جۇما, 5 ماۋسىم 2020
COVID-19 قازاقستاندا. جۇقتىرعاندار — 12312. جازىلعاندار — 6606. قايتىس بولعاندار — 52
ادەبيەت 2560 22 پىكىر 31 جەلتوقسان, 2019 ساعات 14:59

ادەبيەت الەمىندە اتقارىلعان ايتۋلى شارالار

بيىل ۇلت رۋحانياتىنىڭ قارا شاڭىراعىندا اۋقىمدى جۇمىستار اتقارىلدى. وقىرمان قاۋىمنىڭ نازارىنا وسى جىلى ادەبيەت الەمىندە بولعان ءىرى وقيعالاردىڭ تىزبەگىن قىسقاشا ۇسىنىپ وتىرمىز.

قازاق ادەبيەتى 6 تىلگە اۋدارىلدى

2019 جىلدىڭ 18 ساۋىرىندە «جاھانداعى زاماناۋي قازاقستاندىق مادەنيەت» جوباسى اياسىندا بۇۇ-نىڭ التى تىلىنە اۋدارىلعان قازىرگى قازاق ادەبيەتى انتولوگيالارىنىڭ ءسۇيىنشى دانالارى باسىلىپ شىعىپ،تانىستىرىلىمى ءوتتى.

«60 قازاقستاندىق اۆتوردىڭ تاڭدامالى شىعارمالارى ءبىر مەزەتتە الەمنىڭ ەڭ ءىرى 6 تىلىنە اۋدارىلىپ، سول تىلدەردە جۇمىس ىستەيتىن ەڭ بەدەلدى باسپالاردان شىعىپ، 5 قۇرلىقتاعى 90-نان اسا ەلدىڭ جوعارى وقۋ ورىندارىنا، كىتاپحانالارى مەن عىلىمي ورتالىقتارىنا جەتەدى. جالپى سانى 2 ميلليارد 600 ميلليون حالىق قازىرگى قازاق ادەبيەتىنىڭ جاۋھارلارىمەن تانىسۋعا مۇمكىندىك الادى»، – دەدى باسقوسۋدا «رۋحاني جاڭعىرۋ» باعدارلاماسىن جۇزەگە اسىرۋ جونىندەگى ۇلتتىق كوميسسيا حاتشىسى ايدا بالاەۆا.

پرەزيدەنت جازۋشىلار وداعىنىڭ توراعاسىن قابىلدادى

31 مامىردا مەملەكەت باسشىسى قاسىم-جومارت توقاەۆ قازاقستان جازۋشىلار وداعى باسقارماسىنىڭ توراعاسى ۇلىقبەك ەسداۋلەتتى قابىلدادى.

قازاقستان پرەزيدەنتىنە ادەبيەت­تىڭ قازىرگى جاعدايى مەن دامۋى، جازۋشىلار ودا­عىنىڭ اتقارعان جۇمىستارى جانە الداعى جوسپارى جونىندە مالىمەت بەرىلدى. قاسىم-جومارت توقاەۆ ۇلتتىق رۋحاني الەۋەتتى ىلگەرىلەتۋ ىسىندە اقىن-جازۋشىلار قاۋىمى ماڭىزدى ءرول اتقاراتىنىن اتاپ ءوتىپ، جازۋشىلار وداعىنىڭ جۇمىستارىنا جوعارى باعا بەرىپ، قالامگەرلەرگە شىعارماشىلىق تابىس تىلەدى.

ەۋرازيا جازۋشىلارى باس قوستى

4 شىلدە كۇنى نۇر-سۇلتان قالاسىندا ەۋرازيا استانالارىنىڭ حالىقارالىق فورۋمى ءوتتى. وعان ەۋرازيا كەڭىستىگىنىڭ ونشاقتى ەلىنەن بەلگىلى قالامگەرلەر قاتىستى.

قازاقستان جازۋشىلار وداعىنىڭ توراعاسى، اقىن ۇلىقبەك ەسداۋلەت فورۋم اياسىندا جۋرناليستەرگە:

«فورۋم نۇر-سۇلتان قالاسىنىڭ اكىمدىگى مەن جازۋشىلار وداعىنىڭ قالالىق فيليالىنىڭ مۇرىندىق بولۋىمەن ءوتىپ جاتىر. ماقساتىمىز  – ءوز قازانىمىزدا قايناي بەرمەي، ادەبيەتكە جاڭا ارنا اشۋ، قازاق ادەبيەتىن الەمگە ناسيحاتتاۋ، ەلىمىزدىڭ حالىقارالىق ارەناداعى ءيميدجىن كوتەرۋگە اتسالىسۋ. وسى فورۋمدى جىل سايىن وتەتىن ءداستۇرلى شاراعا اينالدىرساق دەگەن ويىمىز بار»، – دەپ پىكىر ءبىلدىردى.

ازيا قالامگەرلەرىنىڭ تۇڭعىش فورۋمى

4 قىركۇيەك كۇنى ەلوردادا قازاقستان جازۋشىلار وداعى قر پرەزيدەنتى اكىمشىلىگى مەن قر مادەنيەت جانە سپورت مينيسترلىگىنىڭ قولداۋىمەن «ازيا ەلدەرى قالامگەرلەرىنىڭ I فورۋمى» ءوتتى. فورۋمنىڭ اشىلۋ سالتاناتىندا ءسوز سويلەگەن قر پرەزيدەنتى ق.توقاەۆ بۇل ماڭىزدى شارا شىعارماشىلىق قاۋىمنىڭ ديالوگ الاڭىنا اينالۋى كەرەكتىگىن ايتتى. جيىنعا 38 ەلدەن جانە ەلىمىزدىڭ تۇكپىر-تۇكپىرىنەن كەلگەن قالامگەرلەر قاتىستى.

«ازيا قالامگەرلەرى فورۋمى شىعار­ما­شىلىق قاۋىمنىڭ ماڭىزدى ديالوگ الاڭىنا اينالۋى كەرەك. بۇل ماڭىزدى شارا ازيا ەلدەرىندە قۋاتتى تۇردە ءوتۋى قاجەت دەپ سانايمىن. ادامزاتتى تولعاندىرعان كۇردەلى ماسەلەلەر ءدال وسىنداي الاڭداردا ورتاعا سالىنۋى ءتيىس. ازيانى بۇكىل الەمدىك رۋحاني دامۋ ورتالىعى رەتىندە دامىتۋ ايرىقشا ماڭىزدى. سوندىقتان  ادەبي ۇدەرىستەردى جاڭعىرتۋ ءۇشىن جاعداي جاساۋ باستى مىندەتتەردىڭ ءبىرى. وسى ماقساتپەن «ازيا الىبى» ادەبي سىيلىعىن تاعايىنداعان ءجون. الەمدەگى ايگىلى سىيلىقتار سەكىلدى بۇل ماراپاتتىڭ دا بەدەلىن ارتتىرۋعا كۇش سالۋىمىز كەرەك»، – دەدى قر پرەزيدەنتى قاسىم-جومارت توقاەۆ.

ابەڭ «قازاقستاننىڭ ەڭبەك ەرى»

26 قازان كۇنى پرەزيدەنت قاسىم-جومارت توقاەۆتىڭ جارلىعى بويىنشا حالىق جازۋشىسى ءابدىجاميل نۇرپەيىسوۆ «قازاقستاننىڭ ەڭبەك ەرى» اتاندى.

الەمگە تانىمال جازۋشى بيىل 95 جاسقا كەلدى. «قان مەن تەر»، «كۋرلانديا»، «سوڭعى پارىز» سىندى كەسەك تۋىندىلاردىڭ اۆتورى.

ىرگەلى ۇيىمنىڭ 85 جىلدىعى اتالىپ ءوتتى

9 جەلتوقسان كۇنى الماتىدا قازاقستان جازۋشىلار وداعى مەن «قازاق ادەبيەتىنىڭ» 85 جىلدىق مەرەيتويى اتالىپ ءوتتى. جيىنعا قالامگەرلەر قاۋىمىمەن قاتار، قر مەملەكەتتتىك حاتشىسى قىرىمبەك كوشەرباەۆ، الماتى قالاسىنىڭ اكىمى باقىتجان ساعىنتاەۆ قاتىسىپ، ءسوز سويلەدى.

«بۇگىن ۇلت رۋحانياتىنىڭ، قازاق ءسوز ونەرىنىڭ مەرەيلى بەلەسىنە ارنالعان مازمۇندى ءارى مارتەبەلى كەشتە باس قوسىپ وتىرمىز. ۇلتقا ۇران تاستالعان كەزدە الدىمەن ءۇن قوسىپ، ونەگەلى ءىستى ورگە سۇيرەپ ءىلىپ اكەتۋ قالام ۇستاعان قايراتكەرلەر قالىپتاستىرعان يگى ءداستۇر. سوندىقتان قازاق ەلى قاشاندا جازۋشىلار قاۋىمىن جانىنا سۇيەۋ، رۋحىنا تىرەۋ سانايدى. ەجەلدەن ءسوز ونەرىن كيە تۇتقان، اسىل ءسوزدى اردىڭ ءىسى ساناعان حالقىمىز وتكەن عاسىر باسىندا ءبىر تىلەككە ۇيىسقان اقىن-جازۋشىلارعا ءدال وسىلاي ءۇمىت ارتقان بولاتىن. 85 جىلدىق تاريحىندا ءسوز زەرگەرلەرى سول ءۇمىتتى حالىق قامى مەن ەل سەنىمىنىڭ تەمىرقازىعىنا اينالدىرا ءبىلدى»، – دەدى ءوز سوزىندە ق. كوشەرباەۆ.

Abai.kz

22 پىكىر