سەيسەنبى, 2 ماۋسىم 2020
COVID-19 قازاقستاندا. جۇقتىرعاندار — 11571. جازىلعاندار — 5757. قايتىس بولعاندار — 41
ساڭلاق 1494 2 پىكىر 10 ناۋرىز, 2020 ساعات 13:35

ەلەۋسىنوۆ ەكس الەم چەمپيونىمەن جۇدىرىقتاسادى

قازاقستاندىق كاسىپقوي بوكسشى دانيار ەلەۋسىنوۆ (9-0, 5 كو) كەلەسى جەكپە-جەگىن بۇرىنعى الەم چەمپيونىنا قارسى وتكىزەدى. 

بۇل تۋرالى Matchroom Boxing پروموۋتەرلىك كومپانياسى مالىمدەدى.

قازاقستاندىق وليمپيادا چەمپيونى 17 ءساۋىر كۇنى وكسون-حيللدە (اقش، مەريلەند شتاتى) وتەتىن بوكس كەشىندە ونەر كورسەتەدى. قارسىلاسى - ناميبيا ەلىنىڭ وكىلى دجۋليۋس يندونگو (23-2, 12 كو). 37 جاستاعى بۇل بوكسشى ءبىرىنشى جارتىلاي ورتا سالماقتا ءۇش نۇسقا بويىنشا (IBF, IBO جانە WBA (Super)) الەم چەمپيونى بولعان.

دجۋليۋس يندونگو

دجۋليۋس – اسا تاجىريبەلى بوكسشى. اتاقتى boxrec رەيتينگىسىندە ءوز سالماعىندا 33-ءشى ورىندا تۇر (ەلەۋسىنوۆ 77-ءشى ساتىدا). 2008 جىلى وتكەن بەكين وليمپياداسىنا قاتىسقان. 2009 جىلى كاسىپقوي بوكسقا بەت بۇرعان.

2016 جىلعا دەيىن دجۋليۋس ءوز وتانىندا 20 جەكپە-جەك وتكىزىپ، ەشقايسىسىندا جەڭىلگەن جوق. 2016 جىلدىڭ كوكتەمىندە يندونگو رەسەيدە ەكى تۇجىرىم بويىنشا الەم چەمپيونى (IBO, IBF) ەدۋارد ترويانوۆسكيدى ءبىرىنشى راۋندتا نوكاۋتقا جىبەرىپ، سەنساتسيا جاسادى. وسىدان كەيىن بوكس الەمى يندونگونى تانىدى.

2017 جىلى افريكالىق بوكسشى ۇلىبريتانيادا ريكي بەرنستى جەڭىپ، تاعى ءبىر ماڭىزدى بەلبەۋ - WBA تۇجىرىمى بويىنشا چەمپيوندىق اتاقتى جەڭىپ الدى.

يندونگو ءتىپتى سول جىلدىڭ وزىندە ءابسوليۋتتى الەم چەمپيونى اتانۋ مۇمكىندىگىنە يە بولعان. بىراق ەكىنشى سەنساتسيا ورىن العان جوق. 2017 جىلى 19 تامىزدا امەريكالىق تەرەنس كروۋفوردتان (36-0, 27 كو) جەڭىلىپ، چەمپيوندىق بەلبەۋلەردى بىرىكتىرە العان جوق. بۇل نامبيالىق بوكسشىنىڭ مانسابىنداعى العاشقى جەڭىلىسى بولاتىن.

وسودان كەيىن يندونگو WBC ۋاقىتشا چەمپيوندىعى ءۇشىن وتكەن جەكپە-جەكتە امەريكالىق رەدجيس پروگرەيستەن جەڭىلدى.

2019 جىلى دجۋليۋس تەك ءبىر عانا جەكپە-جەكتى وتكىزدى. بۇل جولى امەريكالىق كارلتاۆيۋس دجونس دجونسوندى نوكاۋتپەن جەڭگەن. سودان بەرى ول شارشى الاڭعا شىققان جوق.

ال دانيار ەلەۋسىنوۆ سوڭعى جەكپە-جەگىن وتكەن جىلدىڭ جەلتوقسان ايىندا وتكىزدى. ول كەزدە امەريكالىق الان سانچەستى (20-5-1, 10 كو) تەحنيكالىق نوكاۋتپەن جەڭگەن بولاتىن.

قۋانىش قاپپاس

Abai.kz

2 پىكىر