سارسەنبى, 21 ءساۋىر 2021
1215 2 پىكىر 30 قاڭتار, 2020 ساعات 12:34

اپاتقا قايتىس بولعاندار جاۋاپ بەرمەيدى 

بۇگىن «اق جول» پارتياسىنىڭ توراعاسى، ءماجىلىس دەپۋتاتى ازات پەرۋاشەۆ ءماجىلىستىڭ جالپى وتىرىسىندا «Bek Air» اۋە كومپانياسىنا تيەسىلى ۇشاق اپاتىنا قاتىستى پرەمەر-مينيستر مەن باس پروكۋروردىڭ اتىنا دەپۋتاتتىق ساۋال جولدادى. 

«ۇشاق سىرتىنداعى مۇزدى ەرىتۋگە ارنالعان سۇيىقتىقتى ۇنەمدەدى دەگەن جەلەۋمەن تاعى دا قازا تاپقان ۇشقىشتاردى كىنالى ەتىپ شىعاراتىنداي كورىنەدى. ولاردىڭ باسىن بايگەگە تىگۋى – ەكەۋىنىڭ تاڭداۋى ەمەس. باقيلىق بولعاندار وزدەرىن قورعاي المايدى. بۇلاي ىستەۋلەرى دۇرىس پا؟»، - دەدى دەپۋتات ا.پەرۋاشەۆ.

«اق جول» فراكتسياسىنىڭ دەپۋتاتتارى تاسىمالداۋشى كومپانيا قازا تاپقانداردىڭ وتباسى مەن زارداپ شەككەندەرگە وتەماقى تولەمەگەندەرىن ايتتى. سونداي-اق، «Bek Air» قايعىلى وقيعادان كەيىن توقتاتىلعان اۋە رەيستەرىنە بيلەت العان جولاۋشىلاردىڭ اقشاسىن ءالى كۇنگە دەيىن قايتارماعان.

«زاڭدى وتەماقى تولەنبەگەن، زارداپ شەككەندەرگە قولداۋ شارالارى كورسەتىلمەگەن. «Bek Air» وكىلدەرى اۋرۋحاناعا بارىپ، جاراقات العان جانداردىڭ جاعدايىن بىلۋگە دە جارامادى. ءتىپتى، قازا تاپقانداردىڭ جەرلەۋ راسىمىندە دە بوي كورسەتپەدى. اۋە كومپانياسى قايعىلى وقيعاعا تىكەلەي قاتىستى جوقتاي، تەك باق ارقىلى كوڭىل ايتتى»، - دەدى دەپۋتات. 

ەسكە سالا كەتەيىك، وتكەن جىلدىڭ 27 جەلتوقسانىندا الماتى قالاسىنىڭ ماڭىندا «الماتى – نۇر-سۇلتان» باعىتىنداعى «Bek Air» كومپانياسىنا تيەسىلى Fokker 100 ۇشاعى اپاتقا ۇشىراپ، 12 ادام قازا تاۋىپ، 67 ادام ءتۇرلى جاراقاتپەن اۋرۋحاناعا ءتۇستى. 

Abai.kz

2 پىكىر