Қазақстанның мемлекет және қоғам қайраткері, Қазақстан Жоғарғы кеңесінің бұрынғы төрағасы, оппозициялық саясаткер, ғалым Серікболсын Әбділдин 82 жасында Алматыда қайтыс болды.

Серікболсын ақсақал 31 желтоқсан күні сағат 23:00-тен өте Алматы ауруханасында қайтыс болған. Марқұммен қоштасу рәсімі 3 қаңтар күні таңертеңгі сағат 10:00-да Алматыдағы Ғалымдар үйінде өтеді.

Мемлекет басшысы Қасым-Жомарт Кемелұлы Тоқаев Серікболсын Әбділдиннің отбасына көңіл айтты. Бұл туралы Президенттің баспасөз хатшысы Берік Уәли мәлімдеді.

- Белгілі қоғам қайраткері жəне ғалым Серікболсын Əбділдиннің қайтыс болуына байланысты орны толмас қайғыларыңызға ортақтасып, көңіл айтамын.

Серікболсын Əбділдəұлы - елімізді дамыту жəне парламентаризмді қалыптастыру ісінде өзіндік қолтаңбасын қалдырған тұлға.

Марқұмның топырағы торқа, жаны жанатта, иманы саламат болсын!- деп жазылған жеделхатта.

Ал қайғылы хабармен бөліскен журналист Ермұрат Бапи марқұмның Алаштың ардақты азаматы екенін еске алды.

- Қазақстан демократиялық қозғалысының пайғамбары Серікболсын аға (Әбділдин) өмірден өтті деген суық хабар келді... Билікке иілмей өткен қайсар, қайтпас адам еді, - деп жазды Ермұрат Бапи Facebook желісіндегі жеке парақшасында.

Қоғам қайраткері, экономика ғылымдарының докторы, профессоры Серікболсын Әбділдаұлы Әбділдин 1937 жылы Шығыс Қазақстан облысы, Тарбағатай ауданында дүниеге келген. 1982 – 1985 ж. Қазақ КСР Ауыл шаруашылығы министрінің бірінші орынбасары, 1985 жылы АӨК-ні басқару жөніндегі Республикалық Жоғары мектеп ректоры, 1986 – 1987 жылы Қазақстан Ауыл шаруашылығы министрі, 1990-1995 жылы Қазақ КСР Жоғары Кеңесінің Төрағасы қызметтерін атқарды. 1995 жылдан бастап өмірінің соңына дейін оппозиция құрамында болған.

Abai.kz