتىپ كەلدى. اتاپ ايتساق، 1952 جىلعى حەلسينكيدەگى وليمپيادادا الماتىلىق ۆلاديمير سۋحارەۆ 4ح100 ەستافەتاسىنا جۇگىرۋدەن كۇمىس جۇلدەگەر اتاندى. كەيىن 4 جىلدان سوڭ ۆلاديمير مەلبۋرندە وسى جەتىستىگىن قايتالادى. عۇسماننىڭ 1960 جىلعى كۇمىسىنەن كەيىن قاراعاندىلىق ۆلاديمير مۋراۆەۆ ەكى مارتە وليمپيادا چەمپيونى اتانسا، جەزقازعاندىق ۆيتالي ساۆين التىننان القا تاقتى.

ءستولىپيننىڭ رەفورماسى الاش جەرىنە جەتىپ، كوپتەگەن وزگەرىستەر بولعانىن تاريحتان جاقسى بىلەمىز. بۇل ءۇردىس بورودۋليحا مەن بەسقاراعايدى دا اينالىپ وتكەن جوق. قازىر كارتا بەتىندە جوق: زەرەن، قازانعاپ، وتورۆانوۆكا، قۇرمانعوجا، سونىمەن بىرگە، يزاتۋللا، مەششانكا اۋىلدارى ءبىر ەلدى مەكەن سانالىپ، ەرنازار اۋىلدىق كەڭەسىنە قاراعانى كۇنى كەشە سياقتى ەدى. زەرەن، قازانعاپ، قۇرمانعوجا، يزاتۋللادا كىل قازاقتار تۇرسا، وتورۆانوۆكا مەن مەششانكادا ىشكى رەسەيدەن كەلگەندەر قونىس تەپتى. كونە كوز اقساقالداردىڭ ايتۋىنشا مەششانكادا باقاي ەسەپكە جۇيرىك ىلعي كۋلاكتار قونىستانىپ، قاراۋىنداعى جارلى-جاقىبايعا دۇرىس قاراماي، ولار ءوشى كەتكەن بايلاردان ىرگە اجىراتىپ، وتورۆانوۆكا اۋىلىن ومىرگە اكەلگەن ەكەن. وسى ءوڭىردىڭ وتكەنى مەن بۇگىنىن وتە جاقسى بىلەتىن اقىن اعامىز ەدىل اسىلبەك وسى اتالعان اۋىلداردان مەششانكا مەن يزاتۋللانىڭ عانا قالعانىن جۇرەگى ەلجىرەپ ەسكە الادى.

مىنە، وسى اۋىلداردان تالاي قازاقتىڭ ءبىرتۋار پەرزەنتتەرى ع. قوسانوۆپەن قاتار ومىرگە كەلىپ، بورودۋليحا اۋدانى مەن ەلىمىزدىڭ ماقتانىشىنا اينالدى.

اتاقتى جەلاياقتىڭ تۋعان قارىنداسى ناعيما اپايدىڭ قولجازبا دەرەكتەرىنە سۇيەنسەك، سيتتىق ىقىلاسۇلى 1898 جىلى سەمەي وبلىسى ابىرالى وڭىرىندە دۇنيەگە كەلىپ، 1925 جىلى سەمەيدەگى ناعاشىسى امىرەنى ساعالايدى. سيتتىقتىڭ ناعاشىسى بەلاعاش اۋدانىنا قاراستى يزاتوللا اۋىلىنان ءشوپ، وتىن تاسۋدى كاسىپ ەتەتىن شارۋا ادامى بولىپتى. 27-28 جاستاعى جاس جىگىت ناعاشىسىنا بولىسىپ، يزاتوللا اۋىلىندا ءجيى بولادى. ءارى وسى جەردەن وزىنە ومىرلىك جار تابادى. سيتتىق جۇبايى ءبيبىنۇر ەكەۋى يزاتوللادا قۇرىلعان «ەڭبەكشى قازاق» كولحوزىنا مۇشە بولىپ كىرەدى. وسى باقىتتى نەكەدەن 6 ۇل جانە 2 قىز ناعيما مەن سابيرا ومىرگە كەلدى. ناعيما اپامىز: «قۇمار، ءامىرتاي، عۇسماننان كەيىن ومىرگە كەلگەن ءۇش ۇل شەتىنەپ، اكەمىزدىڭ بايبىشەسىنەن 5 بالا بولدىق. كەيىن اكەمىز ەكى قىزى بار جاس كەلىنشەكپەن كوڭىل قوسىپ، گۇلجاميلا شەشەمىز تۋماسا دا تۋعان انامىزداي بولدى. ول كىسىدەن اكەمىز ساۋلە اتتى ءبىر قىز ءسۇيدى، قازىر ول ءسىڭىلىم الماتىدا تۇرادى»، دەپ ءسوز ەتەدى.

«اعامىز 1935 جىلى تۋسا، اراعا 4 جىل سالىپ، مەن 1938 جىلى ومىرگە كەلدىم. تەتە وستىك»، دەيدى ناعيما اپا. «سيتتىق اتامىز سوعىس باستالىسىمەن 1941 جىلى ءوز ەركىمەن مايدانعا كەتكەندە، ءبيبىنۇر اجەمىز قاتتى ناۋقاستانىپ 1942 جىلى قايتىس بولادى دا، بار اۋىرتپالىق عۇسماننىڭ ناعاشى اجەسى كاكىمنىڭ موينىنا تۇسەدى. 1943 جىلى سيتتىق ىقىلاسۇلى اۋىر جاراقاتتانىپ ەلگە ورالادى. جانە مايدانگەر كولحوزدا بريگادير بولىپ ەڭبەككە ارالاسادى. عۇسماننىڭ ءوزى تۋرالى جازعان جەڭىسكە جول اۆتوبيوگرافيالىق كىتابىندا مىناداي جولدار بار: اتىڭ وشكىر سوعىس مەنىڭ جانە قۇرداس تۇستاستارىمنىڭ ەڭ قىمبات قازىناسى بالالىق بال داۋرەنىمىزدى تارتىپ الدى. ءبىز تاڭدى تاڭعا ۇرىپ، ەگىستىكتەن ماساق تەرەتىن ەدىك. بۇل اۋىر تۇرمىس ءبىزدى شىنىقتىردى».

عۇسماندى كوزى كورگەندەردىڭ ايتۋىنشا، ول كىسىنىڭ ءبىرىنشى جاتتىقتىرۋشىسى اكەسى سيتتىق بولىپتى. سونداي ەستەلىكتەرىنىڭ ءبىرى اكەسى عۇسمانعا ارقاندى ۇستاتىپ، ءوزى اتپەن جەلىپ وتىرادى ەكەن دە، بالاسى جۇگىرىپ ىلەسىپ وتىرادى ەكەن. ءبىز ناعيما اپانىڭ ۇيىندە بولعاندا عۇسمان اعامىز تۋرالى ايتقان اڭگىمەلەرىنە كۋا بولدىق.

«ءبارىمىز يزاتوللا اۋىلىنداعى جەتى جىلدىق قازاق مەكتەبىنەن ءبىلىم الدىق. ول كەزدەگى حالىقتىڭ بىرلىگى قانداي جاقسى ەدى. ءار ۇيدە 5-6 بالادان بارمىز. كورشى اۋىلدا جيىن-توي، مەرەكە بولسا بارلىعىمىز بىرگە بارامىز. ءبىر جولى جۇمىس بابىمەن كەلە جاتقاندا اياق استىنان جەل كوتەرىلىپ، ات اربادا اكەسىنىڭ قاسىندا وتىرعان عۇسماننىڭ ارقاسىنا ۇلكەن ءبىر اققۇس كەلىپ قونىپ، بەس-ون ءمينۋتتىڭ ىشىندە شىر-پىر شاڭق-شۇڭق داۋىستار شىعىپ، بالانى شوقي باستايدى. ارەڭ دەگەندە ەكەۋى ءبىر-ءبىرىن قورعاپ ۇلگەرگەنشە، اكەسى ەكەۋى ءوڭى مە، تۇسىمە ءوز كوزدەرىنە وزدەرى دە سەنبەي قالادى. سول كەزدە اللانىڭ بەرگەن ايانى ما، الدە «اعامىزدىڭ باسىنا قونعان باق پا ەكەن»، «باقىتىڭدى ۇستا» دەگەن زور داۋىس شىعىپ ۇشىپ كەتەدى. سول ءبىر تىلسىم دۇنيەنىڭ تاڭعاجايىپ تۇسى بالا عۇسماننىڭ جادىندا ماڭگىلىك ساقتالىپ قالادى. مىنە، كەيىن ەلگە بۇكىل الەمگە اتى شىققان اعامىزدىڭ سول كەزدە باسىنا باقىت قۇسى قونعان ەكەن عوي…

عۇسمان اعامىز وتە ەلگەزەك ەدى، سپورتقا دەن قويدى. مەكتەپتە وقىپ جۇرگەندە سپورتپەن شۇعىلدانىپ، ورتالىعى نوۆاپوكروۆكا اۋىلىندا وتەتىن مەكتەپ وقۋشىلارىنىڭ سپارتاكياداسىندا جۇگىرۋدەن ۇنەمى ءبىرىنشى ورىننان كورىنىپ ءجۇردى. ايتا بەرسەڭ اعامىز تۋرالى ەسەلىكتەر وتە كوپ»، دەپ ناعيما اپاي ءسوزىن اياقتادى.

ءبىز عۇسمان قوسانوۆپەن قۇداندالى بولىپ كەلەتىن، ءارى بالا كەزىندەگى دوسى يزاتۋللا اۋىلىنداعى قىزىل ساياساتتىڭ كەسىرىنەن جابىلىپ قالعان مەكتەپتىڭ ديرەكتورى بولىپ ەڭبەك ەتكەن سەمەيحان بالىقباەۆ اقساقالدان اتاقتى سپورتشى تۋرالى كوپتەگەن دەرەكتەرگە قانىعا الدىق. اقساقال الەم تانىعان سپورتشىنىڭ تۋعان جەرىندە ورىن العان تالاي وقيعانىڭ سىرىن اقتاردى.

150 شاڭىراقتىق اۋىلدان قازىر 10-15 ءۇي عانا قالعان. وعان وبلىستاعى بيلىك باسىندا بولعان حالدەەۆ پەن پاحابوۆ سياقتى اكىم قارالاردىڭ قازاق اۋىلدارىنا قاتىستى ۇستانعان پوزيتسيالارى ۇلت تىلىندە ءبىلىم بەرەتىن ورتا مەكتەپتى جاپقان سوڭ، اۋىل تۇرعىندارىنىڭ جاپپاي قالاعا كوشۋىنە اكەپ سوقتى. قازىر نە جولى جوق. نە بالا وقيتىن مەكتەبى جوق عۇسماننىڭ تۋعان اۋىلىنداعى داتكە قۋات دەيتىنىمىز تۇرعىنداردىڭ بارلىعىنىڭ جۇمىسپەن قامتىلىپ وتىرعانى عانا.

سەمەيحان اقساقال عۇسماننىڭ جاسىنان سپورتتى سەرىك ەتىپ، اسىرەسە جۇگىرۋدى باستى ورىنعا قويعانىن جىر قىلىپ ايتىپ بەردى. «ءبىز بىرگە جۇگىرە كەتكەندە شاڭىنا ىلەسە الماي قالاتىنبىز» دەپ سوناۋ بالالىق داۋرەنىن ەسكە الدى.

ايگىلى جەلاياقتىڭ تاعى ءبىر جەرلەسى قابىش وماروۆ اقساقال قوسانوۆتىڭ ءبىر عانا جۇگىرۋمەن عانا شەكتەلمەي، فۋتبول، ۆولەيبول، باسكەتبولدى تاماشا ويناي بىلگەنىن العا تارتتى. ات ارباعا وتىرىپ الىپ، جول بويى ءان سالىپ، سول كەزدەگى جاڭا سەمەي اۋدانىنىڭ ورتالىعى بولعان نوۆوپوكروۆكاعا (جۇراعا) 1 جانە 9 مامىرداعى سپورت جارىستارىنا باراتىندارىن قوس قاريا ەسكە الدى. وسىندا وتكەن جارىستارداعى العاشقى جەڭىس جولى ريم مەن توكيوعا باستار باسپالداق بولعانى ايتتى.

يزاتۋللاداعى 7 جىلدىق مەكتەپتى بىتىرگەن سوڭ، عۇسمان سەمەيدەگى N13 كاسىپتىك ۋچيليششەگە ءتۇسىپ، بىتىرگەننەن كەيىن دەپودا جۇمىس ىستەپ، سول جەردەن 1954 جىلى اسكەرگە الىنادى. 1951 جىلى عۇسمان شاڭعىدان 10 شاقىرىمدىق قاشىقتا سەمەي قالاسىنىڭ چەميونى اتاندى. سول جىلى تەمىرجولشىلار اراسىندا وتكەن جەڭىل اتلەتيكا جارىسىندا 100 مەترگە جۇگىرۋدەن 11,7 سەكۋند ناتيجە كورسەتىپ، 2-3 ورىندى ءبولىستى. تەمىر جول ۋچيليششەسىندە وقىپ جۇرگەندە عۇسمان لوكوماتيۆ فۋتبول كلۋبىندا ويناپ، قالا بىرىنشىلىگىندە ءبىرىنشى ورىن الىپ، چەمپيون اتاندى. اسكەري قىزمەتىن قىرىمداعى سەۆاستوپول قالاسىندا وتەيدى.

عۇسماننىڭ سۇيىكتى قاشىقتىعى 100 مەتر. ول اسكەر قاتارىنا الىنعان ساتتە كۋرسانتتار اراسىندا 10,8 سەكۋند جۇگىرىپ، بولاشاعىنان ءۇمىت كۇتتىرەتىن اتلەت ەكەندىگىن وزگە ۇلت وكىلدەرىنە تانىتا ءبىلدى. 1955 جىلى سول كەزدەگى بەلگىلى جەلاياق لەونيد بارتەنەۆتەن 0,1 سەكۋندقا جول بەرىپ الىپ، 10,7 سەكۋند كورسەتكىشپەن ەكىنشى ورىندى يەلەندى. سپورتتى سەرىك ەتكەن قازاق ساربازى اراعا ەكى جىل سالىپ، 1957 جىلى كيەۆتە ۋكراينانىڭ چەمپيونى اتانادى. ول كەزدە ءار وداقتاس رەسپۋبليكا جاقسى ناتيجەلەرمەن كوزگە تۇسكەن سپورتشىلاردى قولدى اياعىن جەرگە تيگىزبەي ءىلىپ اكەتەتىن. عۇسمانعا مولداۆيا قۇدا ءتۇسىپ، اتامىز كيشينەۆتىڭ دەنەشىنىقتىرۋ تەحنيكۋمىنا ءتۇسىپ، كسرو سپورت شەبەرى اتانادى. 4 دۇركىن مولداۆيا چەميونى جانە كسرو چەمپيونى بولىپ، كەڭەس وداعىنىڭ وليمپيادالىق قۇراماسىنا ۇمىتكەر بولىپ قابىلدانادى. وسى كەزدە ورىس سپورتشىلارىنىڭ ءبىزدىڭ نانىمىزدى قوس قازاق تارتىپ الدى دەگەن سپورت ءافوريزمى دۇنيەگە كەلەدى. 1960 جىلى قارۋلى كۇشتەردىڭ قۇراما كومانداسى كسرو بىرىنشىلىگىندە 4چ100 مەتردى 40,7 سەكۋندتا جۇگىرىپ ءوتىپ، چەمپيون اتاندى. وسىدان كەيىن عۇسمان جاتپاي تۇرماي XVII جازعى وليمپيادا ويىندارىنا دايىندىعىن لەونيد بارتەنەۆ، يۋري كونوۆالوۆ، ەدۆين وزوليندەرمەن بىرگە پىسىقتاي ءتۇستى. 4 سايىپقىران وليمپيادادا 40,1 سەكۋند ناتيجە كورسەتىپ كۇمىستەن القا تاقتى. وسىلايشا ەلىنە تۇڭعىش مەدال اكەلگەن قازاق رەتىندە ەل مەن الەم تاريحىندا ماڭگىگە قالدى.

1960 جىل. ريم. مولداۆيانىڭ وكىلى رەتىندە قاتىسقانىمەن قازاقتىڭ كىم ەكەنىن سپورت الەمىنە تانىتقان قوسانوۆتىڭ ەراسى. 400 مەترلىك ەستافەتانىڭ اقتىق سىنىنا اقش، گفر، يتاليا، ۆەنەسۋەلا جانە كسرو كوماندالارى شىقتى. امال نە التىن قولدان سۋسىپ، قازاق ەلىنە تۇڭعىش التىنعا بەرگىسىز كۇمىس بۇيىردى.

مولداۆيادا مارينا اتتى مولداۆان قىزىنا ۇيلەنىپ، مارات جانە ارمان دەگەن قوس ۇلدى بولدى. قانشا ايتقانمەن تۋعان جەردىڭ ءتۇتىنى تارتىپ تۇرادى ەمەس پە، 1961 جىلى ەلگە دەمالىسقا كەلگەندە قوناەۆتىڭ قابىلداۋىندا بولىپ، ءوزىن قازاقستانعا الدىرۋىن وتىنەدى. دىنمۇحاممەد احمەتۇلى بۇل ىسكە بەل شەشە كىرىسىپ، عۇسماندى الماتىعا الدىرىپ، ءامين تۇياقوۆ ەكەۋىنە ورتالىق ستاديونعا جاقىن جەردەن پاتەر الىپ بەرەدى.

1964 جىلى توكيوداعى وليمپيادادا عۇسمان جالپى كوماندالىق 5 ورىندى يەلەنىپ، 1967 جىلدان باستاپ بىرىڭعاي جاتتىقتىرۋشىلىق جۇمىسقا باسى ءبۇتىن ەنەدى. عۇسماننىڭ ەڭبەگى باعالانىپ، «ەڭبەك قىزىل تۋ» وردەنىمەن جانە «ەڭبەكتەگى ەرلىگى» مەدالىمەن ماراپاتتالادى. 1965 جىلى قازاق مەملەكەتتىك دەنە تاربيەسى ينستيتۋتىن بىتىرگەن سوڭ، 1967-1969 جىلدارى دينامودا، 1965 جىلدان ءومىرىنىڭ سوڭىنا دەيىن بار عۇمىرىن رەسپۋبليكالىق جوعارعى سپورت شەبەرلىگى مەكتەبىمەن بايلانىستىردى.

قوسانوۆ جاتتىقتىرۋشى رەتىندە كوپتەگەن جەتىستىكتەرگە جەتتى. ونىڭ شاكىرتى ليۋدميلا گولومازوۆا 1968 جىلى مەحيكو وليمپياداسىندا 100 مەتردى 11,7 سەكۋندتا جۇگىرىپ ءوتىپ، قولا مەدال يەلەندى. ال، ليۋدميلا 200 مەترگە جۇگىرۋدە التىنشى ورىندى يەلەنگەنىمەن، ول كورسەتكەن 23,3 سەكۋند ناتيجە قازاقستاننىڭ جاڭا رەكوردى سانالادى.

امال نە، ۇلتتىق قۇرامانى ەگەمەندىك جىلدارىندا جاتتىقتىرۋعا ءومىر جازبادى. قازاقتىڭ اتاقتى جەلاياعى 1990 جىلى شىلدە ايىنىڭ 19-ىندا قايتىس بولىپ، الماتى قالاسىنداعى كەڭساي زيراتىنا جەرلەندى.

تاۋەلسىزدىك ءداۋىرى عۇسماننىڭ كەڭەستىك كەزەڭدە كورە الماي كەتكەن قىزىعىن جالعاستىرىپ، الماتىدا جىل سايىن عۇسماندى ەسكە ءتۇسىرۋ مەموريالى ءوتىپ تۇرادى. وعان سپورتشىلار رەسەيدەن، قىتايدان، وزبەكستاننان تاعى باسقا ەلدەردەن كەلىپ كۇش سىناسادى. سوڭعى جىلدارى وسىنداي يگى - شارالار شىعىس قازاقستان وبلىسىنىڭ ورتالىعى وسكەمەندەدە وتكىزىلىپ كەلەدى. 53 جىل ءومىر ءسۇرىپ، ۇلتىنا اڭىز بولعان جان ءار سپورت سۇيەر قازاقتىڭ ۇلتتىق جادىسىندا ماڭگىگە قالاتىنى ءسوزسىز.

1959-1965 جج. جەرلەسىمىز حالىقارالىق جارىستاردا وتانىمىزدىڭ نامىسىن قولدان بەرمەدى. عۇسمان قوسانوۆتىڭ وسىنداي دارەجەگە جەتۋى كيشينەۆتەگى جاتتىقتىرۋشىسى الەكساندر ماسلوۆسكيدىڭ ارقاسى ەكەندىگىن ۇمىتپاۋىمىز كەرەك. ول 100 مەتردى 10,4 سەك جۇگىرۋى ناتيجەسىندە كەڭەس وداعىنىڭ وليمپيادالىق قۇراماسىنا قابىلداندى. عۇسماننىڭ سپورتتىق عۇمىرىنداعى ءبىر اتتەگەن-ايى الماتىدا سپارتاك سق 1962 جىلعى بىرىنشىلىگىندە 100 مەتردى 10,2 سەك جۇگىرىپ وتكەنىن جەل كۇشىن ولشەيتىن قۇرىلعى بولماي، كسرو رەكوردى رەتىندە دە، الەمدىك رەكوردتى قايتالاۋىنىڭ دا ەسەپكە الىنباي قالۋى.

كەڭەس سپرينتەرلەرى اراسىندا ۋكرايندىق رەدكومەن جۇپتاسىپ، امەريكا اتلەتى دجەسسي وۋەنستىڭ 100 مەتردى 10,2 سەكۋندتا جۇگىرىپ وتكەن الەمدىك رەكوردىن قايتالادى دەپ ماقتانىشپەن ايتا الامىز.

ناعيما سيتتىققىزى عۇسماننىڭ 60 جىلدىعى قارساڭىندا، 1995 جىلى سەمەي قالاسىنداعى ءبىر كوشەنىڭ اتىن بەرگىزۋ ءۇشىن تالاي تابالدىرىقتى توزدىرادى.

اتاقتى سپورتشىعا قالانىڭ قاق ورتاسىنان كوشە بەرۋگە سول كەزدەگى قالالىق ءماسليحاتتىڭ حاتشىسى بولعان ادامدار كوپ كەدەرگى كەلتىرىپ، اقىرى بارناۋلسكايا دەگەن قالا شەتىندەگى ءبىر كوشەگە بەرگەن ەدى. بۇل كەيدە وسى ءبىز ارىستارىمىزدى قادىرلەي بىلەمىز بە، دەگەن ويعا دا جەتەلەيدى. سەمەيحان بالىقباەۆ اقساقال وسىدان 9 جىل بۇرىن شقو بورودۋليحا اۋدانىنىڭ ورتالىعى بورودۋليحا اۋلىنداعى بالالار مەن جاستاردىڭ سپورت مەكتەبىنە عۇسمان قوسانوۆتىڭ اتىن بەرۋگە ۇسىنىس ءتۇسىرىپ، دوسىنىڭ الدىنداعى پارىزىنا ادالدىق تانىتىپ، ۇلكەن ازاماتتىق جاساعان ەدى. ەندى مىنە، سول باستاماشىلدىق قولداۋ تاۋىپ، بورودۋليحا اۋداندىق بالالار مەن جاستاردىڭ سپورت مەكتەبىنە اتاقتى جەرلەسىمىزدىڭ اتى بەرۋ قاراستىرىلسا دەگەن ءۇمىتىمىز بار. ءساتىن سالسا ول كۇندەر دە الىس ەمەس…

ءابىل-سەرىك ابىلقاسىمۇلى

Abai.kz

5 پىكىر