Жұма, 29 Наурыз 2024
Деп жатыр 3128 36 пікір 8 Қыркүйек, 2022 сағат 13:00

Тілеухан: «Қапияда жол тапқан - Назарбаев»

Мәжілістің бұрынғы депутаты Бекболат Тілеуханов елорданың қайта «Астана» деп аталуына қарсы екенін айтыпты. Ол өзінің әлеуметтік желідегі парақшасында жариялаған үндеуінде бас қаланың атауы Нұр-Сұлтан болып қалуы керек екенін айтты.

«Мен кешегі Доспамбет, Қазтуған, Шалкиіз, Ақтамберді, Бұхарлардың мұрасын дәріптеп, өнерін жалғап келемін. Сол жыраулардың сарқыншағы іспетті адам болғандықтан да, осы бір сөзді айту міндетім деп білгендіктен де сөзге қонақ алып отырмын.

Осыдан отыз-ақ, жыл бұрын боданнан босаған елдердің арасында ай маңдайы жарқырап, оза шапқан қазақ елінің тізгінін Нұрсұлтан Назарбаев ұстаған еді. «Басқа-басқа, тап осы – Қазақстан ел болмайды. Ұстағанның қолында, тістегеннің аузында кетеді. Көпұлтты ел. Оқ-дәрі толтырған бөшке сияқты. Ертең бұрқ ете қалады», - деп болжам жасаған Бжезинскийге арада бірнеше жыл өткеннен кейін: «Бжезинский мырза, болжамыңыз болмады ғой», - дегенде: «Мен Назарбаев феноменін ескермеппін», - дегенін ұмытып кеттік пе, ағайын? Бүкіл жақсылықтың бастауында бейбіт күн, тыныштық тұратынын білесіздер. Осының кепілі Назарбаев еді. Қапияда жол тапқан, қараңғыда ел тапқан, айласы алды он болған Назарбаев орыс орманмен де, басқамен де, қытайдың тілін тауып шекара шегендегені есімізден шығып кеткені қалай, ағайын? Каспийде де алаштың есесін жібермей үлкен үлес алып қалған да Назарбаев еді. Қандастарды тарихи отанына қайтарған, қазақтан басқа қандай ел бар еді? Израиль мен Германияны айтпағанда… Миллион қазақ. Жер бетінде миллионға жетпейтін ұлттар бар. Миллионнан астам қазақ тарихи Отанына, Қазақияға қайта оралды. Қара шаңыраққа қайтарған кім? Назарбаев! Орысы қайысқан солтүстікке қазақты әкелудің қандай бір саяси тәсілін тапты? Ол да бір бейне есімізден шығып кеткендей», – деді Бекболат Тілеухан.

Ол бұрынғы президенттің елге сіңірген еңбегін айта келе, Елорда атауын Нұр-Сұлтан аталуын «тарихи әділеттілік» деп бағалады.

«Алатаудың бауырында туған, Алматы облысының жігіті Алматыдан астананы Ақмолаға ауыстырды. Руласы да, сырласы да қарсы болды. Сол кезде бәрі қарсы болды. Бәріміз оған куәміз. Ештеңеге қараған жоқ. Саяси тегеурініне салды да ауыстырып алып келді. Өйткені, мұраты – асыл, мақсаты – айқын болатын. Қазаққа қажетті болашақты болжай білгендіктен де Назарбаев солай істеді. Осы бір терең сарабдал саясаттың тереңіне бойлай алмай қалғанымыз ба, ағайын?

Кеше ғана Хрущевтің шеңгелінен әупіріммен аман қалған Ақмола еді ғой. Сол Ақмоланы Алашқа астана қылғандағы ойдың тереңін түсінетін жөніміз бар ғой, ағайын. Осы нәрсесі үшін-ақ астанамыздың Нұр-Сұлтан аталуы – тарихи әділеттілік. Ердің ерекше еңбегіне берілген баға. Алаштың алғысы. Құсығын қайта жеген құнсыз құсамай, айтылған сөз, аталған есім атқан оқтай қайтпаса, нағыз әділдік осы болар еді», - деді экс-депутат.

Айта кетейік, таяуда «Жаңа Қазақстан» депутаттар тобының мүшелері Елордаға Астана атауын қайтарып беру туралы бастама көтерген еді.

«Конституциямызға өзгеріс енгізетін болсақ, онда осы мүмкіндікті пайдалана отырып, Ата Заңға тағы бір аса маңызды мәселені енгізу керек. Ол – Елорданың атын қайта қайтару. Адамның көзі тірісінде қалаға оның есімін берген дұрыс деп есептемейміз және қаланың жаңа атауын халық та қабылдамады. Сондықтан Тұңғыш Президенттің өзі ұсынған Астана атауын қайта қалпына келтіру тарихи әділдік болар еді. Бұл Тұңғыш Президенттің бас қаламыздың құрылысын салдырудағы еңбегін де бағалау және халқымыздың ұсыныс-пікірін де ескеру», - делінген Мәжіліс депутаттарының мәлімдемесінде.

Бекболат Тілеухан депутаттардың бастамасын қате деп санайтынын айтты.

«Кеше ғана Назарбаевтың көзіне қалай түсерін білмей жүрген 1-2 депутат Нұр-Сұлтанның атын жойып, Алаштың аяулы ақсақалының сағын сындырмаққа бастама көтеріпті. Бірақ, бұл бүкіл қазақтың көзқарасы деп түсінбейміз, ағайын.

Иә, жаза басқан жері бар шығар. Отыз жыл ел басқарды. Бірақ, біз кешірімшіл, дархан қазақ едік қой. Таблода тағы да Қазақстанның астанасы ауысып жатса, берекесі кеткен, мазасы қашқан ел дейді ғой, ағайын-ау. Сондықтан тарихи әділдігіне жүгініп, Астана қаласының атауы Нұр-Сұлтан деп өзгерді. Сол атауында қалуы керек. Көшелердің атауы, Тұңғыш Президент күні сияқты дүниелер өзгере берсін. Мүмкін оған лайық, мүмкін лайықсыз. Бірақ, тап Нұр-Сұлтан қаласының аты – Назарбаевтың еңбегіне берілген тарихи баға. Менің ғана пікірім емес. Осы пікірде талай қазақ барын біліңіздер. Үндеуді мен Тоқаевқа, Парламентке жолдағаным жоқ. Мен жолдауымды, айналайын, көзіқарақты қазақтың азаматтары – сіздерге салмақ етіп артып отырмын…», – деді Бекболат Тілеухан.

Abai.kz

36 пікір

Үздік материалдар

Алғыс айту күні

Алғыс айту күні және оның шығу тарихы

Жомартбек Нұрман 1562
Алашорда

Қожанов межелеу науқанында (Жалғасы)

Бейбіт Қойшыбаев 2256
Ғибырат

Қайсар рухты ғазиз жан

Мұхтар Құл-Мұхаммед 3534