سەنبى, 11 شىلدە 2020
COVID-19 قازاقستاندا. جۇقتىرعاندار — 56455. جازىلعاندار — 32500. قايتىس بولعاندار — 264
بيلىك 731 0 پىكىر 28 قاڭتار, 2020 ساعات 10:32

مەملەكەت باسشىسى ابۋ ءدابيدىڭ تاق مۇراگەرىمەن كەزدەستى

مەملەكەت باسشىسى قاسىم-جومارت توقاەۆ ابۋ ءدابيدىڭ تاق مۇراگەرى، شەيح مۇحاممەد بەن زايد ءال ناحايانمەن كەلىسسوز جۇرگىزدى.

قازاقستان پرەزيدەنتىن رەسمي قارسى الۋ ءراسىمى «ءال-ۋاتان» سارايىنىڭ الدىندا ءوتتى. قازاقستاننىڭ تۋى كوتەرىلىپ، ەكى مەملەكەتتىڭ ۇلتتىق ءانۇراندارى ورىندالدى.

قاسىم-جومارت توقاەۆ پەن شەيح مۇحاممەد زايد ءال ناحايان ءبىر-بىرىنە ءىلتيپات بىلدىرگەننەن كەيىن قۇرمەتتى قاراۋىل روتاسىن ارالاپ ءوتتى. ەكى ەلدىڭ رەسمي دەلەگاتسيا مۇشەلەرى تانىستىرىلعاننان كەيىن مەملەكەت  باسشىسى قۇرمەتتى قوناقتار كىتابىنا قولتاڭبا قالدىردى.

ءراسىم سوڭىندا قازاقستان پرەزيدەنتى مەن ابۋ ءدابيدىڭ تاق مۇراگەرى كەلىسسوز جۇرگىزدى. تاراپتار ەكىجاقتى قارىم-قاتىناستاردى جانداندىرۋعا، ەكونوميكالىق سەرىكتەستىكتى كەڭەيتۋگە باسا نازار اۋداردى.

– ءسىزدى بىرىككەن اراب امىرلىكتەرىندە كورگەنىمە قۋانىشتىمىن. امىرلىكتەر باسشىسىنىڭ اتىنان ءسىزدىڭ ساپارىڭىزعا تابىس تىلەيمىن. سونىمەن قاتار ءبىزدىڭ جاقىن دوسىمىز ەلباسى نۇرسۇلتان ءابىشۇلى نازارباەۆقا سالەم جولدايمىز. قازىرگى ۋاقىتتا ەلدەرىمىز اراسىنداعى ەكىجاقتى قاتىناستار جوعارى دەڭگەيدە دامىپ كەلەدى. ءباا قازاقستانمەن ءوزارا ىقپالداستىقتى نىعايتۋعا ەرەكشە كوڭىل بولەدى. مەملەكەتتەرىمىز اراسىنداعى ىنتىماقتاستىق جان-جاقتى دامۋدا، – دەپ اتاپ ءوتتى مۇحاممەد بەن زايد ءال ناحايان.

مەملەكەت باسشىسى شەيح مۇحاممەدكە قوناقجايلىق تانىتقانى ءۇشىن ريزاشىلىق ءبىلدىرىپ، قازاقستان پرەزيدەنتى رەتىندە وزىنىڭ اراب الەمىنە جاساعان العاشقى ساپارىن بىرىككەن اراب امىرلىكتەرىنەن باستاپ وتىرعانىن اتاپ ءوتتى.

– ەكى ەل اراسىنداعى قارىم-قاتىناستار تاريحىنىڭ تامىرى تەرەڭ. ءبىزدى شىنايى دوستىق، ءوزارا سەنىم مەن تۇسىنىستىك بايلانىستىرادى. سوندىقتان قارىم-قاتىناستارىمىزدىڭ كەلەشەگى زور. مەنىڭ ساپارىمنىڭ نەگىزگى ماقساتى – ەكى مەملەكەتتىڭ ىنتىماقتاستىعىنا تىڭ سەرپىن بەرۋ. ءبىز ۇلكەن جەتىستىكتەرگە قول جەتكىزدىك، بىراق ءبىر ورىندا توقتاپ قالۋعا بولمايدى. العا جىلجۋىمىز كەرەك. مەن وسى ساپارعا ەرەكشە ءمان بەرەمىن جانە ۇلكەن ۇمىتپەن قارايمىن، – دەدى قاسىم-جومارت توقاەۆ.

كەزدەسۋ بارىسىندا مۇناي-حيميا، اۋىل شارۋاشىلىعى، كولىك-لوگيستيكا، قارجى جانە ينۆەستيتسيا سالالارىنداعى ءوزارا ءىس-قيمىلدار مەن ىنتىماقتاستىق ماسەلەلەرى قاراستىرىلدى.

قاسىم-جومارت توقاەۆ ەكى مەملەكەتتىڭ دە ماڭىزدى تاريحي كەزەڭ الدىندا تۇرعانىن – كەلەسى جىلى امىرلىكتەردىڭ قۇرىلعانىنا 50 جىل، قازاقستاننىڭ تاۋەلسىزدىك العانىنا 30 جىل تولاتىنىن اتاپ ءوتتى.

كەزدەسۋ سوڭىندا تاراپتار قول قويىلعان قۇجاتتارمەن الماستى. قر ەنەرگەتيكا مينيسترلىگى مەن ءباا ەنەرگەتيكا جانە ونەركاسىپ مينيسترلىگى اراسىندا مۇناي-حيميا ونەركاسىبى سالاسىنداعى ءوزارا تۇسىنىستىك پەن ىنتىماقتاستىق تۋرالى مەموراندۋمعا،  قر ساۋدا جانە ينتەگراتسيا مينيسترلىگى مەن ءباا ەكونوميكا مينيسترلىگى اراسىنداعى ءوزارا تۇسىنىستىك تۋرالى مەموراندۋمعا، «استانا» حالىقارالىق قارجى ورتالىعىنىڭ قارجىلىق قىزمەت كورسەتۋدى رەتتەۋ جونىندەگى كوميتەتى مەن ءباا ورتالىق بانكى اراسىنداعى ءوزارا تۇسىنىستىك تۋرالى مەموراندۋمعا قول قويىلدى.

Abai.kz

0 پىكىر