Дүйсенбі, 6 Желтоқсан 2021
Әдебиет 6561 0 пікір 31 Қазан, 2014 сағат 12:55

Талғат Ешенұлы. ҚАЗАҚ-СОВЕТ ӘДЕБИЕТІ ӨКІЛІНІҢ МОНОЛОГЫ

Күні кеше ғой, 
Коммунизмді мақтап көп;
Күн көсем ғана тақпақ боп;
Тап-тап боп және жақ-жақ боп;
Отанымызды, ошағымызды сатпақ боп;
Жақсы-жайсаңды түгелдей асып, атпақ боп;

Жанқалтамызға партбилетіміз шап-шақ кеп;
«Билеттен қымбат зат жоқ» деп;
«Советтен әділ сот жоқ» деп;
Оттап, 
Оттап кеп, оттап кеп...
Жүйе өлгенде,
Өлместің күйін кешкенде – 
Революциядан қалған том-том кітабымызды
Тамызық қылып жақпап па ек?!.

Күні кеше ғой,
Құдайдың басынан,
Құранның үстінен секіріп;
Ел бола алмай отырып, 
Қазақ болғанымызға өкініп;
Бала-шағаны «мәмбет қылмауға» бекініп;
Ана тілдерін айырлап, екі қып;

Қызылдан іздеп тақырып;
Қызыл жұлдызға шоқынып;
Қызыл көсемдер мезгілсіз қайтыс болғанда
Өгіздей өкіріп;
Қызыл мінберлерде көпіріп;
Көпіріп, көпіріп...
Жүйе өлгенде,
Өлместің күйін кешкенде – 
Революциядан қалған соңғы кітабымыздың атын 
«Тәуелсіздік» деп қоя салмап па ек өтірік!

28.10.2014

Abai.kz

0 пікір