سەيسەنبى, 2 ماۋسىم 2020
COVID-19 قازاقستاندا. جۇقتىرعاندار — 11571. جازىلعاندار — 5757. قايتىس بولعاندار — 41
1334 14 پىكىر 21 اقپان, 2020 ساعات 17:14

توقاەۆ: جات ءدىني اعىمدارعا جول بەرمەۋگە ءتيىسپىز

بۇگىن قازاقستان پرەزيدەنتى قاسىم-جومارت توقاەۆ نۇر-سۇلتان قالاسىندا ورنالاسقان ازىرەت-سۇلتان مەشىتىنە بارىپ، قازاقستان مۇسىلماندارى ءدىني باسقارماسىنىڭ جاڭادان سايلانعان باس ءمۇفتيى ناۋرىزباي قاجى تاعانۇلىمەن كەزدەستى. 

كەزدەسۋدە مەملەكەت باسشىسى ناۋرىزباي تاعانۇلىن جاڭا لاۋازىمىمەن قۇتتىقتاپ، الداعى جۇمىستارىنا تابىس تىلەدى.

سونىمەن قاتار، پرەزيدەنت ءدىني جات اعىمداردىڭ حالىققا زيانى جايلى، ازاماتتاردى ءدىن ارقىلى كەلىسىم مەن ىنتىماققا شاقىرۋ جونىندە، رۋحاني باعىت-باعدار مەن ەلدەگى تۇراقتىلىق-تاتۋلىقتى ساقتاۋ جايىندا ايتتى.

- قازىرگى ۋاقىتتا دۇنيە جۇزىندە ءارتۇرلى جات ۇردىستەر پايدا بولىپ جاتىر. حالىقتى تاتۋلىققا، پاتۋاعا، بىرلىككە شاقىرۋ كەرەك. ال، ءتۇرلى جات ءدىني اعىمدارعا تىيىم سالىپ، جول بەرمەۋگە ءتيىسپىز. وسى باعىتتا دۇرىس ۇگىت-ناسيحات جۇمىستارىن جۇرگىزىپ، ەل مۇددەسىنە قىزمەت ەتۋ قاجەت, - دەدى قاسىم-جومارت توقاەۆ.

ال، باسقارمانىڭ جاڭا سايلانعان باسشىسى ناۋرىزباي قاجى تاعانۇلى مەملەكەت باسشىسىنا قازاقستان مۇسىلماندارى ءدىني باسقارماسىنىڭ الداعى جۇمىستارى، باسقارما ۇيىتقى بولاتىن قايىرىمدىلىق شارالارىنڭ جوسپارلارىن تانىستىردى.

باس ءمۇفتيدىڭ ايتۋىنشا، باسقارمانىڭ الداعى جۇمىسى جەتى رۋحاني قازىققا نەگىزدەلمەك. ولار: ءبىلىم، ادىلدىك، مادەنيەتتىلىك، ەڭبەكقورلىق، يماندىلىق، اۋىزبىرشىلىك پەن وتانشىلدىق.

ايتا كەتەيىك، اقپان ايىنىڭ باسىندا نۇر-سۇلتان قالاسىندا قازاقستان مۇسىلماندارى ءدىني باسقارماسىنىڭ كەزەكتەن تىس IX قۇرىلتايى وتكەن بولاتىن. قۇرىلتايعا قاتىسقان قر اقپارات جانە قوعامدىق دامۋ ءمينيسترى داۋرەن اباەۆ سەرىكباي قاجى ورازدىڭ ءۇش جىلدا اتقارعان قىزمەتىنە ريزاشىلىق ءبىلدىرىپ، ونىڭ ورنىنا ناۋرىزباي قاجى تاعانۇلىن قازاقستان مۇسىلماندارى ءدىني باسقارماسىنىڭ توراعالىعىنا تاعايىنداعان بولاتىن.

ال، قۇرىلتايعا بارعان 300 دەلەگات ناۋرىزباي تاعانۇلىنىڭ ۇمىتكەرلىگىن ءبىراۋىزدان قولداپ، داۋىس بەردى.

سونداي-اق، قۇرىلتايدا ءسوز العان سەرىكباي قاجى وراز ءدىني باسقارمانىڭ 30 جىلدىعى قارساڭىندا 30 ەلدى-مەكەننىڭ جول-كوپىر، اۋىز-سۋ ماسەلەسىنە وڭ ىقپال ەتۋدى، 30 ستۋدەنتكە گرانت تاعايىنداۋدى، 30 وتباسىنا قايىرىمدىلىق جاساۋدى، 30 مەشىتكە كۇردەلى جوندەۋ جۇرگىزۋدى، 30 مەشىتكە ەل يگىلىگى ءۇشىن ەڭبەك ەتكەن تۇلعالاردىڭ، ولاردىڭ ىشىندە اباي مەن ءال-ءفارابيدىڭ ەسىمدەرىن بەرۋ شارالارى قولعا الىنعانىن ايتتى.

سونىمەن قاتار ول جاڭا سايلانعان ناۋرىزباي قاجى تاعانۇلىنىڭ ءدىن سالاسىندا تاجىريبەسى مول ەكەنىن العا تارتىپ، الداعى جۇمىستارىنا ساتتىلىك تىلەگەن بولاتىن.

Abai.kz

14 پىكىر