قازاقستاننىڭ مەملەكەت جانە قوعام قايراتكەرى، قازاقستان جوعارعى كەڭەسىنىڭ بۇرىنعى توراعاسى، وپپوزيتسيالىق ساياساتكەر، عالىم سەرىكبولسىن ءابدىلدين 82 جاسىندا الماتىدا قايتىس بولدى.

سەرىكبولسىن اقساقال 31 جەلتوقسان كۇنى ساعات 23:00-تەن وتە الماتى اۋرۋحاناسىندا قايتىس بولعان. مارقۇممەن قوشتاسۋ ءراسىمى 3 قاڭتار كۇنى تاڭەرتەڭگى ساعات 10:00-دا الماتىداعى عالىمدار ۇيىندە وتەدى.

مەملەكەت باسشىسى قاسىم-جومارت كەمەلۇلى توقاەۆ سەرىكبولسىن ءابدىلديننىڭ وتباسىنا كوڭىل ايتتى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي مالىمدەدى.

- بەلگىلى قوعام قايراتكەرى جəنە عالىم سەرىكبولسىن ءƏبدىلديننىڭ قايتىس بولۋىنا بايلانىستى ورنى تولماس قايعىلارىڭىزعا ورتاقتاسىپ، كوڭىل ايتامىن.

سەرىكبولسىن ءƏبدىلدəۇلى - ەلىمىزدى دامىتۋ جəنە پارلامەنتاريزمدى قالىپتاستىرۋ ىسىندە وزىندىك قولتاڭباسىن قالدىرعان تۇلعا.

مارقۇمنىڭ توپىراعى تورقا، جانى جاناتتا، يمانى سالامات بولسىن!- دەپ جازىلعان جەدەلحاتتا.

ال قايعىلى حابارمەن بولىسكەن جۋرناليست ەرمۇرات باپي مارقۇمنىڭ الاشتىڭ ارداقتى ازاماتى ەكەنىن ەسكە الدى.

- قازاقستان دەموكراتيالىق قوزعالىسىنىڭ پايعامبارى سەرىكبولسىن اعا ء(ابدىلدين) ومىردەن ءوتتى دەگەن سۋىق حابار كەلدى... بيلىككە يىلمەي وتكەن قايسار، قايتپاس ادام ەدى، - دەپ جازدى ەرمۇرات باپي Facebook جەلىسىندەگى جەكە پاراقشاسىندا.

قوعام قايراتكەرى، ەكونوميكا عىلىمدارىنىڭ دوكتورى، پروفەسسورى سەرىكبولسىن ءابدىلداۇلى ءابدىلدين 1937 جىلى شىعىس قازاقستان وبلىسى، تارباعاتاي اۋدانىندا دۇنيەگە كەلگەن. 1982 – 1985 ج. قازاق كسر اۋىل شارۋاشىلىعى ءمينيسترىنىڭ ءبىرىنشى ورىنباسارى، 1985 جىلى اوك-ءنى باسقارۋ جونىندەگى رەسپۋبليكالىق جوعارى مەكتەپ رەكتورى، 1986 – 1987 جىلى قازاقستان اۋىل شارۋاشىلىعى ءمينيسترى، 1990-1995 جىلى قازاق كسر جوعارى كەڭەسىنىڭ توراعاسى قىزمەتتەرىن اتقاردى. 1995 جىلدان باستاپ ءومىرىنىڭ سوڭىنا دەيىن وپپوزيتسيا قۇرامىندا بولعان.

Abai.kz