Жексенбі, 20 Қыркүйек 2020
COVID-19 ҚАЗАҚСТАНДА. Жұқтырғандар — 107199. Жазылғандар — 101822. Қайтыс болғандар — 1671
Жөн-ақ 1685 0 пікір 26 Қазан, 2017 сағат 13:39

Мемлекеттік тіл мемлекеттік қызметтегі орнын еш бір тілге бермеуі керек

 

Атазаңымызда мәртебесі «мемлекеттілік» деп белгіленген қазақ тілі  7-баптың 2. тармағы бойынша көп ретте өзінің ресми рөлін орыстіліне беріп қояды. Қараңыз: 2. Мемлекеттік ұйымдарда және жергілікті өзін-өзі басқару органдарында орыс тілі ресми түрде қазақ тілімен тең қолданылады. Алайда, бұл тармақ қазақ тіліне көлеңке түсірмеуі керек. Өкінішке қарай, Мемлекеттік ұйымдарда болсын, жергілікті өзін-өзі басқару органдарында болсын орыс тілі ресми түрде қазақ тілінің орынын иеленіп кетіп жатыр. Біз бұндай керағарлыққа құқытық мемлекет ретінде жол бермеуіміз керек. Соның бір жолы Мемлекеттік қызметте мемлекеттік тілдің өрісін кеңейтіп, пәрменін күшейту. Міне, осы мақсатта Тараз қаласында өткен республикалық «Мемлекеттік тіл мемлекеттік қызметте» атты байқауды атауға болады. Мемлекеттік қызметте қазақ тілінің қолданыс аясын кеңейтіп, мемлекеттік тілдің мәртебесін көтеру мақсатында ұйымдастырылған шараға Қазақстан Республикасы Мәдениет және спорт министрлігі Тілдерді дамыту және қоғамдық-саяси жұмыс комитеті мұрындық болды.

Мемлекеттік қызметшілердің қазақ тіліне деген оң көзқарасын қалыптастырып, құжат тілінің мемлекеттік тілге көшуіне, қызметтердің қазақ тілінде көрсетілуіне жағдай жасайтын байқауға ел аумағынан 13 команда қатысты. Олар байқау шартына сай 4 кезең бойынша білімдері мен біліктіліктерін көрсетті.

Аймақтық іріктеуден өткен командаларға қоғам қайраткері, саяси ғылымдар докторы Әбдіжәлел Бәкір (төраға), Тараз инновациялық-гуманитарлық университетінің «Түркітану» ғылыми-зерттеу орталығының бас маманы, филология ғылымдарының докторы, профессор Қасиет Какенұлы, Қазақ ұлттық салт-дәстүрлері академиясының профессоры, композитор Кентау Қуантайұлы, Қазақстан Республикасы Президентінің жанындағы Мемлекеттік басқару академиясының аға оқытушысы Ләззат Пернебекқызы, Мемлекеттік тілді дамыту институтының атқарушы директоры, филология ғылымдарының кандидаты Бижомарт Сейсенбекұлы қазылық етті.

Сайыс қорытындысы бойынша Алматы қаласының құрамасы "Алатау" жеңімпаз атанды. Жүлделі 1-орын Жамбыл облысының "Прагматиктер" командасына бұйырды. Ал 2-орынды ҚР Дін істері және азаматтық қоғам министрлігінің "Үш бақытым" командасы еншілесе, 3-орынды "ЭКСПО" (Алматы облысы), "15-ші өңір" (СҚО) командалары өзара бөлісті. Жеңімпаз бен жүлдегер командаларға арнайы диплом мен қомақты қаржылай сыйлық табысталды.

Әрине, бұл шара игі бастама. Бірақ, Мемлекеттік қызметтегі мемлекеттік тіл мәселесі байқаулар мен жиындардың орамында қалмауы керек.

Abai.kz

0 пікір