دۇيسەنبى, 13 شىلدە 2020
«13 шілде – Ұлттық аза тұту күні»
ەل ءىشى... 1901 27 پىكىر 13 ناۋرىز, 2020 ساعات 18:14

دۇكەندەگى دۇربەلەڭ - بيلىككە دەگەن سەنىمسىزدىك

فوتو: instagram.com/denski_blog

كوروناۆيرۋس دەرتى تۇتاس دۇنيەنى تابانىنان تىك تۇرعىزدى. الەمدى الاڭداتقان اتى جامان اۋىرۋ وكىنشكە وراي بۇگىن ءبىزدىڭ ەلگە دە جەتتى. ايتىپ كەلەر اۋىرۋدىڭ الدىن الۋ ءۇشىن جالپى حالىقتىق دايىندىق جۇمىستارى جالعاسىپ جاتىر. 

جاقىندا قر باس مەملەكەتتىك سانيتارلىق دارىگەرى جانداربەك بەكشين كوروناۆيرۋس قازاقستاندا جاقىن كۇندەرى پايدا بولۋى مۇمكىن ەكەنىن ايتقان ەدى.

«ءبىزدىڭ بولجامىمىز بويىنشا، 11-16 ناۋرىز ارالىعىندا بىزدە كوروناۆيرۋس بولۋى مۇمكىن. پليۋس نەمەسە مينۋس ءبىر اپتا. ءبىز جاعدايدى ساراپتاپ، بولجام جاسايمىز. بولجام - بۇل ناقتىلىق ەمەس، ول سايكەس كەلمەۋى دە مۇمكىن، - دەگەن جانداربەك بەكشين.

ال 12 ناۋرىزدا بيلىك ەلدە ساقتىق شارالارىنىڭ كۇشەيتىلگەنىن مالىمدەدى. ول بويىنشا، بارلىق مەرەكەلىك-سپورتتىق شارالار ۋاقىتشا توقتاتىلدى. وقۋشىلار دەمالىسقا جىبەرىلىپ، ستۋدەنتتەر قاشىقتىقتان وقىتۋ جۇيەسىنە كوشتى.

اتالعان مالىمدەمەلەر ارقانى كەڭگە سالىپ جۇرگەن قازاقستاندىقتاردى ابىگەرگە سالعانى راس. فرانتسيا، گەرمانيا، جاپونيا سەكىلدى مەديتسيناسى مىڭ جىل ىلگەرى دامىعان ەلدەر يە بولا الماعان دەرت قازاقستانعا كەلسە قايتەمىز دەگەن قاۋىپ وياندى.

رەسمي مالىمدەمەلەردەن بولەك، ءتۇرلى الەۋمەتتىك جەلىلەر مەن بايلانىس قۇرالدارىنداعى شىن-وتىرىگى بەلگىسىز حابارلامالاردان جان شوشيدى. وسىنداي وڭدى-سولدى تارالعان جەل سوزدەردىڭ اسەرىنەن بولار، قازاقستاندىقتار ءوز بەتىنشە دايىندىق جۇمىستارىنا كىرىستى. تۇرعىندار دۇكەندەردە، سۋپەرماركەتتەردە جاپپاي ازىق-تۇلىك ساتىپ الىپ، ساۋدا ورىندارىندا ۇزىن-سونار كەزەك پايدا بولدى.

قازاقستاندىقتاردىڭ جاپپاي ساۋدا ورىندارىن جاعالاپ كەتۋىنە كوروناۆيرۋسپەن قاتار، تەڭگەنىڭ تىم تەز قۇنسىزدانىپ بارا جاتقانى دا سەبەپ بولدى دەيدى ماماندار. بۇلاي دەۋگە نەگىز جوق ەمەس، 13 ناۋرىزدا ەلدەگى اقشا ايىرباستاۋ پۋنكتەرىندە دوللار 407-409 تەڭگە ارالىعىندا ساتىلىپ جاتىر. تەڭگە قۇنسىزدانسا زات باعاسى دا قىمباتتايدى. دەمەك، تۇرعىندار ۆيرۋستان عانا ەمەس، قىمبات باعالاردان دا مۇمكىندىگىنشە ساقتانعىسى كەلەدى.

ءبىزدىڭ ويىمىزشا، حالىقتىق بۇلاي دۇرلىگۋىنە كوبىنەسە راستالماعان اقپاراتتار سەبەپ بولعان سەكىلدى. ويتكەنى رەسمي اقپاراتتار ۋاقىتىندا جاريالانباي وتىر. ونىڭ ۇستىنە، حالىق بيلىكتىڭ سوزىنە سەنۋدەن قالعان. ءتىپتى رەسمي باق-تا جاريالانعان اقپاراتتان گورى الەۋمەتتىك جەلىدەگى جازبالارعا سەنىم ارتاتىن اعايىن كوپ. بۇنىڭ بارىنە جاۋىردى جابا توقىپ ۇيرەنگەن بيلىكتىڭ ءوزى كىنالى. «وتىرىكشىنىڭ شىن ءسوزى زايا» دەيدى بۇنى قازاق.

مۇناي باعاسىنىڭ كۇرت قۇلدىراۋى كوروناۆيرۋس دەرتى دەندەپ تۇرعان كەزەڭدە «جىعىلعان ۇستىنە جۇدىرىق» بولىپ ءتيدى. دوللاردىڭ دەسى باسىپ، تەڭگەنىڭ تىنىسى تارىلعان وسىنداي كەزدە، زات باعاسى دا جۇگەن-قۇرىقسىز شۋ اساۋداي شارىقتاپ كەتەتىنى بار. «ارىق اتقا قامشى اۋىر» دەگەندەي، ايلىعى شايلىعىنا جەتپەي قوڭىرقالتا كۇن كەشەتىن قازاقستاندىقتارعا زات باعاسىنىڭ ءوسۋى وتە اۋىر تيەدى. ەرتەڭى نە بولاتىنىن بىلمەسە دە، كوز الدىنداعى قيىنشىلىقتى شەشكىسى كەلگەن حالىق ءبىر اپتالىق ازىعىن تولىقتاپ جاتقانى دا سوندىقتان...

بىراق جالپى جۇرتشىلىقتىڭ جاپپاي بازارعا جۇگىرۋى - زات باعاسىن وسىرەتىن تاعى ءبىر فاكتور. بازار نارىعى سۇرانىس بار زاتتىڭ باعاسىن ەسەلەي تۇسەدى. سول ءۇشىن حالىق كۇندەلىكتى كەرەك-جاراعىن عانا قامداعانى ابزال دەيدى ماماندار.

بۇگىن ەل الدىنا شىققان ساۋدا جانە ينتەگراتسيا ءمينيسترى باقىت سۇلتانوۆ ەلدە ازىق-تۇلىك تاپشىلىعى جوق ەكەنىن ايتىپ، قازاقستاندىقتاردى سابىرعا شاقىردى.

«بىزدە دۇربەلەڭ بار دەگەن ءسوز شىقسا، ول اقپاراتقا سەنبەۋگە شاقىرامىن. الەۋمەتتىك جەلىلەردە سۋپەرماركەتتەن تۇسىرىلگەن سۋرەتتىڭ تاراپ جاتقانىن كوردىڭىزدەر. كەز كەلگەن سۋپەرماركەتتە ارقاشان ءارتۇرلى سۋرەتتى ءتۇسىرىپ، تاراتا بەرۋگە بولاتىنىن بىلەسىزدەر. ونىمدەر تۋرالى ايتار بولسام، ەشقانداي جەتىسپەۋشىلىكتىڭ جوقتىعىن اتاپ وتكىم كەلەدى. اقپاراتتىڭ ازدىعى سەزىلۋى مۇمكىن، بىراق ءبىز تاۋارلاردىڭ جەتىسپەۋشىلىگىنە جول بەرمەيمىز. بۇل بارىمىزگە بايلانىستى. دۇربەلەڭ تۋعىزۋدىڭ قاجەتى جوق», - دەدى باقىت سۇلتانوۆ وكق-دە وتكەن ءباسپاسوز ءماسليحاتىندا.

سونىمەن قاتار، مينيستر كوروناۆيرۋستىڭ تارالۋىنا قارسى ءونىمدى شارالار ءجۇرىپ جاتقاندىقتان قازاقستانداعى كارانتين ۇزاققا سوزىلمايدى دەپ سەندىردى. ال بۇگىن قازاقستاندا ءۇش ادامنان كوروناۆيرۋس انىقتالعانى رەسمي ايتىلدى.

قۋانىش قاپپاس

Abai.kz

27 پىكىر