سارسەنبى, 21 ءساۋىر 2021
46 - ءسوز 2274 2 پىكىر 30 قاڭتار, 2020 ساعات 13:32

ۇدەرiستەردi ءبول. بiر مەزگiلدە بiر جۇمىس.

جەلتوقساننىڭ 31-ءى كۇنى، 14 جاسقا تولىپ قالعان كەزىم بولاتىن. اڭ اۋلاپ قايتىپ، جاڭا جىلدا داستارحانعا اكەپ قويعانعا ءبىر-ەكى قويان اتىپ العىم كەلدى. 16-نى (كاليبر) الىپ الدىم قولىما. تالاي نارسە باسىنان وتكەن ەسكى مىلتىق. سول مىلتىق وزىمە قاتتى ۇنايتىن. وتكەنى مەنىڭ ەڭ العاش ۇستاعان مىلتىعىم بولاتىن. اكەم وزىنە توز-12 cاتىپ الىپ، ونى ماعان بەرە سالعان.
ۇيدەن شىققاننان كەيىن جاعاسىندا قالىڭ بۇتا وسكەن سارىكەڭگىر وزەنىنە قاراي بەت الدىم. تاعى ءبىراز جۇرگەننەن كەيىن بiر. جىلىمنان ءدۇر ەتىپ ۇشقان جابايى ۇيرەكتەردى كوردىم. قىستىڭ ورتاسىندا بۇل جەردە ءومىرى ۇيرەك بولمايتىن. قۋانىپ كەتىپ، سولاي قاراي اسىقتىم. ۇيرەكتەر جۇرگەن كەلەسى جىلىم ءبىر –ەكى شاقىرىمداي ەكەن. جاقىنداي بەرگەندە ۇيرەكتەر مەنى كورىپ قالىپ، تاعى ۇركىپ كەتتi. ءسويتىپ 5-6 رەت قايتالاندى.

اقىرى قويماي ءجۇرىپ سەمىز بىرەۋىن اتىپ الدىم. مۇز بولىپ قاتقان سۋدىڭ بەتىندە قالقىپ قانا تۇر ەكەن. الگىنى الامىن دەپ ەنتەلەي بەرگەن كەزدە مۇز ويىلىپ كەتىپ، سۋعا كۇمپ ەتە ءتۇستىم. سوندا دا مىلتىعىم سۋ بولىپ قالماسىنشى دەپ، ونى مۇزدىڭ بەتىنە قاراي لاقتىرىپ ۇلگەردىم. ءوزىم سول سۋدا تۇرعان بەتتە كيىمنىڭ ءبارىن شەشىپ، مۇزدىڭ ۇستىنە قاراي لاقتىردىم دا، ابدەن جەڭىلدەگەننەن كەيىن مۇزدىڭ بەتىنە قارعىپ شىقتىم. كيىمدەرىم قاتىپ قالىپتى. بۇتىمداعى كالسون مەن مۇزدىڭ بەتىندە تۇرعان كەرزى ەتىگىم عانا ساۋ ەكەن.

اۋىلعا دەيىن 18 شاقىرىم بولاتىن. كۇن 30 گرادۋستاي اياز. نە ىستەسەم ەكەن دەپ بىرەر مينۋتتاي اڭتارىلىپ تۇردىم دا، ەتىگىمدى كيىپ، مىلتىق پەن ۇيرەكتى الىپ مۇزدىڭ ۇستىمەن ۇيگە قاراي تۇرا جۇگىردىم. كەشكى سەگىزگە قاراي، ءۇش ساعاتتان كەيىن ۇيگە جەتتىم ەنتىگىپ. اكە-شەشەمدى شوشىتپايىنشى دەپ جولدان دوسىمنىڭ ۇيىنە سوعىپ، سونىڭ كيىمدەرىن كيىپ الدىم.

ۇيرەك الىپ كەلگەنىمدى كورگەن شەشەم قاتتى قۋاندى. جاڭا جىلدى ءبىز سول ۇيرەكتىڭ ەتىن اسىپ قارسى الدىق. وسى وقيعادان ۇلكەن ساباق الىپ، كەيىن ونى تالاي رەت ارا-اراسىندا ەسىمە ءتۇسىرىپ وتىردىم. ءبىر وقپەن بىردەن ەكى قويان اتىپ الۋعا ۇمتىلماي، ءبىر جولى ءبىر-اق جۇمىستى ءبىتىرىپ العانىڭ دۇرىس ەكەن. بiر ۋاقىتتا ەكi ۇدەرiستi جۇرگiزۋگە بولمايدى دەگەن ەرەجە شىعاردىم وزiمە. ەگەر ماعان بىرەۋ سول كەزدە ۇيرەكتى الىپ كەل دەپ ايتسا، مەن قازىر ءبارىن باسقاشا ىستەيتىن ەدىم. الدىمەن ارتىق كيىمنىڭ ءبارىن شەشىپ تاستاپ، سوسىن جاڭاعى ۇيرەكتى ءىلىپ الاتىن ءبىر بۇتاق سىندىرىپ الاتىن ەدىم دە، ءسويتىپ ۇيرەكتى دە الاتىن ەدىم، كيىمدەرىم دە قۇرعاق بولىپ قالاتىن ەدى. سودان بەرى مەن ءبىر جۇمىستى ەكى رەت ىستەمەس ءۇشىن الدىمەن جاقسىلاپ ويلانىپ الىپ، سوسىن بارىپ قانا ىسكە كىرىسەتىن بولدىم!

مارعۇلان سەيسەمبايدىڭ الەۋمەتتىك جەلىدەگى جازباسىنان

Abai.kz

2 پىكىر