الماتىدا پوليتسيا "رەسپۋبليكا" جانە "استانا" الاڭدارىنىڭ ماڭىن قورشاپ تۇر. اتالعان اۋماقتاردا ۇيالى بايلانىس قىزمەتى دە بۇعاتتالعان، داپ حابارلايدى qazaqtimes.com سايتى.

بۇدان بۇرىن ەلىمىزدەگى بىرقاتار قوعامدىق ۇيىمدار مەن قوزعالىستار، جاڭا پارتيالار نارازىلىق شاراسىن وتكىزەتىنىن حابارلاعان. ولاردىڭ قاتارىندا قازاقستاندا ەكسترەميستىك ۇيىم رەتىندە شەكتەلگەن "قازاقستان دەموكراتيالىق تاڭداۋى" قوزعالىسى جانە ءالى تىركەلىپ ۇلگىرمەگەن "دەمپارتيا" دا بار. سونداي-اق، نارازىلىق شاراسىنا "رەسپۋبليكا", "ويان قازاقستان" قوزعالىستارى دا قولداۋ كورسەتكەن.

وسىعان بايلانىستى الماتى قالاسىندا پوليتسيا الاڭداردى جانە سوعان جاقىن اۋماقتى قورشاۋعا الدى. جاياۋ جۇرگىنشىلەردىڭ وتۋىنە دە تىيىم سالدى. ۇيالى بايلانىس جەلىسىنىڭ بۇعاتتالۋىنا بايلانىستى Kcell  جانە Beeline بايلانىس وپەراتورلارىنا حابارلاسىپ سۇراعانىمىزدا، ەل ورتالىعى مەن الماتى قالالارىندا قۇزىرلى ورگاندار تارابىنان ۇيالى بايلانىس جەلىسىنىڭ بۇعاتتالعانىن ايتتى.

اتالمىش سايتتىڭ اقپارىنا قاراعاندا، پوليتسيا الاڭعا جاقىن ماڭدا بارلىق جۇرگىنشىلەردىڭ وتۋىنە شەكتەۋ قويعان. جۋرناليستەردى دە بىرنەشە رەت قاتاڭ تەكسەرۋدەن وتكىزگەن. اراسىندا قىزمەتتىك تاپسىرماسى جوق دەگەن ايىپپەن انار اققوزى جانە اسەل جاڭاباي ەسىمدى جۋرناليستەردى ۇستاعانى ءمالىم بولدى. سونداي-اق، بەلگىلى جۋرناليست، "دات" گازەتىنىڭ بۇرىنعى باس رەداكتورى ەرمۇرات باپي دا ۇستالعانى تۋرالى اقپارات تارادى.

ايتا كەتەيىك، وسىعان دەيىن وپپوزيتسيالىق كوزقاراستاعى توپتار 1 ناۋرىز كۇنى جالپىحالىقتىق شەرۋ وتەتىنىن حابارلاعان ەدى. ازاماتتىق بەلسەندى دۋلات اعادىلدىڭ نۇر-سۇلتان قالاسىنىڭ تەرگەۋ يزولياتورىندا قايتىس بولۋىنان كەيىن، ەلدە بىرنەشە مارتە نارازىلىق اكتسيالارى وتكەن. بۇگىنگە جوسپارلانعان شەرۋدە بەلسەندىلەر ەكس-پرەزيدەنتتىڭ بيلىككە ارالاسپاۋىن تالاپ ەتپەك بولعان.

سونداي-اق، بۇگىن ازاتتىق سايتى شىمكەنت قالاسىنىڭ اكىمدىگىنە جينالعان بەلسەندىلەردى دە پوليتسيا ۇستاعانىن جازدى.

Abai.kz