– Бүгін біздің қаламызда өте маңызды іс-шара өтіп жатыр, – де­ді жиынды ашқан қала әкімі Бауыржан Байбек. – Еліміз үшін аса маңызды ЭКСПО-2017-ні өткізу үшін бас мердігер, Ұлттық компанияның төрағасы Ах­метжан Смағұлұлы командасымен өзінің сүйікті қаласына келіп, ондағы мүмкіндікпен танысып, кәсіпкерлерге қолдау жа­самақ. Оның үстіне ол кісі қаладағы көптеген маңызды жо­балардың негізін қалаған адам. Бүгінгі форумға екі жүзден аса қала­­дағы ірі кәсіпорындардың бас­шылары қатысып, форум аясында олардың 40-тан астамы өз тауарының жәрмеңкесін ұсынып отыр. Бұл дегеніңіз – құрылыс ма­­териалдары, құрал-жабдықтар мен арнайы техникалар, жиһаз, киім-кешек, жәдігерлік бұйымдар. Шығаратын өнімдерінің сапасы өте жоғары. Елбасы айтқан­дай, ЭКСПО – әсіресе бүгінгідей қиын уақытта экономикамыз­дың драйвері. Соның негізінде туризм саласын дамытып, инвестиция мен жаңа технологияларды тартып, жаңа жұмыс орындары ашылатын болады. Сондықтан сапалы өнім шығаратын алматылық компаниялар ЭКСПО-2017 көрмесін қолдауға белсенді араласатынына сенімдіміз.

ЭКСПО-2017 жалпыұлттық жобасы аясында Алматы қаласын­да аймақтық іс-қимыл жоспары әзірленгенін, соған сәйкес Алматы қаласы ел тарихындағы елеулі шараны жоғары деңгейде өткізуіне зор үлес қосатынын, ол үшін қа­ла­мызда барлық мүмкіндіктер бар екенін жеткізіп, баяндама жаса­ған қала әкімінің орынбасары Ер­лан Әукенов, сондай-ақ, қалада 184 мың бизнес субъектісі, оның ішінде 1800 өндіріс орны, 2,5 мың құ­рылыс компаниясы, 900-ге тарта туристік фирма, 122 қонақүй орналасқанын, олардың көпші­лі­гі аталмыш жобаға қатысуға үлкен қы­зы­ғушылық білдіріп отырғанын жеткізді.

Оған қоса Бауыржан Қыдыр­ғалиұлы келісімшартқа қол қойыл­­ған соң «Жол картасы» қабыл­данатынын, сол бойынша Алматы қаласы ауқымды шараны өткізуге өзіндік үлес қосып, жарнама, ұйымдастыру, т.б. жағынан үлкен көмек көрсететінін тілге тиек ете кетті. Мегаполисте соң­ғы 3 жылда инвестиция көлемі 12 пайызға, ал технологиялық ин­новациялық кәсіпорындарға жұмсалған қаражат 2 есеге артқан. Алматының 30-дан астам өндіріс ошағы өз өнімін ТМД, Еуропа мен Оңтүстік-Шығыс Азия елдеріне экспорттайды.

Өз кезегінде сөз алған «ЭКСПО-2017» ҰК» АҚ басқарма төрағасы Ахметжан Есімов Ал­маты кәсіпорындарының қа­тысуынсыз халықаралық көрмені өткізу мүмкін еместігін жеткізді.

– Көптеген компаниялардың дамуын жақсы білемін. Оларда өзім болғанмын. Алматының әлеуеті өте жоғары екенін де біле­мін. Алматы – еліміздің басты ло­ко­мотиві. Мұнда ғылым мен білім ошақтары, ірі өндіріс орындары шоғырланған. Бірақ осыған дейін қаланың ЭКСПО-2017 жобасындағы қатысы өте белсенді емес болатын. Сома да аса мәз емес – 550 млн. теңге. Бүгін құны 10 миллиард теңгеге серіктестік жөніндегі келісімге қол қойылмақ. Әзірге меморандум 8 облыспен жасалып, жалпы 300-ге жуық кәсіп­орын жұмылдырылды. Ал­маты – келісім жасалып отыр­ған 9-шы аймақ. Жалпы алғанда сегіз аймақтан 23 млрд. теңгеге келісімшарт жасалып, 10 мың жұмыс орны пайда болды, – деді Ахметжан Есімов.

Осылайша, Алматы ЭКСПО-ның тығыз қарым-қатынас ор­натқан 9-шы өңірі болды. Бүгін­де құрылыс алаңында 7800 адам тер төгуде. Президентіміз айтқандай, бұл жоба – дағдарыс кезінде жаңа жұмыс орындар ашып, кәсіпорындардың тынысын кеңейтуге мүмкіндік беретін жобалардың бірі болмақ. Сондай-ақ, екі тарап меморандумды жүзеге асыру бойынша қолға алынатын шаралардың жоспарын құрды.

Гүлзейнеп СӘДІРҚЫЗЫ,

«Егемен Қазақстан».