الماتى وبلىسىنىڭ اكىمى

اماندىق باتالوۆ مىرزانىڭ نازارىنا!

قاسەنحان سەرعازيەۆ – گرەك-ريم كۇرەسىنەن قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى، ارداگەرلەر اراسىندا وتكەن سايىستا الەم چەمپيونى اتانعان قازاق!

اعامىز الماتى وبلىسى پانفيلوۆ اۋدانىنىڭ تۋماسى. قازىرگى ۋاقتا تۋعان اۋىلىندا ءوز سالاسى بويىنشا شاكىرت تاربەلەۋمەن اينالىسادى ەكەن.

پەرم قالاسىندا وتكەن رەسەي چەمپيوناتىنا نۇرجان نۇربەكوۆ دەگەن شاكىرتىمەن بارىپ، ءوزى I ورىندى، شاكىرتى III ورىندى جەڭىپ الىپ قايتقان جولىندا «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىنە ات باسىن بۇرىپ، ءبىر وتىنىشپەن كەلىپتى. ءبىز دە وسى ساتىندە كەزدەسىپ، جەڭىسىمەن قۇتتىقتاپ، قولىن قىستىق.

قارپايىمدىلىعى مەن قاتار، مىنەزى دە بار ەكەن اعامىزدىڭ. قيمىلى شاپشاڭ، ءسوزى ءمىردىڭ وعىنداي. بىراق، جىلى سوزگە، شىنايى قۇرمەتكە مايداي ەرىپ تۇسە قالاتىن اق كوڭىلى تاعى بار ەكەن. تەلەفونىنان كۇرەس ۇستىنەن تۇسىرىلگەن ۆيديولارىن كورسەتىپ، ءماز-مەيرام بولدى.

بيىل قازان ايىندا گرۋزيادا وتكەن ارداگەرلەر اراسىنداعى گرەك-ريم كۇرەسىنەن الەم چەمپيوناتىندا قاسەنحان سەرعازيەۆ اعامىز التىننان القا تاعىپتى. 62 كيلوگرامم سالماق دارەجەسىندە بەلدەسكەن جەرلەسىمىز فينالدا تۇرىك بالۋانىمەن كەزدەسىپ، 8:4 ەسەبىمەن جەڭىسكە جەتىپتى. ءسويتىپ، كوك تۋىمىز بيىل قاسەكەڭنىڭ ارقاسىندا الەمدىك چەمپيوناتتا جەلبىرەپتى.

ءاپايتوس اعامىزدىڭ جەڭىسىنە جەلپىنىپ تۇرعانىمىزدا داڭقتى پالۋان اعامىز داۋلەت تۇرلىحانوۆ تەلەفون سوعىپ، قۇتتىقتاپ جاتتى.

تەك، جارىسقا اتتانار الدىندا اۋدان اكىمىنە بارىپ، جول قاراجاتىن سۇراعانى بولماسا، ەڭ قىزىعى، بۇكىل ءومىرىن گرەك-ريم كۇرەسىنە ارناپ، بوز كىلەمدە بەلدەسكەنىن بەت قاراتپاي كەلە جاتقان قاسەنحان قىرعاۋىلبايۇلى ومىرىندە وبلىس اكىمىنىڭ قولىن الىپ كورمەپتى.

اعامىزدىڭ ءبىر ءوتىنىشىن جەردە قالدىرماۋعا تىرىسىپ، الماتى وبلىسى اكىمىنىڭ اپپاراتىنا قوڭىراۋ شالىپ ەدىك، اكىم اپپاراتىنىڭ ورىنباسارى، ءوزىنىڭ جەرلەسى ەكەن، ەسىنە ارەڭ تۇسىرگەندەي بولدى...

بۇگىنگى تاڭدا حالىق پەن بيلىكتىڭ اراسى جاقىنداپ، سىندارلى ديالوگ ورناپ كەلەدى. ال، ەلىمىزدە حالىققا جاقىن ءۇش ءۇش اكىم بولسا، سونىڭ ءبىرى – اماندىق باتالوۆ. مۇمكىن، اماندىق عابباسۇلى وبلىستىڭ شەكارامەن شەكتەسەتىن ءبىر تۇكپىرىندە جاتقان، ءشوپ شاۋىپ ءجۇرىپ تىكە چەمپيوناتقا تارتىپ كەتە بەرەتىن قاسەنحان سەرعازيەۆتى بىلمەيتىن شىعار. نەگىزى، مۇنداي الەمدىك دەڭگەيدە تانىلعان تۇلعالاردى بىلۋگە ءتيىس. اكىم بىلمەسە، ونىڭ قول استىنداعى قىزمەتكەرلەرى بىلۋگە جانە اكىمنىڭ نازارىنا سالىپ وتىرۋعا مىنتتەتتى. سولاي ەمەس پە؟!

شىناشاقتاي عانا شىمىر دەنەلى اعامىز كەلەسى جىلى افينادا وتەتىن چەمپيوناتقا بارا الماي قالام با دەپ، قايتا-قايتا الاڭداپ، الداعى سايىسقا دا جاراۋلى تۇلپارداي جەر تارپىپ تۇر. «بارسام، بۇكتەيمىن عوي!» دەپ قويادى نىق سەنىممەن!

سەبەبى، بيىلعى جارىسقا بارۋعا قارجى تاپپاي قاتتى قينالىپتى...

ءيا، تالانتتىڭ كوبى اۋىلدا. قاسەكەڭ قۇساپ، جاۋىردى جابا توقىپ، قولدا بارىن ساتىپ بولسا دا جارىسقا قاتىسىپ، قانجىعاسىنا جۇلدە بايلاپ قايتاتىندارى از بولسا كەرەك ولاردىڭ. كوبى تۇرمىستىڭ قىسپاعىنا قىسىلىپ، اكىم-قارالارعا ءسوزىن وتكىزە الماي، مورت كەتەتىنى جاسىرىن ەمەس.

ونىڭ ۇستىنە، تالانتتى ادامنىڭ بويىندا مىنەزى بولاتىنى تاعى بار. ىلۋدە بىرەۋ بولماسا، كوپ شەنەۋنىك ونى تۇسىنە بەرمەيدى عوي.

مەيلى، كىم نە دەسە، و دەسىن، بۇگىن ءوزىم سونداي قاراپايىم، بىراق كوزىنەن وت جانعان، نامىسى مەن كۇشى كەۋدەسىن كەرنەپ تۇرعان قازاقتىڭ ءبىر الەمدىك دارەجەدەگى چەمپيونىمەن كەزدەسكەنىمدى – باقىتقا بالاپ، قاتتى قۋاندىم.

اۋىلدان بارىپ، الەمدىك سايىستا قارسىلاسىن بۇكتەپ قايتۋ – ناعىز ەرلىك! تالانتتى تىرىسىندە قۇرمەتتەۋ، ەڭبەكتى ۋاقىتىندا باعالاۋ – پارىز!

ولگەن سوڭ، ءبارى – بوس ءسوز!

امان بولىڭىز، قاسەنحان اعا!

ءوزىڭ سەكىلدى اۋىلدان شىققان جامان باۋىرىڭ سەنى ەندى ەشقاشان ۇمىتپايدى. ەرلىگىڭدى ەمىرەنە ايتىپ جۇرەتىن بولادى ەلگە.

اكەل قولىڭدى، ازىرىنشە مەن قىسىپ، قۇتتىقتاي تۇرايىن! ار جاعىن كورە جاتارسىز...

اۋىت مۇقيبەك،

قر پرەزيدەنتى جانىنداعى

ۇلتتىق قوعامدىق سەنىم كەڭەسىنىڭ مۇشەسى.

Abai.kz