مەملەكەت باسشىسى دانيال احمەتوۆتى قابىلدادى
پرەزيدەنت قاسىم-جومارت توقاەۆ شىعىس قازاقستان وبلىسىنىڭ اكىمى دانيال احمەتوۆتى قابىلدادى.
وبلىس اكىمى مەملەكەت باسشىسىنا ايماقتىڭ 2019 جىلعى الەۋمەتتىك-ەكونوميكالىق دامۋ قورىتىندىلارى، سونداي-اق ءوڭىردىڭ الەۋەتىن ودان ءارى نىعايتۋ جونىندەگى جوسپارى تۋرالى باياندادى.
دانيال احمەتوۆتىڭ ايتۋىنشا، شىعىس قازاقستان وبلىسىندا ينۆەستيتسيا كولەمى ارتقان، ونەركاسىپ جانە اۋىل شارۋاشىلىعى ءوندىرىسىنىڭ ءوسۋى بايقالادى.
وبلىس اكىمى پرەزيدەنتكە اتاۋلى الەۋمەتتىك كومەك بەرۋدىڭ جاڭا فورماتىن ىسكە اسىرۋ بارىسى جايىندا مالىمەت بەردى. قاسىم-جومارت توقاەۆ وبلىستا تۇراتىن ءاربىر از قامتىلعان وتباسىنىڭ جاعدايىنا مۇقيات تالداۋ جاساپ، ولارعا كومەك كورسەتۋ جونىندە ءتيىستى شارالار قابىلداۋدى تاپسىردى. كوپ بالالى وتباسىلارعا قاتىستى دا وسىنداي تاپسىرما بەرىلدى.
سونىمەن قاتار دانيال احمەتوۆ مەملەكەت باسشىسىنا وسى جىلدىڭ ەكىنشى جارتىجىلدىعىندا بۇقتىرما سۋ قويماسى ارقىلى وتەتىن كوپىردىڭ قۇرىلىسى باستالاتىنىن حابارلادى. پرەزيدەنت بۇل نىساننىڭ الەۋمەتتىك تۇرعىدان اسا ماڭىزدى ەكەنىن اتاپ ءوتىپ، كوپىر قۇرىلىسى ايماق حالقىنىڭ ەداۋىر بولىگىن جول تاۋقىمەتىنەن ارىلتاتىنىن ايتتى.
قاسىم-جومارت توقاەۆ دانيال احمەتوۆكە ابايدىڭ 175 جىلدىعىن وتكىزۋگە، سونىڭ ىشىندە، جيدەبايداعى مۇراجاي مەن قوناق ءۇي كەشەنىنىڭ قۇرىلىسىنا قاتىستى بىرقاتار ناقتى تاپسىرما بەردى.
مەملەكەت باسشىسى اكىمنىڭ ءوڭىردى الەۋمەتتىك-ەكونوميكالىق دامىتۋ جونىندەگى جۇمىسىنا وڭ باعا بەرىپ، شىعىس قازاقستان وبلىسىنىڭ عىلىم-ءبىلىم جانە مەديتسينالىق الەۋەتىن ارتتىرۋعا باعىتتالعان باستامالارىن اتاپ ءوتتى.
Abai.kz
