Särsenbi, 23 Qırküyek 2020
COVID-19 QAZAQSTANDA. Jwqtırğandar — 107450. Jazılğandar — 102219. Qaytıs bolğandar — 1699
1351 0 pikir 3 Säuir, 2019 sağat 10:20

D. Nazarbaeva QHR elşisin qabıldadı

Parlament Senatınıñ Törağası Dariğa Nazarbaeva Qıtay Halıq Respublikasınıñ Qazaqstandağı elşisi Çjan Syaonı onıñ ötinişi boyınşa qabıldadı.

Senat Törağası kezdesudi aşa kelip Qıtaymen strategiyalıq jan-jaqtı äriptestik qarım-qatınastıñ erekşe mañızın atap ötti. «Qazaqstan Elbası N.Nazarbaev pen QHR Törağası Si Czin'pinniñ joğarı deñgeydegi dostıq, tatu körşilik jäne özara tüsinistik negizindegi kelisimderin jüzege asırudı jalğastıruğa nietti. Strategiyalıq jan-jaqtı äriptestik qarım-qatınastarın nığaytu bağıtın wstanatınımızdı naqtılaymız», - dedi D. Nazarbaeva.

Çjan Syao QHR Halıq ökilderi Bükilqıtaylıq jinalısı Twraqtı komitetiniñ törağası Li Çjan'şudıñ D. Nazarbaevağa Senat Törağası qızmetine saylanuımen qwttıqtauın jetkizdi jäne bwdan bılayğı jwmısı tabıstı boluına tilektestigin bildirdi. «Biz Sizdiñ parlamentaralıq baylanıstardı damıtuğa jäne Qıtaydıñ «Bir beldeu, bir jol» bastamasın qoldauğa qosqan jeke ülesiñizdi joğarı bağalaymız», - dedi ol.

Qıtay elşisi Qazaqstannıñ Twñğış Prezidenti N. Nazarbaevtıñ 2-şi halıqaralıq «Bir beldeu, bir jol» ıntımaqtastığı forumına qatısu üşin Beyjiñ qalasına baratın aldağı saparına dayındıq turalı Senat basşısın habardar etti.

Jüzdesuşiler sauda-ekonomikalıq baylanıstardı damıtudağı oñ ürdister men bizdiñ elderimiz arasındağı tauar aynalımı köleminiñ ösuin atap ötip, investiciya, auıl şaruaşılığı, turizm, mädeni-gumanitarlıq ıntımaqtastıq salasındağı özara is-qimıldı küşeytu mümkindikteri bar ekenine toqtaldı.

Senat basşısı eki el arasındağı jastar ıntımaqtastığın belsendi damıtu, atap aytqanda, studentter almasudı jäne bilim granttarın berudi jolğa qoyu qajettigin atap ötti.

D. Nazarbaeva ŞWAA-dağı qazaqtar taqırıbın qozğay kelip,  QHR-dağı etnikalıq qazaqtar Qazaqstan men Qıtay arasındağı qarım-qatınasta «dostıq köpiri» ekenin atap ötti. Taraptar osı salada tuındaytın mäselelerdi özara negizde sındarlı türde şeşuge uağdalastı.

Kezdesu barısında Senat Törağası Qazaqstan azamattarı üşin turistik jäne jeke viza berudi jañğırtu mäselesin köterdi.

Qazaqstan Respublikası Parlamenti
Senatınıñ Baspasöz qızmeti

Abai.kz

0 pikir