جۇما, 14 تامىز 2020
COVID-19 قازاقستاندا. جۇقتىرعاندار — 101372. جازىلعاندار — 76756. قايتىس بولعاندار — 1269
الەۋمەت 2533 2 پىكىر 25 جەلتوقسان, 2019 ساعات 10:50

«پەداگوگ مارتەبەسى تۋرالى» زاڭ جوباسى 21 باپتان تۇرادى

پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا «پەداگوگ مارتەبەسى تۋرالى» زاڭ جوباسى قارالدى.

زاڭ جوباسى قازاقستان رەرسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ قازاقستان حالقىنا جولداۋىن جۇزەگە اسىرۋ اياسىندا ازىرلەنگەن بولاتىن. ول پەداگوگتاردىڭ قۇقىقتارىن كەڭەيتۋگە، ولاردى وزىنە ءتان ەمەس قىزمەتتەن بوساتۋعا، جۇكتەمەنى ازايتۋعا، مۇعالىم ماماندىعىنا قويىلاتىن تالاپتاردى كۇشەيتۋگە باعىتتالعان ءارى جۇمىس ىستەيتىن مۇعالىمدەردىڭ ماتەريالدىق تۇرعىدا ىنتالاندىرۋ تەتىكتەرىن، سونداي-اق جاستاردى پەداگوگ ماماندىعىنا تارتۋ ماسەلەلەرىن قاراستىرادى.  

بۇل زاڭ جوباسى 21 باپتان تۇرادى، ونىڭ ەرەجەلەرى مەكتەپكە دەيىنگى، ورتا، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ، مامانداندىرىلعان، ارناۋلى ءبىلىم بەرۋ ۇيىمدارىندا، جەتىم بالالار مەن اتا-انا قامقورلىعىنسىز قالعان بالالارعا ارنالعان قوسىمشا ءبىلىم بەرۋ ۇيىمدارىنىڭ پەداگوگ قىزمەتكەرلەرىنىڭ جۇمىسىنا قولدانىلادى.

زاڭ جوباسىندا پەداگوگتىڭ كاسىبي قىزمەتىن جۇزەگە اسىرۋعا ارنالعان شارتتاردى ەڭبەك زاڭناماسىنا سايكەس جۇمىس بەرۋشى قامتاماسىز ەتەتىنى تۋرالى ەرەجە بەكىتىلەدى.

بۇل رەتتە ەلىمىزدىڭ زاڭدارىندا كوزدەلگەن جاعدايلاردى قوسپاعاندا، ونى كاسىپتىك مىندەتتەرگە بايلانىستى ەمەس جۇمىس تۇرلەرىنە تارتۋعا; ودان ءبىلىم بەرۋ سالاسىنداعى زاڭنامادا كوزدەلمەگەن ەسەپ-قيساپتى نە اقپاراتتى تالاپ ەتۋگە; ەلىمىزدىڭ زاڭدارىندا كوزدەلمەگەن تەكسەرۋلەردى جۇرگىزۋگە; وعان تاۋارلار مەن كورسەتىلەتىن قىزمەتتەردى ساتىپ الۋ جونىندەگى مىندەت جۇكتەۋگە تىيىم سالۋ ارقىلى پەداگوگ جۇكتەمەسىن قىسقارتۋ; مەملەكەتتىك ورتا ءبىلىم بەرۋ ۇيىمدارىنىڭ پەداگوگتارىن ولاردىڭ كاسىبي قىزمەتىن جۇزەگە اسىرۋ كەزىندە مەملەكەتتىك ەمەس ۇيىمداردىڭ شارالارىن وتكىزۋگە تارتۋ جونىندەگى ەرەجەلەر ناقتى بەلگىلەنگەن.

پەداگوگتەردىڭ قۇقىقتارىن كەڭەيتۋ ماقساتىندا ولاردىڭ قۇقىقتارى ءۇش باعىت بويىنشا: كاسىبي قىزمەتتى جۇزەگە اسىرۋ كەزىندەگى پەداگوگتىڭ قۇقىقتارى; پەداگوگتىڭ ماتەريالدىق قامتاماسىز ەتۋ قۇقىعى; پەداگوگتىڭ كوتەرمەلەۋ قۇقىعى جازىلعان جانە جەكە باپتاردا كورسەتىلگەن. 

زاڭ جوباسىنىڭ ەرەجەلەرىندە پەداگوگتارعا الەۋمەتتىك كەپىلدىكتەر، ونىڭ ىشىندە: ۇزاقتىعى 56 كۇنتىزبەلىك كۇن تولەنەتىن جىل سايىنعى ەڭبەك دەمالىسى; تۇرعىلىقتى جەرى بويىنشا مەكتەپكە دەيىنگى ۇيىمداردا پەداگوگتاردىڭ بالالارىنا جەرگىلىكتى اتقارۋشى ورگانداردىڭ ءبىرىنشى كەزەكتە ورىن بەرۋى بەلگىلەنگەن.

سەناتورلار سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەداگوگ مارتەبەسى، وقۋشى مەن مۇعالىمگە جۇكتەمەنى تومەندەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى. 

زاڭ جوباسىمەن بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزىلەدى. نەگىزگى تۇزەتۋلەر ەلىمىزدىڭ «ءبىلىم تۋرالى» زاڭىنا ەنگىزىلدى. 

ءبىلىم بەرۋ سالاسىنداعى ۋاكىلەتتى ورگاننىڭ قۇزىرەتى - ورتا، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارى پەداگوگتار جۇرگىزەتىن مىندەتتى قۇجاتتاردىڭ تىزبەسىن جانە ولاردىڭ نىساندارىن ازىرلەۋ جانە بەكىتۋ جونىندەگى جاڭا وكىلەتتىكتەرمەن تولىقتىرىلادى. 

زاڭ جوباسىمەن جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋدىڭ جەكەلەگەن مەملەكەتتىك ۇيىمدارىنىڭ ءبىرىنشى باسشىلارىن قىزمەتكە تاعايىنداۋ جانە قىزمەتتەن بوساتۋ تارتىبىنە، اتتەستاتتاۋدان ءوتۋ تارتىبىنە قاتىستى وزگەرىستەر ەنگىزىلەدى. 

جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىندا كاسىپتىك قىزمەتتى جۇزەگە اسىراتىن، كاسىپتىك قىزمەتتى جۇزەگە اسىرۋ ءۇشىن جاعدايلاردى، ونىڭ ىشىندە قۇقىقتاردى، مىندەتتەردى جانە الەۋمەتتىك كەپىلدىكتەردى قامتاماسىز ەتەتىن پەداگوگ مارتەبەسى تۋرالى ەرەجەلەر ساقتالادى.  

سەناتورلار پەداگوگيكالىق كادرلاردى دايارلاۋ، ساۋىقتىرۋ ماقساتتارىنا تولەمدەردى ارتتىرۋ، اۋىلدىق جانە قالا مۇعالىمدەرى ءۇشىن الەۋمەتتىك جەڭىلدىكتەردى تەڭەستىرۋ جانە تاعى باسقا ماسەلەلەردى كوتەردى.

زاڭ جوبالارى پالاتانىڭ قاراۋىنا بەرىلدى.

Abai.kz

2 پىكىر