باۋىرجان ازانوۆتىڭ ازاتتىققا ايتۋىنشا، "پانا ىزدەۋشى تۇلعا" مارتەبەسىن بەرۋ تۋرالى شەشىمدى شىعىس قازاقستان وبلىستىق كوشى-قون پوليتسياسى باسقارماسى قابىلداعان. وبلىستىق باسقارمادان بۇل تۋرالى اقپارات الۋ مۇمكىن بولمادى.
ازانوۆتىڭ سوزىنشە، ەكى ازاماتقا كۋالىك بۇگىن، 29 قازاندا بەرىلۋى ءتيىس.
30 جاستاعى قاستەر مۇساحانۇلى مەن 25 جاستاعى مۇراگەر ءالىمۇلى ءدوربىلجىڭ ايماعىنان شىعىپ، 1 قازاندا قىتاي شەكاراسىنان وتكەندەرىن ايتقان. 14 قازاندا الماتىداعى ادام قۇقىعىن قورعاۋ بيۋروسىندا وتكەن ءباسپاسوز ءماسليحاتىندا قاستەر مۇساحانۇلى شىڭجاڭداعى "ساياسي لاگەردە قاماۋدا وتىرعانىن", مۇراگەر ءالىمۇلى قىتايدا "قىسىم كورگەنىن" ايتقان.
ءباسپاسوز ءماسليحاتىنان كەيىن ولاردى شەكارا قىزمەتىنىڭ وكىلدەرى اكەتىپ، 15 قازاندا تەرگەۋ امالدارىمەن شىعىس قازاقستانعا اپارىلعان. ۇقك شەكارا قىزمەتى قاستەر مۇساحانۇلى مەن مۇراگەر ءالىمۇلىنىڭ ۇستىنەن قىلمىستىق كودەكستىڭ 392-بابى 1 بولىگى، ياعني "قازاقستان شەكاراسىن زاڭسىز كەسىپ ءوتۋ" بابى بويىنشا تەرگەۋ ءجۇرىپ جاتقانىن حابارلاعان. ەكەۋى قازىر وسكەمەندەگى ۋاقىتشا تەرگەۋ يزولياتورىندا قاماۋدا وتىر.
الماتى وبلىسىنىڭ كوشى-قون پوليتسياسى "پانا ىزدەۋشى تۇلعا" كۋالىگىن بۇعان دەيىن، 2018 جىلدىڭ تامىزىندا العاش رەت سايراگۇل ساۋىتبايعا بەرگەن. قازاق-قىتاي شەكاراسىنان زاڭسىز ءوتتى دەپ ايىپتالعان قىتايدىڭ ەتنيكالىق قازاعى سايراگۇل ساۋىتباي ۇستىنەن جۇرگەن سوت پروتسەسى "پانا ىزدەۋشى تۇلعا" كۋالىگىن العاننان كەيىن دە توقتاماعان. الماتى وبلىستىق كوشى-قون پوليتسياسى سايراگۇل ساۋىتبايعا بەرگەن "پانا ىزدەۋشى تۇلعا" مارتەبەسىنىڭ مەرزىمىن بىرنەشە رەت ۇزارتقان. قازاقستاننان بوسقىن مارتەبەسىن الا الماعان سايراگۇل ساۋىتباي شۆەتسياعا كەتكەن.
Abai.kz
