سارسەنبى, 21 ءساۋىر 2021
1328 0 پىكىر 30 قاڭتار, 2020 ساعات 12:03

اقتوبە سوتى ءۇش تۇرعىندى "سيرياعا ادام تارتتى" دەپ سوتتادى

28 قاڭتار كۇنى اقتوبە قالالىق سوتى تەرروريزم ايىبى تاعىلعان ەرسايىن قۇلىنتاي، باعداد بيسەمباەۆ پەن ءادىلجان داۋلەتوۆتىڭ ارقايسىن جەتى جىلعا باس بوستاندىعىنان ايىردى.

تەرگەۋ ماتەريالدارىنا قاراعاندا، 2019 جىلعى ناۋرىز ايىندا ەرسايىن قۇلىنتاي (1992 جىلى تۋعان), باعداد بيسەمباەۆ (1973) پەن ءادىلجان داۋلەتوۆ (1993) اقتوبەدەگى مونشالاردىڭ بىرىندە تەرروريزمدى ناسيحاتتاپ، سيرياعا بارۋعا ۇگىتتەگەن.

تەرگەۋ ماتەريالدارىندا ايىپتالۋشىلاردىڭ ءبىرى باعداد بيسەمباەۆتىڭ سيرياعا بارۋ ءۇشىن ارنايى مارشرۋت سىزىپ، شەكارادان وتەر كەزدە كۇشتىك قۇرىلىمداردىڭ قولىنا تۇسكەندىگى تۋرالى دا ايتىلادى. ال ءادىلجان داۋلەتوۆتى تەرگەۋ بەس ءتۇپ قاراسورانى (كونوپليا) كەپتىرىپ، ساقتادى دەپ تە ايىپتاعان.

14 قاڭتار كۇنگى سوت پروتسەسىندە ەرسايىن قۇلىنتاي وزىنە تاعىلعان تەرروريزم ايىبىن مويىنداپ، پروكۋراتۋرامەن پروتسەسسۋالدىق كەلىسىم جاساۋعا دايىن ەكەنىن ايتقان. ال باعداد بيسەمباەۆ پەن ءادىلجان داۋلەتوۆ 2019 جىلعى جەلتوقسان ايىندا وزدەرىنە تاعىلعان ايىپتى مويىنداپ، پروكۋراتۋرامەن پروتسەسسۋالدىق كەلىسىم جاساۋعا ءوتىنىش بەرگەن. بىراق پروكۋراتۋرا سوتتالۋشىلارمەن كەلىسىمگە كەلۋدەن باس تارتتى.

سوت ۇكىمىنە ساي، باعداد بيسەمباەۆ پەن ءادىلجان داۋلەتوۆ جازاسىن قاۋىپسىزدىگى ورتاشا، ال ەرسايىن قۇلىنتاي قاۋىپسىزدىگى كۇشەيتىلگەن تۇرمەدە وتەيدى.

سوت ۇكىمى ءالى كۇشىنە ەنگەن جوق. ايىپتالۋشىلاردىڭ اپەللياتسيالىق شاعىم تۇسىرۋگە قۇقىعى بار.

Abai.kz

0 پىكىر