سارسەنبى, 1 ءساۋىر 2020
46 - ءسوز 1722 15 پىكىر 3 ناۋرىز, 2020 ساعات 10:39

كەتكەنگە كەيىمەيىك، كەلگەندى كەمسىتپەيىك!

ساياساتتانۋشى دانيار اشىمباەۆتىڭ "Dalanews.kz" سايتىندا “ورالماندار؟ ولار مەملەكەت ەسەبىنەن كۇن كورگىسى كەلەدى” (2 ناۋرىز، 2020 جىل) دەگەن پىكىرى جارىق كورىپتى.

كەتىپ جاتقاندار كوپ، ارينە. بۇدان بىلاي دا ولاردىڭ قارقىنى باسىلماۋى مۇمكىن. بىراق، مەن ولاردى قازاقستاندا كۇنكورىستىڭ قيىندىعىنان كوشۋگە ءماجبۇر بولىپ جاتىر دەپ ويلامايمىن. اشىمباەۆ: “ورالماندار؟ ولار مەملەكەت ەسەبىنەن كۇن كورگىسى كەلەدى”

نەگىزى، ءبىر ەلدەن ەكىنشى ەلگە قولىندا بار، قالتاسى قالىڭ ادامدار كوشە الادى. قازاقستاننان بوسقىن بولىپ كەتىپتى دەگەندى، قۇدايعا شۇكىر، ەستىگەن جوقپىز. ەكىنشىدەن، ولار دا ۇرپاعىنىڭ بولاشاعىن ويلايدى، ءوز ۇلتىنىڭ ءوشىپ قالماۋىن قالايدى... سوندىقتان نەگە كەتتىڭ دەپ ولاردى، نەگە "كەتىردىڭ" دەپ، قازاقستاندى كىنالاۋعا كەلمەيدى. قايتا، كەتكەندەرگە "جولى بولسىن!" ايتقان ءجون.

سوسىن، ساياساتتانۋشى اشىمباەۆ مىرزانىڭ "ولار وسىندا كوشىپ كەلىپ، مەملەكەت ەسەبىنەن كۇن كورگىسى كەلەدى”، دەگەن پىكىرىن تۇسىنبەي وتىرمىن.

ۇكىمەت 2020 جىلى قانداستاردى قابىلداۋعا ارنالعان ايماقتىق كۆوتا ءۇشىن نەبارى 1378 ادامعا عانا قاراجات ءبولدى. مەن ون جىلدان بەرى قانداستار ماسەلەسىمەن تىكەلەي اينالىسىپ كەلە جاتقان اداممىن. ولاردىڭ جاعدايىن وتە جاقسى بىلەم. قانداستارىمىز ءوزىن-ءوزى جۇمىسپەن قامتۋدا بۇكىل قازاقستاندىققتارعا ۇلگى بولارلىق جاعدايدا. اقشا، ءۇي سۇراپ كەلگەن قانداسىمدى جولىقتىرعان ەمەسپىن. ولاردى قيناپ كەلگەن ءبىر-اق ماسەلە بار. ول - قۇجات راسىمدەۋدەگى قيىنشىلىق. قۇدايعا شۇكىر، ول ماسەلە دە ءوز شەشىمىن تاۋىپ جاتىر.

دانيار اشىمباەۆ مىرزا: "ۇكىمەتتە رومان سكلياردان (پرەمەردىڭ ورىنباسارى) وزگە ۇلت وكىلدەرى جوق. ۆيتسە-مينيسترلەردىڭ دەڭگەيىندە وزگە ۇلت وكىلدەرىن ساۋساقپەن ساناپ الاسىز. اكىمدەر اراسىندا دا قازاق ەمەستەر جوق. اۋدان اكىمدەرى اراسىندا ءىشىنارا عانا وزگە ۇلتتار. ۇلتتىق كومپانيالار دەڭگەيىندە دە وسى كورىنىس", دەپ كەيىپتى.

ءدال وسى جاعداي شەتتەن ورالعان قانداستارىمىزدىڭ دا باسىندا بار. قايتا، رومان سكليار پرەمەردىڭ ورىنباسارى ەكەن عوي. ونداي لاۋازىم قانداستارىمىزدىڭ ويى تۇرماق، تۇسىنە دە كىرگەن ەمەس. قانداستارىمىز لاۋازىم، پايدا ىزدەپ كەلگەن جوق. ءوز وتانىندا ءومىر ءسۇرۋ ءۇشىن كەلىپ جاتىر. كوشىپ كەلگەندەردىڭ ىشىندە بىلىكتى ازاماتتار جوق ەمەس، بار. كوپ. بىراق، مىنە وتىز جىل بولدى، ۇكىمەت ءوزى ءبىلىپ ولاردى لاۋازىمدى قىزمەتكە قويۋ جاعىن ويلاستىرعان جوق...

جالپى، مەن كەلىپ جاتقانداردى كەمسىتۋگە تىپتەن قارسىمىن! قازاقستان - قازاقتىڭ قارا شاڭىراعى، الەمدەگى جالعىز وتانى! وعان تاريحي سەبەپتەرمەن ءبولىنىپ قالىپ، شەتتە جۇرگەن ءيسى قازاقتىڭ ءبارى كەلۋگە قۇقىقتى. ولاردىڭ ءبىلىم جانە مادەنيەت دەڭگەيى ءار ءتۇرلى بولۋى مۇمكىن، وعان ولار جازىقتى ەمەس. ەڭ باستىسى، شەتتەن كوشىپ كەلگەن قانداستارىمىز قازاقستاندا تۇراقتى ءومىر سۇرەدى. وسىنداعى جۇرت نە كورسە، سونى باسىنان كەشىرۋگە دايىن! وتانىنا دەگەن ادالدىعى مەن سەنىمى بەرىك!

بۇل - توننالاپ التىن بەرىپ، ساتىپ الا المايتىن قۇندىلىق! ءبىر بۋىن وكىلدەرى الا-قۇلا ءومىر سۇرگەنىمەن، كەلەسى بۋىن تەڭەسىپ كەتەدى. باسقادان اقشا اياۋعا بولاتىن شىعار. قازاق كوشىنەن قاراجات اياماۋ كەرەك! سوندىقتان، كەتكەنگە كەيىمەيىك، كەلگەندى كەمسىتپەيىك، اعايىن!

اۋىت مۇقيبەك،

ۇلتتىق قوعامدىق سەنىم كەڭەسىنىڭ مۇشەسى.

Abai.kz

15 پىكىر