بەيسەنبى, 28 ناۋرىز 2024
بيلىك 3012 1 پىكىر 16 قاڭتار, 2020 ساعات 10:33

مەملەكەت باسشىسى پرەزيدەنتتىك جاستار كادر رەزەرۆىنىڭ مۇشەلەرىمەن كەزدەستى

قاسىم-جومارت توقاەۆ «اقوردا» رەزيدەنتسياسىندا پرەزيدەنتتىك جاستار كادر رەزەرۆىنىڭ مۇشەلەرىمەن كەزدەسۋ وتكىزدى. كەزدەسۋگە رەزەرۆكە ەنگەن 300 ادام شاقىرىلدى.

مەملەكەت باسشىسى ءىس-شاراعا قاتىسۋشىلار الدىندا سويلەگەن سوزىندە پرەزيدەنتتىك كادر رەزەرۆىن قۇرۋ تۋرالى باستاما ءوزىنىڭ سايلاۋالدى باعدارلاماسىنداعى نەگىزگى باعىتتاردىڭ ءبىرى بولعانىن اتاپ ءوتتى.

– سىزدەردىڭ ارقايسىسىڭىز جوعارى كاسىبي بىلىكتىلىكتەرىڭىزدى كورسەتىپ، مەملەكەت يگىلىگى ءۇشىن ادال قىزمەت ەتۋگە نيەتتى ەكەندەرىڭىزدى دالەلدەدىڭىزدەر. سوندىقتان سىزدەرمەن كەزدەسىپ، ەلىمىزدەگى وزەكتى ماسەلەلەر بويىنشا پىكىرلەرىڭىزدى تىڭداپ، كادر رەزەرۆىنە ەنگەن ازاماتتاردىڭ الدىندا تۇرعان مىندەتتەر جونىندە ءوز ويىمدى ءبىلدىرۋ ءۇشىن بارشاڭىزدى «اقورداعا» ارنايى شاقىرىپ وتىرمىن، – دەدى قاسىم-جومارت توقاەۆ.

مەملەكەت باسشىسى تاۋەلسىزدىك جىلدارىندا تۇڭعىش پرەزيدەنت – ەلباسى نۇرسۇلتان نازارباەۆتىڭ باسشىلىعىمەن ەلىمىزدە مەملەكەتتىك باسقارۋدىڭ جۇيەسى قالىپتاسقانىن ايتتى. بۇل جۇيە تالاي قيىن كەزەڭدەردە ءوزىنىڭ تيىمدىلىگىن بىرنەشە رەت دالەلدەدى.

قازاقستان پرەزيدەنتى قازىرگى زامانعى سىن-قاتەرلەردى ەسكەرە وتىرىپ، مەملەكەتتىك اپپارات جۇمىسىنا جاڭا ادىستەردى ەنگىزۋ قاجەت دەپ سانايدى.

– بارلىق جاڭالىقتىڭ ورتاق ماقساتى – حالىققا جاقىن بولۋ. شىن مانىندە، ءبىز مەملەكەت قىزمەتىنىڭ سەرۆيستىك مودەلى جايىندا اڭگىمە قوزعاپ وتىرمىز. قازاقستانعا قوعامنىڭ تالاپ-تىلەگىنە دۇرىس، ءتيىمدى جانە ادىلەتتى جاۋاپ بەرەتىن مەملەكەتتىك باسقارۋدىڭ جاڭا ۇلگىسى كەرەك، – دەدى مەملەكەت باسشىسى.

قاسىم-جومارت توقاەۆ مەملەكەتتىك باسقارۋدى رەفورمالاۋ جايىندا ايتا كەلىپ، بيىلدان باستاپ مەملەكەتتىك قىزمەتشىلەردىڭ سانى بىرتىندەپ قىسقاراتىنىن، ۇنەمدەلگەن قاراجات ءتيىمدى جۇمىس ىستەيتىن قىزمەتكەرلەردى ماتەريالدىق تۇرعىدان ىنتالاندىرۋعا جۇمسالاتىنىن اتاپ ءوتتى.

– قازاقستان حالقىنا ارنالعان جولداۋدا ايتقانىمداي، 2024 جىلعا قاراي مەملەكەتتىك قىزمەتشىلەردىڭ، سونىمەن قاتار ۇلتتىق كومپانيالار قىزمەتكەرلەرىنىڭ سانىن 25 پايىزعا قىسقارتۋ كوزدەلىپ وتىر. ارينە، بۇل بىرجاقتى جاسالمايدى، ولاردىڭ اتقاراتىن قىزمەتىن قايتا قاراپ، ياعني، مەملەكەتتىك ورگانداردىڭ قىزمەتىنە جاتپايتىن مىندەتتەردى اۋتسورسينگ پەن ازاماتتىق قوعام وكىلدەرىنە جۇكتەي وتىرىپ قىسقارتامىز، – دەدى قازاقستان پرەزيدەنتى.

مەملەكەت باسشىسى ءوز بايانداماسىندا «حالىق ۇنىنە قۇلاق اساتىن مەملەكەت» تۇجىرىمداماسىنىڭ نەگىزگى ءۇش قاعيداتىنا، اتاپ ايتقاندا، اشىقتىق، ينكليۋزيۆتىلىك جانە ازاماتتاردىڭ سۇرانىستارىنا جەدەل جاۋاپ بەرۋ ماسەلەلەرىنە ەرەكشە نازار اۋداردى.

– قازاقستان ازاماتتارى شەنەۋنىكتەردى قوعامعا قاتىستى بارلىق شەشىمدەردى بيلىك دالىزدەرىندە قابىلدايتىن قانداي دا ءبىر تاڭداۋلى توپ رەتىندە قاراماۋى كەرەك. شەنەۋنىكتەر قولجەتىمدى بولۋى قاجەت. مەملەكەتتىك قىزمەتشى حالىقتىڭ ورتاسىندا حالىق ءۇشىن جۇمىس ىستەيتىن حالىقتىڭ ءبىر بولىگى دەۋدەن ەش جالىقپايمىن! – دەپ مالىمدەدى قاسىم-جومارت توقاەۆ.

مەملەكەت باسشىسى پرەزيدەنتتىك كادر رەزەرۆىنىڭ ءاربىر مۇشەسىنەن ەلدى دامىتۋعا تىڭ سەرپىن بەرەتىن جاڭا يدەيا مەن ناتيجەلى جۇمىس كۇتەتىنىن جەتكىزدى.

– الداعى ۋاقىتتا سىزدەردى مەملەكەتتىك ورگاندار مەن ۇلتتىق كومپانيالارعا جاۋاپتى قىزمەتكە جىبەرەمىز. قازىردىڭ وزىندە رەزەرۆكە وتكەن ەلۋ بەس ازامات جاڭا قىزمەتكە تاعايىندالدى، – دەدى پرەزيدەنت.

قاسىم-جومارت توقاەۆ بيىل رەزەرۆتەگى 100 ادامدى جاۋاپتى قىزمەتكە تاعايىنداۋدى، الداعى جىلداردا كادرلىق رەزەرۆتىڭ الەۋەتىن تولىق پايدالانۋدى جوسپارلاپ وتىرعانىن ايتتى.

قازاقستان پرەزيدەنتى ەلىمىزدە جۇرگىزىلەتىن اۋقىمدى ترانسفورماتسيالار ناقتى سالالارداعى، وڭىرلەردەگى، قالالار مەن اۋىلدارداعى كىشكەنتاي وزگەرىستەردەن باستالاتىنىن اتاپ ءوتىپ، جاستاردى اتقاراتىن قىزمەتىنە قاراماي مەملەكەتتى جاڭعىرتۋ پروتسەسىنە ءوز ۇلەستەرىن قوسۋعا شاقىردى.

– بۇگىنگى جاس بۋىننىڭ، ونىڭ ىشىندە سىزدەر دە بيلىككە كەلەتىن ۋاقىت الىس ەمەس. سىزدەر مەملەكەتتى باسقارۋ تىزگىنىن الۋعا دايىن بولىپ، ءتيىستى ءبىلىم مەن بىلىكتى مەڭگەرۋلەرىڭىز قاجەت. جاستارىمىز ەل دامۋىنىڭ جاڭا تاريحي كەزەڭىنە دايىن بولۋى كەرەك. ءبىلىم مەن بىلىك مەنمەندىكتەن بيىك تۇرۋى ءتيىس، – دەدى مەملەكەت باسشىسى.

قاسىم-جومارت توقاەۆ ءسوزىن ەلىمىزدىڭ بارلىق جاستارىنا ارناي وتىرىپ، جاڭارۋ ۇدەرىسى ءوزىنىڭ ىشكى ساياساتتاعى باسىم باعىتتارىنىڭ ءبىرى ەكەنىن ايتتى.

– كادر رەزەرۆىن جاساقتاۋ جۇمىستارى مۇنىمەن توقتاپ قالمايدى، جالعاسا بەرەدى. ونىڭ قاتارىنا ىنتالى جانە لايىقتى جاستار كىرەدى، – دەدى پرەزيدەنت.

كەزدەسۋ سوڭىندا مەملەكەت باسشىسى كادر رەزەرۆىنە كىرگەن جاستاردىڭ وزدەرىنە جۇكتەلگەن مىندەتتەردى لايىقتى اتقاراتىنىنا سەنىمدى ەكەنىن تاعى دا قايتالاپ ايتتى.

شارا بارىسىندا مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا، پرەزيدەنتتىك جاستار كادر رەزەرۆىنىڭ مۇشەلەرى – «استانا» حالىقارالىق قارجى ورتالىعى بيرجاسىنىڭ قارجى ديرەكتورى رەنات بەكتۇروۆ، جاپونيانىڭ ۇلتتىق ساياسي زەرتتەۋلەر ينستيتۋتىنىڭ دوكتورانتى ءزۇلفيا سۇلەيمەنوۆا، «Eurasia Blockchain Fintech Group Limited» كومپانياسىنىڭ باس ديرەكتورى تىلەكتەس ادامبەكوۆ، «وسكەمەن قالالىق ءبىلىم ءبولىمى» مەملەكەتتىك مەكەمەسى قامقورشىلىق جانە قورعانشىلىق ورگانى، بالالاردىڭ قۇقىقتارىن قورعاۋ سەكتورىنىڭ مەڭگەرۋشىسى يۋليا وۆەچكينا جانە «BTS Digital» جشس ءبىلىم بەرۋ ورتالىعىنىڭ كونسۋلتانتى ولجاس ساكەنوۆ ءسوز سويلەدى.

قاسىم-جومارت توقاەۆتىڭ سويلەگەن ءسوزىنىڭ تولىق نۇسقاسىمەن مىنا سىلتەمە ارقىلى تانىسا الاسىزدار.

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530