بەيسەنبى, 29 قازان 2020
COVID-19 قازاقستاندا. جۇقتىرعاندار — 111100. جازىلعاندار — 106059. قايتىس بولعاندار — 1825
بۇ نە مازاق؟ 1539 4 پىكىر 27 اقپان, 2020 ساعات 14:05

LRT ەندى CTS بولدى...

اڭگىمەسى كوپ استانانىڭ الگى ايدىك بولعان LRT-ءسى ەندى CTS بولىپ وزگەردى. اتاۋىن وزگەرتتى. لوگوتيپىن جاڭارتتى. ءسويتىپ رەبرەندينگ جاسادى. بۇل تۋرالى كومپانيا باسشىسى بەكمىرزا يگەنبەردينوۆ مالىمدەگەن ەكەن.

CTS. تولىق اتاۋى - City Transportation Systems. قازاقشا قوتارماسى - قالالىق كولىك جۇيەسى.

جاڭاعى يگەنبەردينوۆتىڭ ايتۋىنشا، كومپانيا اتاۋىن وزگەرتىپ، جاڭاشالاۋ قالا باسشىلىعىنىڭ شەشىمى ەكەن. ءسويتىپ، القا-قوتان وتىرىپ اقىلداسا كەلىپ، وزگەلەردىڭ تاجىربيەلەرىن ەسكەرىپ، ەڭ جاقسىسى وسى ەكەن، دەگەندە تاپقانى - CTS بولىپتى. ال كومپانيا حالىقارالىق قوعامدىق كولىكتەر وداعىنىڭ مۇشەسى ەكەن. سوندىقتان دا جاڭا اتاۋ اعىلشىن تىلىندە تاڭدالىپتى-مىس.

رەبرەندينگتىڭ قۇنى قانشا؟ نەمەسە كومپانيا اتاۋىن اۋىستىرۋعا قانشا قاراجات جۇمسالدى؟

بەكمىرزا يگەنبەردينوۆتىڭ ايتۋىنشا، كومپانيا اتاۋىن، لوگوتيپىن اۋىستىرۋعا بيۋدجەتتىڭ ءبىر تيىن قارجىسى جۇمسالماعان.

"بىرىنشىدەن، ءبىز ءوزىن-ءوزى اسىراپ وتىرعان كومپانيامىز. بيۋدجەتتەن ءبىر تيىن دا المايمىز. ال رەبرەندينگ ماسەلەسى بىرتە-بىرتە بولادى. ول ەندى ءبىزدىڭ شىعىنىمىز جانە ول اسا قىمباتقا تۇسپەيدى. ال لوگوتيپتى ازىرلەۋگە بار بولعانى 100 مىڭ تەڭگە جۇمسالدى", دەپتى.

استانا LRT ءوز اتاۋىن الگى داۋلى وقيعادان كەيىن وزگەرتتى مە؟ يگەنبەردينوۆ رەبرەندينگ جاساۋعا LRT داۋىنىڭ قاتىسى جوق دەگەندى ايتىپتى.

بەكمىرزا يگەنبەردينوۆ تىزگىنىن ۇستاپ وتىرعان كومپانيا جالپى نۇر-سۇلتانداعى قوعامدىق كولىكتەر جۇيەسىنە باسشىلىق جاسايدى ەكەن. ال LRT - كومپانيا قىزمەتىنىڭ ءبىر سالاسى عانا-مىس.

© تۇرار قازانعاپوۆ

ەستەرىڭىزگە سالا كەتەيىك، وسىعان دەيىن LRT قۇرىلىسىنان قارجى جىمقىرۋعا قاتىستى تەرگەۋ اياقتالعان. ەسەپ-قيساپتارى تۇگەندەلگەن سوڭ، بيۋدجەتكە 5,7 ميلليارد تەڭگە شىعىن كەلگەنى انىقتالعان. اۋەلدە جىمىسقى جوسپاردى قۇرۋشىلار 24 ميللياردتى قولدى قىلماق بولعان.

اتالعان ءىس بويىنشا 10 ادام جاۋاپقا تارتىلعان. سونىڭ ىشىندە 3 ادامعا حالىقارالىق ىزدەۋ جاريالانعان. اتاپ ايتقاندا، استانا اكىمىنىڭ بۇرىنعى ورىنباسارى قانات سۇلتانبەكوۆكە، استانا LRT-نىڭ بۇرىنعى باسشىسى تالعات اردانعا جانە جاۋاپتى قىزمەتكەر ابدۋلحاميتوۆكە ىزدەۋ جاريالانعان. سونداي-اق، قالالىق ءماسليحاتتىڭ حاتشىسى جانات نۇرپەيىسوۆ تۇتقىندالعان.

ال 2019 جىلدىڭ شىلدەسىندە پرەزيدەنت قاسىم-جومارت توقاەۆ LRT جوباسىن سىناعان. ال قازان ايىندا تەرگەۋ جۇمىستارىن كۇشەيتۋ تۋرالى تاپسىرما بەرگەن.

Abai.kz

4 پىكىر