بۇكىل الەم قاڭتار ايىنان باستالاتىن كۇنتىزبەنى قولداناتىنى ايتپاسا دا تۇسىنىكتى. بۇگىندە كوپشىلىك مۇسىلماندار دا سولاي. ويتكەنى ۇلكەن الەم كىشكەنتاي عانا اۋىلعا اينالعان مىنا جاھاندانۋ داۋىرىندە تىرشىلىگىمىزدى وسى كۇنتىزبەگە قاراي رەتتەيمىز.

ەندەشە، ونسىز دا كۇندەلىكتى ومىردە جىل بويىنا قولدانىلىپ جۇرگەن كۇنتىزبەنىڭ اياقتالۋىن قورىتىندىلاپ، جاڭا جىلدىڭ باستالۋىن اتاپ ءوتۋدىڭ دىنمەن ەشقانداي قاتىسى جوق. اتاپ وتپەۋدىڭ دە تاقۋالىقپەن بايلانىسى شامالى. ءتىپتى ۇجىمىڭنىڭ جىل بويى جاساعان جۇمىسىن باعالاپ، ولارعا العىس ءبىلدىرۋ، سىيلىق جاساپ قۋانتۋ ساۋاپتى ءىس، ۇلكەن مادەنيەت. باستىسى اتاپ وتۋدە شاريعات تىيعان ءىس-ارەكەتتەردەن، ىسىراپشىلدىقتان اۋلاق بولسا، بولعانى.

استىن سىزىپ ايتا كەتەيىن، ەسكى جىلدى قورىتىندىلاپ، جاڭا جىلدى اتاپ وتۋگە ەشكىم ءماجبۇر ەمەس. اتاپ ءوتۋ ءۇشىن وتىرىك اياز اتاسى دا، داستارحان باسىندا 24:00 كۇتۋ دە شارت ەمەس.

سونداي-اق، اتاپ وتپەيتىندەر باسقالارعا ارتىق اڭگىمە ايتپاعاندارى ءجون. اركىمنىڭ ءوز تاڭداۋى.

ال بۇل ۋاجىمە كەلىسپەيتىندەر 2020 جىل دەگەن ءسوزدى كەلەسى جىلى كۇندەلىكتى ومىردە مۇلدەم قولدانباعاندارى دۇرىس. ويتكەنى قولدانۋ ارقىلى وزدەرىنە وزدەرى قارسى شىعىپ، جاڭا جىلدى مويىنداعان بولادى.

جاڭا جىلدى ناۋرىزدا اتاپ وتەمىن، ۇجىمىمدى وسى ۋاقىتتا ماراپاتتاپ، العىس ايتامىن دەسەڭىز وعان دا مارحابات.

يسا پايعامباردىڭ تۋعان كۇنىنە بايلانىستى حريستياندار اراسىندا ءارتۇرلى كوزقاراس بار. سولاردىڭ ەشبىرىندە 1 قاڭتار يسا پايعامباردىڭ دۇنيەگە كەلگەن كۇنى ەمەس.

قايرات جولدىبايۇلىنىڭ الەۋمەتتىك جەلىدەگى پاراقشاسىنان

Abai.kz