مەملەكەت باسشىسى قاسىم-جومارت توقاەۆ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتى قابىلدادى.

قاسىم-جومارت توقاەۆقا مينيسترلىكتىڭ اتاۋلى الەۋمەتتىك كومەك بەرۋدىڭ جاڭا ءتارتىبىن جۇزەگە اسىرۋ، كوپبالالى وتباسىلارعا تابىس كولەمىنە قاراماستان جاردەماقى بەرۋ، سونىمەن قاتار، مۇمكىندىگى شەكتەۋلى ازاماتتارعا الەۋمەتتىك قولداۋ كورسەتۋ باعىتىندا اتقارىپ جاتقان كەشەندى شارالارى جايىندا باياندالدى.

پرەزيدەنتكە «ەڭبەك» باعدارلاماسىنىڭ ىسكە اسىرىلۋ بارىسى، ونىڭ ىشىندە، جاعدايى تومەن جانە كوپ بالالى وتباسىلارعا شاعىن كرەديت بەرۋ ءتارتىبى، جۇمىس بەرۋشىلەردىڭ ۇسىنىسى بويىنشا بولىنەتىن ءبىلىم گرانتتارى، جاستاردىڭ جاڭا جوبالارى تۋرالى مالىمەت بەرىلدى. سونداي-اق، شەت ەلدەن جۇمىس كۇشىن تارتۋ ماسەلەسى بويىنشا باس پروكۋراتۋرامەن بىرلەسىپ جۇرگىزگەن تەكسەرۋلەردىڭ قورىتىندىسى جايىندا ايتىلدى.

ەڭبەك جانە حالىقتى الەۋمەتتىك قولداۋ ءمينيسترى پرەزيدەنتكە مەملەكەتتىك قىزمەتشىلەردىڭ مەرەكەلەردەن كەيىن كەلەتىن دەمالىس كۇندەرى جۇمىسقا شىعۋى قازاقستان زاڭناماسىنا قايشى ەمەس ەكەنىن جانە وزگەرتۋلەر ەنگىزۋدى تالاپ ەتپەيتىنىن جەتكىزدى. مەملەكەت باسشىسىنىڭ تاپسىرماسى ەڭبەك كودەكسىن تولىق ساقتاي وتىرىپ، كەزەك كۇتتىرمەيتىن جانە ماڭىزدى مىندەتتەردى اتقارۋ ءۇشىن «قازاقستان رەسپۋبليكاسىنىڭ مەملەكەتتىك قىزمەت تۋرالى» زاڭعا سايكەس ورىندالادى. ەڭبەك كودەكسى بويىنشا مەملەكەتتىك قىزمەتشىلەر جۇمىسقا ءوزىنىڭ جازباشا كەلىسىمىمەن شىعادى جانە ولاردىڭ ءبىر كۇندىك جۇمىسىنىڭ ەڭبەكاقىسى كەمىندە 1,5 ەسە كولەمىندە تولەنەدى. مەرەكەلەردەن كەيىن كەلەتىن دەمالىس كۇندەرى جۇمىسقا پرەزيدەنت اكىمشىلىگىنىڭ، ۇكىمەتتىڭ، ورتالىق مەملەكەتتىك ورگاندار مەن باسقا دا ۆەدومستۆولاردىڭ كەزەك كۇتتىرمەيتىن جانە ماڭىزدى مىندەتتەرگە جاۋاپتى قىزمەتكەرلەرى تارتىلادى.

قاسىم-جومارت توقاەۆ ءبىرجان نۇرىمبەتوۆكە اتاۋلى الەۋمەتتىك كومەك الاتىن ەڭبەككە جارامدى ازاماتتاردى جۇمىسپەن قامتۋدىڭ ناقتى شارالارىن قابىلداۋدى، از قامتىلعان وتباسىلاردىڭ تابىسىن ارتتىرۋدى، مۇمكىندىگى شەكتەۋلى ازاماتتارعا الەۋمەتتىك قولداۋ كورسەتۋدى تاپسىردى. سونىمەن قاتار پرەزيدەنت شەت ەلدەن جۇمىس كۇشىن تارتۋ ماسەلەسىن ەرەكشە باقىلاۋدا ۇستاۋ قاجەتتىگىن باسا ايتتى.

Abai.kz