سارسەنبى, 1 ءساۋىر 2020
الەۋمەت 2626 19 پىكىر 30 جەلتوقسان, 2019 ساعات 09:45

قانداستارىڭىزدى باسپاناسىز تاستاماڭىز...

قازاقستان  رەسپۋبليكاسىنىڭ
پرەزيدەنتى ق.ك.توقاەۆقا

اسا قۇرمەتتى قاسىم-جومارت كەمەلۇلى!

قولدانىستاعى «تۇرعىن ءۇي قاتىناستارى تۋرالى» قازاقستان رەسپۋبليكاسىنىڭ 1997 جىلعى 16 ساۋiردەگi N94 زاڭىنىڭ 68-بابىندا «حالىقتىڭ الەۋمەتتiك جاعىنان وسال توپتارىنا جاتاتىن ازاماتتاردىڭ» تىزبەسى كورسەتىلگەن. سونىڭ جەتىنشىسى – ورالماندار;

ال، 74-بابىنىڭ 2 تارماعىندا «اۋداننىڭ، وبلىستىق ماڭىزى بار قالانىڭ، رەسپۋبليكالىق ماڭىزى بار قالانىڭ، استانانىڭ جەرگىلىكتى اتقارۋشى ورگاندارى كوممۋنالدىق تۇرعىن ءۇي قورىنان تۇرعىنجايعا نەمەسە جەكە تۇرعىن ءۇي قورىنان جەرگىلىكتى اتقارۋشى ورگان جالداعان تۇرعىنجايعا مۇقتاج مىناداي ادامدار ەسەبىنىڭ بولەك تىزىمدەرىن جۇرگىزەدى:» دەي كەلىپ، سول باپتىڭ 4) تارماقشاسىندا «وسى زاڭنىڭ 68-بابىنىڭ 1-1) – 5), 7), 8), 10) جانە 11) تارماقشالارىندا اتالعان حالىقتىڭ الەۋمەتتىك جاعىنان ءالسىز توپتارى;» دەپ جازىلعان.

دەمەك، «ورالمان» مارتەبىن العان اعايىندار حالىقتىڭ الەۋمەتتىك جاعىنان ءالسىز توپتارى ساناتىمەن تۇرعىنجايعا مۇقتاج ادامدار قاتارىندا زاڭ بويىنشا باسپانا كەزەگىنە تۇرۋعا قۇقىعى بار دەگەن ءسوز.

بۇل – ءوز كەزەگىندە، ۇكىمەتىمىزدىڭ كوشى-قون ساياساتىن شىن مانىندەگى قولداعاندىعىنىڭ، الىستان ورالعان اعايىنعا دەگەن شىناي قامقورلىعىنىڭ بەلگىسى دەپ باعالايمىن! 

زاڭ بويىنشا، باسپانا كەزەگىنە تىركەلۋ ءۇشىن، قانداستار تۇراقتى تىركەۋگە تۇرعان مەكەنجايدا كەمىندە ءۇش جىل تۇرۋى كەرەك.

«حالىقتىڭ كوشى-قونى تۋرالى» زاڭىنىڭ 25-بابىندا «ورالمان مارتەبەسىن العان كۇننەن باستاپ ءبىر جىل وتكەننەن كەيىن توقتاتىلادى» دەپ جازىلعاندىقتان، ءبىر مەكەنجايدا ءۇش جىل «ورالمان» بولىپ تۇرۋ مۇمكىن ەمەس جانە ول ازامات قازاقستان رەسپۋليكاسىنىڭ ازاماتتىعىن العان سوڭ، «ورالمان» مارتەبەسى جويىلىپ، تۇرعىن ءۇي كەزەگىنەن شىعارىلىپ تاستالادى.

وسى ماسەلەنى كوزدە ۇستاي وتىرىپ، ماجىلىستە تالقىلانىپ جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»  قازاقستان رەسپۋبليكاسى زاڭىنىڭ جوباسى قاتارىندا «تۇرعىن ءۇي قاتىناستارى تۋرالى» زاڭىنىڭ 68-بابىنا «ەسكەرتپە: «ورالمان» ساناتىمەن باسپانا كەزەگىنە تۇرعان ازامات قازاقستان رەسپۋبليكاسىنىڭ ازاماتتىعىن العان جاعدايدا ونىڭ كەزەگى ساقتالادى» دەگەن ەسكەرتپە ەنگىزۋ تۋرالى ۇسىنىس بەرگەمىز.

اتالعان ۇسىنىستى دەپۋتات كارىباي يمانجانۇلى ءوز اتىنان جۇمىس توبىنىڭ تالقىسىنا سالىپ، 2019 جىلعى 02 قازاندا (№7-10-921) ۇكىمەتتىڭ قورتىندىسىن الۋعا جىبەرگەن بولاتىن.

وكىنىشكە وراي، ۇكىمەتتەن «حالىقتىڭ كوشى-قونى تۋرالى» زاڭىنىڭ 67-بابىنا سىلتەمە جاساي وتىرىپ، «قازاقستان ازاماتتارى مارتەبەسىن العان جانە تۇرعىن ۇيگە مۇقتاج ورالماندار جالپى نەگىزدە ءبىزدىڭ باسقا ازاماتتارىىزبەن بىردەي مەملەكەتتىك تۇرعىن ءۇي قورىنان تۇرعىن ءۇي الۋعا ۇمىتكەر بولا الادى. وسىعان بايلانىستى ورالماندار ءۇشىن كەزەكتى ساقتاۋ ماسەلەسىن ورىنسىز دەپ سانايمىز» دەگەن ۇكىمەت باسى اسقار ءماميننىڭ قولى قويىلعان جاۋاپ (№7-10-1282) كەلىپتى. قىسقاسى، بۇل ۇسىنىس ۇكىمەتتەن قولداۋ تاپپادى.

سوندا زاڭدا كورسەتىلگەن شارپەن باسپانا كەزەگىنە تۇرعان قانداستارىمىزدىڭ ءبىر جىلدان سوڭ نەمەسە قازاقستان رەسپۋبليكاسىنىڭ ازاماتتىعىن العان جاعدايدا، ونىڭ «ورالمان» مارتەبەسى جويىلىپ، «حالىقتىڭ الەۋمەتتiك جاعىنان وسال توپتارى» نەمەسە «مۇقتاجدار ەسەبiندە تۇراتىن ازاماتتار» ساناتىنان شىعىپ قالاتىنىن ۇكىمەتتىڭ  تۇسىنبەگەنى مە، جوق تۇسىنگىسى كەلمەگنەنى مە؟! 

ەگەر، «تۇرعىن ءۇي قاتىناستارى تۋرالى» زاڭىنىڭ اتالعان باپتارى ۇكىمەت قورتىندىسىمەن ءبىز بەرگەن ۇسىنىسپەن تولىقتىرىلماسا، قانداستارىمىز باسپانا كەزەگىنە تۇرا المايدى جانە كەزەكتەن الىنىپ تاستالىپ وتىرادى. سوندا، «زاڭداعى جۇرتتى الداۋسىراتاتىن، اۋرەگە سالاتىن جانە بىرىنە-ءبىرى قايشى مۇنداي نورمانىڭ نە قاجەتى بار؟!!» دەگەن زاڭدى سۇراق تۋادى...

اسا قۇرمەتتى قاسىم-جومارت كەمەلۇلى!

مەن قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى رەتىندە سىزدەن قانداستارىمىزدىڭ «حالىقتىڭ الەۋمەتتiك جاعىنان وسال توپتارى» نەمەسە «مۇقتاجدار ەسەبiندە تۇراتىن ازاماتتار» ساناتىمەن باسپانا كەزەگىنە تۇرۋى جانە بەلگىلەنگەن تارتىپپەن باسپانالى بولۋى ءۇشىن،  وسى ماسەلەنى وڭتالى شەشۋگە ىقپال ەتۋىڭىزدى سۇرايمىن.

قۇرمەتپەن،

اۋىت مۇقيبەك
اقىن،
قر پرەزيدەنتى جانىنداعى
ۇلتتىق قوعامدىق سەنىم كەڭەسىنىڭ مۇشەسى 

Abai.kz

19 پىكىر