دۇيسەنبى, 1 ماۋسىم 2020
COVID-19 قازاقستاندا. جۇقتىرعاندار — 11308. جازىلعاندار — 5404. قايتىس بولعاندار — 41
986 8 پىكىر 14 اقپان, 2020 ساعات 11:58

قىتاي بيلىگى كوروناۆيرۋستى جۇقتىرعاندار سانى كۇرت ارتقانىن حابارلادى

قىتايدا كوروناۆيرۋستى جۇقتىرعاندار سانى الدىڭعى كۇنمەن سالىستىرعاندا 10 ەسەگە كوبەيىپ، سوڭعى دەرەك بويىنشا 15 مىڭعا جۋىق ادامنان ۆيرۋس تابىلعان. بۇل اقپاراتتى قىتاي بيلىگى حابارلادى. سوڭعى تاۋلىكتە ۆيرۋستان 242 ادام كوز جۇمعان.

دۇنيەجۇزىلىك دەنساۋلىق ساقتاۋ ۇيىمى سارسەنبى كۇنى كوروناۆيرۋستىڭ تارالۋى باسەڭدەدى دەپ مالىمدەگەن ەدى. 10-11 اقپاندا قىتاي بيلىگى ەكى مىڭ جاڭا وقيعا تىركەلگەنىن حابارلاعان.

قىتايدىڭ دەنساۋلىق ساقتاۋ جونىندەگى ۇلتتىق كوميسسياسى اۋرۋدى انىقتاۋ مەتوديكاسى وزگەرگەندىكتەن ۆيرۋستى جۇقتىرعاندار سانى كۇرت كوبەيدى دەدى. دارىگەرلەر ەندىگارى كومپيۋتەرلىك توموگرافيا دەرەكتەرىنە سۇيەنە وتىرىپ، اۋرۋدى ەرتەرەك انىقتايمىز دەپ وتىر.

قازىرگى كەزدە قىتايدىڭ وزىندە ۆيرۋستى جۇقتىرعاندار سانى 60 مىڭعا جەتتى، ءۇش مىڭنان استام ادام كوز جۇمدى. شامامەن التى مىڭى اۋرۋدان ايىقتى.

12 اقپاندا لوندوندا ءبىرىنشى كوروناۆيرۋستى جۇقتىرۋ وقيعاسى تىركەلدى. BBC اقپارات اگەنتتىگىنىڭ جازۋىنشا، ناۋقاس بىرنەشە كۇن بۇرىن قىتايدان كەلگەن. جالپى ۇلىبريتانيادا وسىمەن توعىز وقيعا تىركەلدى.

ۆيرۋستىڭ تارالۋ اۋقىمى كەڭەيىپ بارادى. الەمنىڭ 50 مەملەكەتىندە كوروناۆيرۋس تابىلعان.

دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس ەپيدەميانىڭ اياقتالاتىنى جايلى بولجام جاساۋ ءالى قيىن دەيدى. ددسۇ عالىمدارى قازىرگى كەزدە ءتورت ءتۇرلى ەكپەمەن جۇمىس ىستەپ جاتقانىن حابارلادى.

كوروناۆيرۋستىڭ جاپپاي تارالۋىنا بايلانىستى بىرقاتار حالىقارالىق شارالار كەيىنگە قالدى. حالىقارالىق كولىك فەدەراتسياسى قىتايداعى "فورمۋلا-1" جارىسىن كەيىنگە قالدىرۋ تۋرالى شەشىم قابىلدادى. بارسەلوناداعى Mobile World Congress كورمەسىنىڭ ۇيىمداستىرۋشىلارى كوروناۆيرۋسقا بايلانىستى كورمە وتپەيتىنىن مالىمدەدى.

رەسەي قيىر شىعىستاعى قىتايمەن شەكاراسىن جاۋىپ، كورشى ەلگە قاتىنايتىن اۆتوبۋستاردى توقتاتتى. 14 اقپاننان باستاپ رەسەي مەن قىتاي اراسىنداعى چارتەرلىك رەيستەر توقتايدى.

Abai.kz

8 پىكىر