سەنبى, 30 مامىر 2020
COVID-19 قازاقستاندا. جۇقتىرعاندار — 10382. جازىلعاندار — 5057. قايتىس بولعاندار — 37
اراشا 2878 12 پىكىر 30 جەلتوقسان, 2019 ساعات 16:39

ۇستازداردىڭ جاقسى ءىسىن جوققا شىعارۋ كىمگە كەرەك؟

ۆيدەودان سكرينشوت

جاقىندا عانا سەناتتا «پەداگوگ مارتەبەسى تۋرالى» زاڭ جوباسى ماقۇلدانىپ، مۇعالىم قۇقىعىن زاڭ بويىنشا قورعايتىنىمىز ايتىلدى. بىراق ۇستازدار مويىنىنا اكىمشىلىك تاراپىنان عانا ەمەس، حالىق تاراپىنان دا ارتىلعان مىڭ-سان مىندەت جۋىق ارادا جەڭىلدەي قويمايتىن سەكىلدى.

مۇعالىمدەردى اكىمشىلىك ءارتۇرلى جۇمىستارعا جەگىپ اۋرەلەسە، قاراپايىم حالىق ۇستازداردىڭ ءار قادامىن اڭدىپ، قىسىمعا الىپ وتىر. سودان بارىپ ءبىلىم سالاسىنداعى كەز-كەلگەن داۋ-دامايعا تەك مۇعالىمدەر عانا كىنالى بولاتىن جاعداي قالىپتاستى. مۇعالىمدەر بالانى وقىتۋ كەرەك، بالانىڭ اماندىعانا كەپىلدىك ەتۋى كەرەك، مىڭ ءتۇرلى كۇندەلىك-جۋرنالدار تولتىرۋ كەرەك، ونىڭ سىرتىندا بيلىكتىڭ ۇگىتشىسى بولۋ مىندەتى تاعى بار. سويتە تۇرا، وسىنشا جۇمىس اتقارىپ ءجۇرىپ تاپقان جالاقىلارىنا مەرەكە-مەيرامدا كىشىگىرىم وتىرىس جاساسا دا كىنالى بولادى...

بيىل الماتى قالاسى جەتىسۋ اۋدانى وقۋ بولىمىنە قارايتىن مەكتەپتەر مەن بالاباقشالاردىڭ ديرەكتورلارى جاڭا جىلدى تويلاۋدان باس تارتىپ، ۇنەمدەلگەن قارجىعا وتباسىندا قيىنشىلىعى بار بالالارعا كومەك جاسادى. اتالعان ءبىلىم ءبولىمىنىڭ قۇرامىنداعى 21 مەكتەپ پەن 22 بالاباقشانىڭ باسشىلارى بۇل يگىلىكتى ىستەرىن رەسپۋبليكاداعى وزگە دە قىزمەتكەرلەردىڭ قولداۋىن سۇراپ، ۆيدەوۇندەۋ جاريالايدى. ناتيجەسىندە بۇل چەللەندج ۇلكەن قولداۋ تاۋىپ، القاۋعا بولەنەدى.

ەرەكشە ايتا كەتەرلىگى، بۇل قايىرىمدىلىق شاراسىنا تەك ديرەكتورلار عانا قاتىسادى. ال قاراپايىم مۇعالىمدەر مەن تاربيەشىلەردىڭ بۇعان قاتىسى جوق. ولار مەرەكە تويلاي ما، قايىرىمدىلىق جاساي ما - ءوز ەرىكتەرى.

ءسويتىپ، ۆيدەوۇندەۋ جاريالانادى، ونى Qazaqstan تەلەارناسى ەفيردە كورسەتەدى. كەيىن الماتى قالاسى، جەتىسۋ اۋدانى ءبىلىم بولىمىنە قاراستى № 143 مەكتەپتىڭ ديرەكتورى ساۋرىقوۆا مەكتەپ ۇجىمىمەن بىرگە جاڭا جىلدىق وتىرىسقا قاتىسادى. وندا دا ۇجىمدى قۇتتىقتاپ قانا قايتادى. ساۋرىقوۆا حانىم - قايىرىمدىلىق شاراسىنا قاتىسىپ، بەلگىلەنگەن قارجىسىن قوسقان ادام. ال ودان كەيىن ونىڭ ءوز ۇجىمىن قۇتتىقتاپ، مەرەكەلىك كەشكە بارۋعا ابدەن قۇقىعى بار.

بىراق، وسىنى الدەكىمدەر الەۋمەتتىك جەلىدە جاريالاپ، "بۇلار كوزبوياۋشىلىق جاسادى. "مەرەكەنى تويلامايمىز" دەپ الىپ، سوزدەرىندە تۇرمادى. قارجىنى تويلاۋعا شاشتى" دەگەندەي ءسوز تاراتىپ، شۋ شىعارعان. ءىستىڭ اق-قاراسىمەن تانىسپاعان كوپشىلىك جەل سوزگە ەرىپ، اقەدىل ۇستازداردىڭ جاقسى ءىسىن جوققا شىعارىپ، ەش نەگىزسىز سىناپ-مىنەگەن.

بۇل جەردە مەكتەپ باسشىلارى جاڭا جىلدى تويلاۋدان ءوز ەرىكتەرىمەن باس تارتتى، قايىرىمدىلىققا جۇمسالعان قارجىنى ءوز جالاقىلارىنان شىعاردى. وتە يگىلىكتى، ماقتاۋعا تۇرالىق ءىس. ال وزگە ۇستازدارعا مۇنداي شەكتەۋ جوق. قاراپايىم ۇستازدار مەن تاربيەشىلەر تۋىستارىمەن، ۇجىممەن مەرەكەنى اتاپ وتسە، وعان ەشكىم قوي دەمەيدى. ءتىپتى مەرەكەدەن باس تارتىپ، قايىرىمدىلىق جاساۋعا ۇستازدار قاۋىمى مىندەتتى دە ەمەس. تىنباي جۇمىس ىستەپ، تاۋىپ وتىرعان جالاقىسىن قايدا جۇمساسا دا وزدەرى بىلەدى. سوعان قاراماستان بۋىنسىز جەردەن پىشاق ۇرىپ، ۇستازداردى كىنالاۋ ادامشىلىققا جاتپايتىن ارەكەت ەكەنىن ايتقىمىز كەلەدى.

ءبىز ءىستىڭ ءمان-جايىن ءبىلۋ ءۇشىن اتالعان ءبىلىم ءبولىمىنىڭ باسشىسى سالتانات امانگەلدىقىزىنا حابارلاستىق.

سالتانات امانگەلدىقىزى، الماتى قالاسى، جەتىسۋ اۋدانى ءبىلىم ءبولىمىنىڭ باسشىسى:

- ءبىزدىڭ ءبىلىم بولىمىنە 21 مەكتەپ پەن 22 بالاباقشا قارايدى. ءبىز اقىلداسىپ، ءوز اۋدانىمىزداعى مەكتەپ باسشىلارى مەن بالاباقشا مەڭگەرۋشىلەرى مەرەكەلىك وتىرىستان باس تارتتىق. بۇنداي مەرەكەلىك باس قوسۋعا ءوز قالتامىزدان اقشا شىعاراتىنىمىز انىق. سول وتىرىستى ۇيىمداستىرماي، اقشامىزدى جيناپ، قيىنشىلىعى بار بالالارعا كومەكتەسۋ قاجەت دەپ شەشتىك. بۇل شەشىم تەك ديرەكتورلارعا عانا بايلانىستى. اۋدانىمىزداعى ەكى مىڭنان اسا مۇعالىمدى مەرەكەنى تويلاماي، قايىرىمدىلىق جاساڭدار دەپ ماجبۇرلەي المايمىز. ول - ۇستازداردىڭ ءوز ەركىندەگى شارۋا.

ءسويتىپ، 43 مەكەمەنىڭ باسشىسى بىرىگىپ، دەمەۋشىلەردى قوسا ەسەپتەگەندە جەتى ءجۇز مىڭنان اسا قارجى جيناپ، 22 بالانىڭ وتباسىنا كومەكتەستىك. كەيىن ۆيدەوۇندەۋ جاساپ، ەلىمىزدىڭ ءار تۇكپىرىندەگى ارىپتەستەرىمىزدى ءبىزدىڭ قادامدى قولداۋعا شاقىردىق. ءبىز جولداعان چەللەندج كەڭ تارالىپ كەتتى.

ال شۋ شاعارعان جاعداي مىناۋ: ءبىز قايىرىمدىلىق جاسادىق، چەللەندج جولداندى. كەيىن ماعان № 143 مەكتەپ ديرەكتورىنىڭ مىندەتىن اتقارۋشى ساۋرىقوۆا عازيزا كەلىپ، مەكتەپ ۇجىمى جاڭا جىلدىق باس قوسۋ ۇيىمداستىرىپ جاتقانىن ايتىپ، سوعان بارىپ، قۇتتىقاپ قايتۋعا رۇقسات سۇرادى. ال مەن ۇستازداردى مەرەكەلىك باس قوسۋدان تيۋعا قاقىم جوق ەكەنىن، مەكتەپ ۇجىمىنىڭ وتىرىسىن شەكتەمەيتىنىمدى ايتتىم.

سومەن عازيزا حانىم ۇجىمداستارىنىڭ باس قوسۋىنا بارىپ، قۇتتىقتايدى. وسىنى بىرەۋلەر ۆيدەوعا جازىپ الىپ، الەۋمەتتىك جەلىدە تاراتىپ جاتىر. بىرىنشىدەن، ءبىز جالپى مۇعالىمدەردى مەرەكەلىك كەشتەن شەكتەگەن جوقپىز. تەك ديرەكتورلار مەن مەڭگەرۋشىلەر عانا جاڭا جىلدىق كەشتەن باس تارتتى. ەكىنشىدەن، № 143 مەكتەپ ديرەكتورىنىڭ مىندەتىن اتقارۋشى ساۋرىقوۆا عازيزا قايىرىمدىلىق شاراسىنا قاتىستى، قارجىسىن قوستى. كەيىن الدىن-الا بەلگىلەنگەن ۇجىمداستار باس قوسۋىنا بارىپ شىقتى. نەگىزى وسى وتىرىسقا بارماي-اق تا قويۋ كەرەك ەدى. بىراق، ءبىز، ۆيدەوۇندەۋ جاريالاعان 43 باسشى، باس قوسىپ وتىرساق ءبىر ءجون. بۇل جەردە مۇلدە بولەك اڭگىمە. وتىرىس جاساعان ءبىز ەمەس، ءبىر مەكتەپتىڭ ۇجىمى عانا...

ونىڭ ۇستىنە، ءبىز قايىرىمدىلىقتى ءوز قالتامىزدان شىعارعان اقشاعا جاسادىق. مەملەكەتتىك قازىنادان اقشا الىپ وتىرعان جوقپىز. بۇنداي قايىرىمدىلىق شارالارىن ءۇش جىلدان بەرى جاساپ ءجۇرمىز. ەشكىمگە ايتىپ، جاريالاپ تا جاتقان جوق ەدىك. ەندى وسى يگى ىستەرىمىزدىڭ ءبارىن جوققا شىعارىپ، نەگىزسىز كىنالاپ وتىر.

P.S. راسىندا، بۇل رەتتە مەكتەپ ديرەكتورلارى مەن بالاباقشا مەڭگەرۋشىلەرىنىڭ قايىرىمدىلىققا قادام باسقان قارەكەتىن جوققا شىعارىپ، ءبىلىم ءبولىمىنىڭ يگىلىكتى ءىسىن مانسۇقتاۋ نەگە كەرەك بولدى؟ سوندا الەمجەلىدە اركىم ولارعا الىمجەتتىك جاساي بەرۋى كەرەك پە؟ ۇستازداردى ۇلتاراق ەتۋدى قاشان قويامىز؟ ءبىزدىڭ پورتال بۇل تاقىرىپتى الداعى كۇندەرى تاعى دا قاۋزايتىن بولادى.

قۋانىش قاپپاس

Abai.kz

12 پىكىر