قازاقستاننىڭ قارجى مينيسترلىگى، قارجى مونيتورينگى كوميتەتى توراعاسىنىڭ ورىنباسارى عابيت لەسبەكوۆ ەلىمىزدەن 27 تريلليون تەڭگە شەتەلگە شىعارىلعانىن ايتىپتى.

لەسبەكوۆتىڭ مالىمەتىنشە، 27 تريلليون تەڭگەنىڭ شامامەن 10 تريلليونى ۇلىبريتانيا مەن رەسەيگە اۋدارىلعان.

- قازىرگى تاڭدا بازامىزداعى مالىمەتكە سايكەس، بىزگە 1 ميلليون 643 مىڭ 320 حابارلاما ءتۇستى. ناتيجەسىندە جالپى سوماسى 27 تريلليون تەڭگە ەلدەن شىعارىلعان. بۇل اقشانىڭ 80 پايىزى 5 ەلگە: ۇلىبريتانيا، رەسەي، قىتاي، شۆەيتساريا، اقش-قا اۋدارىلعان. ال ۇلىبريتانيا، رەسەي ءبىرىنشى ورىندا تۇر. بۇل مەملەكەتتەرگە 27 تريلليون تەڭگەنىڭ شامامەن 10 تريلليون تەڭگەسى اۋدارىلعان،- دەپتى عابيت لەسبەكوۆ.

ال، وتكەن اپتادا LS سايتى 2019 جىلى قازاقستاننان 655 ملرد. تەڭگەدەن استام قاراجات سىرتقا شىعارىلعانىن جازدى.

LS مالىمەتىنشە، قازاقستاننىڭ شەت ەلدەرگە جىبەرگەن اقشاسى ءبىر جىل ىشىندە 9%-عا وسكەن. ال، اقشانىڭ باسىم بولىگى رەسەي مەن وزبەكستانعا اۋدارىلعان كورىنەدى.

ۇلتتىق بانك بۇل اۋدارىمنىڭ 2018 جىلمەن سالىستىرعاندا 8,8 پايىزعا كوپ ەكەنىن ايتتى.

2019 جىلى قازاقستان قاي ەلدەرگە قانشا قاراجات اۋداردى؟

رەسەيگە - 208 ميلليارد.تەڭگە

وزبەكستانعا - 139 ميلليارد.تەڭگە

تۇركياعا - 93,4 ميلليارد.تەڭگە

قىرعىزستان -87,2 ميلليارد.تەڭگە.

قىتايعا 35,5 - ميلليارد تەڭگە

ۋكرايناعا - 10,7 ميلليارد تەڭگە

ارمەنياعا - 9,4 ميلليارد تەڭگە اۋدارىلعان.

سونىمەن بىرگە، 2019 جىلى قازاقستانعا باسقا ەلدەردەن 342 ميلليارد تەڭگەدەن استام قاراجات كەلگەن.

Abai.kz