Бұл мемлекетті тарихта әлі ешбір алпауыт ел сырттан жаулап ала алмаған. Әлі ешкім өз ырқына басыбүтін көндіре де алмаған. Жаһанның жұдырығы жуан елдердің көзқұртына айналған ауған елінен тағы да маза кетті. "Тәлібан" радикал қозғалысының әскерлері әурелең елді басыбүтін дерлік өз билігіне алды.

2009 жылы, яки осыдан 12 жыл бұрын Ауғанстанның ең қауіпсіз қаласы саналып келген Херат қаласында сыртқы істер министрлерінің кездесуі өтіп еді. Қазақстан атынан сол кездегі сыртқы істер министрінің орынбасары Нұрлан Ермекбаевпен бірге бір аптаға жуық іссапарда болып ек сонда. Сол тұста Қазақстаннан келген үкіметтік делегация құрамында болған біздің әрқайсымызды дәл осындай ауған полициясы қызметкерлері ерекше күзетіп еді. Қасымыздан бір елі қалмайтын сабаздар. Өзімізді расында да қауіпсіз сезіндік.

Қазір елдің солтүстік-батысында орын тепкен 600 мыңдай тұрғыны бар Херат қаласы да "Тәлібан" қозғалысы күштерінің толықтай ықпалына өтті. Елдің ең қауіпсіз мекені болған қала да бүгінде болашағы белгісіз мазаң күйде. Ұңғысынан түтіні сейілмеген ауған жұртында тыныштықтың орнауы емес, әзірге радикал топтардың арынын басу басты мәселе толғақты боп тұр. Қазақстан Президенті Қасым-Жомарт Тоқаевтың осы ретте үкімет мүшелерін, тиісті ведомство басшыларын жинап шұғыл жиын өткізуі де дер уағында. Ауғандағы жағдай ушыға берсе Орталық Азия елдеріне әсері қандай болмақ? Қазір Орталық Азия елдері мемлекеттері мен жаһандық қауымдастық елдерінің басын қатырған мәселе осы.

Әуесбайдың Қанаты

Abai.kz