اباي "قورقامىن كەيىنگى جاس بالالاردان" دەپ تەككە ايتپاپتى... ءبارى دەپ، كوپكە توپىراق شاشپاي-اق قويايىن، بىراق كەيىنگى كەزدە وزىمنەن ءبىر بۋىن، ياعني، 10 جاستاي كىشىلەرمەن سويلەسكەندە ءبارىنىڭ ويى - "مۇندا ەشتەڭە قالعان جوق، قالايدا شەتەلگە كەتۋ كەرەك، مىنا ەلدەن بولاشاعىمدى كورىپ تۇرعانىم جوق" دەگەنگە سايادى. "قايدا تۇرعىڭ كەلەدى؟" دەسەڭ، ەۋروپا مەن اقش، قالا بەردى كورەيانى ايتادى.

ولاردىڭ ويىنشا شەتەلدە ءبىر كەرەمەت ءومىر كۇتىپ تۇرعان سياقتى. ياعني، قازاقستان قازىرگى كوپشىلىك جاستار ءۇشىن وتان، قارا شاڭىراق، قاسيەتتى مەكەن ەمەس، امالدىڭ جوعىنان جۇرگەن ۋاقىتشا مەكەن ەكەن.

ءماا، قانداي قورقىنىشتى ۇرپاق ءوسىپ كەلەدى؟! مەن ءوز باسىم، شىنى كەرەك، شەتەلدە ءارى كەتسە ءبىر اپتا شىداي الام. ءتىپتى، ءۇش كۇننىڭ دە ءوزى جەتەدى. ءبىرىنشى كۇنى تەڭىزىن، ەكىنشى كۇنى مۋزەيىن، باسقاسىن شارلاپ بىتەم، ءبىتتى، ءۇشىنشى كۇنى ەلىمدى، جەرىمدى ءبىر جىل كورمەگەندەي، سۇمدىق ساعىنىش باستالادى.

سوندا، وسى ەلدى ماڭگىگە قيىپ تاستاپ كەتۋگە دايىن بولۋ ءۇشىن جۇرەگىڭ قانداي بولۋى كەرەك؟ ەتتەن بە، الدە قولادان با؟

اباي اتا، مەن دە ءسىز سەكىلدى "قورقامىن كەيىنگى جاس بالالاردان..."

ماريام ءابساتتاردىڭ الەۋمەتتىك جەلىدەگى جازباسىنان

Abai.kz