Särsenbi, 23 Qırküyek 2020
COVID-19 QAZAQSTANDA. Jwqtırğandar — 107374. Jazılğandar — 102064. Qaytıs bolğandar — 1699
«Soqır» Femida 8919 23 pikir 18 Tamız, 2018 sağat 20:43

Komsomoldar Erbol men Läzzattıñ ruhın qorlamaq pa?

Jetisudıñ atqaminerleri aqılınan aljasqan ba, joq älde bayağı bodandıqtıñ qamıtın köksep jür me, äyteuir komsomoldıñ 100 jıldığı jaqındağalı tüsiniksiz bir alaşapqın bastalıp ketti. Komsomoldıñ şekpeninen şığıp, audan basqarğan, oblıstıq deñgeyde türli lauazımdı qızmetter atqarğan, «Taldıqorğan oblısınıñ qwrmetti azamatı» degen atağı bar Naurız Qılışbaev oblıstıq äkimdiktiñ esigin tozdırıp jürip, "äygili" datağa 13 million qarjı bölgizip alıptı. Endi sol milliondardı da azsınıp, tağı da aranın aşıp otırsa kerek.

Qoş, äñgimeni basınan bastayıq. Bıltır Alaşordanıñ 100 jıldığı jetim qızdıñ toyınday toylanğanın el wmıta qoyğan joq. Tınışbaev, Süleev, Jaynaqov, Sırttanov, Äljanov sındı jüzdegen alaşordaşılardıñ kindik-qoñın juğan Jetisu ölkesi qazaq oqığandarınıñ ğasır bwrınğı eñbegin eskerusiz qaldırıp, tışqan twmsığın da qanatqan joq bolatın. Endi mine, ötken jılı tüyeqwstay basın qwmğa tığıp jatqan Qılışbaevtar oyandı.

Qılışbaev degen kim? Taldıqorğandağı «Üş ata», Qadırğali Jalayıri eskertkişterin ornatuğa atsalısqan azamat. Qazir Taldıqorğannıñ auzı dualı aqsaqalı sanaladı. 13 million teñgeni qağıp tüsu üşin de abıroy kerek qoy. Köne kommunist Naurız aqsaqalda Qwdayğa şükir, abıroy bar. Eñbek ardageri, Almatı oblısınıñ Qwrmetti azamatı sındı ataqtarınan at ürkedi...

Sol Qılışbaevtarğa Taldıqorğan oblısında komsomoldıñ 100 jıldığına arnap asta-tök as berip, wlan-asır toy jasau üşin äkimşilik tarapınan bölingen 13 million qarjı da az bolıp twrğanğa wqsaydı. Olar endi tağı 8 million bolsa ğoy dep, emeurin tanıtıp, oblıstıq äkimdikke alaqan jayıp otırğanğa wqsaydı. Aldımen, sol äli bölinbegen 8 millionnıñ qanday qajettilikke jwmsalatının eseptep köreyik.

Birinşiden, merekelik tösbelgi jasaladı eken. Bwl tösbelgi özimizde emes, sonau Mäskeude dayındaladı. Bir danası – 500 teñge. Qılışbaev bastağan 500 komsomoldıñ keudesine (moynına ma edi) bir kün tağatın «qarğıbauğa» 250 mıñ teñge qarjı şığındalmaq.

Ekinşiden, 250 dana taralımmen 500 mıñ teñgege tarihi estelik kitap jarıq köredi. Lenin men Stalinniñ bar kitabı örtenip, endi bituge tayağanda bw kitap kimge kerek? Bolaşaq wrpaqqa komsomoldar tarihı degen estelik etuge twrarlıq qwndılıq pa? 500 mıñ teñgeniñ közine qaramay tağı bir kitap şığaratınday ne basımızğa kün tudı?

Üşinşiden, «Kel, şırqayıq bärimiz» kitapşası, jarnama plakattarı men şaqıru qağazdarına 1 mln. teñge qajet eken.

Törtinşiden, merekelik dastarhanğa 200 adam şaqırıladı. Olardıñ ärqaysısına 15 mıñ teñgeden aqşa jwmsalmaq. Bwğan jalpı jiıntığı 3 mln. teñge ketpek. Komsomoldardıñ qarnı ras-aq aşqan eken.

Besinşiden, Mäskeudegi 20 qazan küni ötetin komsomoldıñ 100 jıldıq mereytoyına – 1, Almatı qalasında 27 qazanda ötetin komsomoldıñ 100 jıldıq mereytoyına – 20 delegattıñ jol qarajatına – 3 mln teñge kerek eken-mis. .

Bwl 8 million biz söz etip otırğan 13 millionnıñ sırtındağı aqşa. Endi 13 millionnıñ jelge qalay wşatının taldayıq.

Käri komsomoldar ölgende körgen bir toyların Elbasınıñ «Ruhani jañğıru» bağdarlamasımen qabıstırıp jiberip, «Sport pen eñbek egiz» akciyası ayasında Taldıqorğan sport mektebinde üş sportşımen (Rinat Idırısov, oblıs köleminde voleyboldıñ damuına üles qosqan jattıqtıruşı, Aydarbek Japsarbaev, KSRO sport şeberi, boks jattıqtıruşısı, Nikolay Mantrov, KSRO sport şeberi) kezdesu ötkizbek. Kezdesuge sport mektebiniñ oquşıları, qart komsomoldar jäne QR Eñbek eri, olimpiada çempionı Jaqsılıq Üşkempirov arnayı qonaq retinde qatıspaqşı.

«Äkelerdiñ dañqtı jolımen» akciyası ayasında tört bağıt boyınşa mektep oquşılarınıñ ölketanu ekspediciyasın wyımdastırmaq.

Birinşi bağıt – Aqsu, Sarqan, Alaköl

Ekinşi bağıt – Taldıqorğan, Köksu, Kerbwlaq, Panfilov

Üşinşi bağıt – Baqanas, Qapşağay, Qarasay

Törtinşi bağıt – Rayımbek, Kegen, Jambıl

Osılayşa süyegi sıqırlağan komsomoldar dübiri bükil Jetisudı şarpımaq. Olar, tipti, qazaq azattığınıñ simvolına aynalğan Läzzat pen Erboldıñ eskertkişterine gül şoqtarın qoymaqşı. Bwl keñestik ideologiyağa qarsı şıqqan batırlardıñ ruhına tağzım ba, älde äruağın qorlau ma? Keşe ğana azattıqqa talpınğan jastardı qanğa boyağan qızıl komsomoldar emes pe edi? Endi bügin Qılışbaevtar jeltoqsanşılardıñ basına  barıp: "Biz äli biliktemiz" dep keude qaqqısı kelip otır ma? Jalpı, komsomol men jeltoqsan qırğının bir arnağa toğıstıru jay bilmestik emes. Bwl - qasaqana jasalıp otırğan qiyanat. Bwl - äruaqtardı qorlau. Bwl - Azattıqqa wmtılğan jastarğa "sender jeñildiñder" degendi aşıq türde bildiru.

Tize bersek, tek kezdesu men qıdırular... Män-mañızı bar, ilip alarlıq bir şara joq. Osınday bolmaşı tirlikke 13 million azdıq etse, jetisken ekenbiz. Qoş!

Tüyin

Endi Qılışbaevqa 13 million teñgeni Almatı oblıstıq İşki sayasat basqarması qaydan tauıp bergenine bir auız söz qosa keteyik. Biluimizşe, bwl 13 million oblıstıq BAQ-qa tender arqılı bölinuge tiis qorjındağı qarjı körinedi. Baspasözge tiesili qarjını jırıp äketu üşin de jürek kerek qoy. Qılışbaevtar osınday ölermendigi arqılı bükil qazaq tarihınıñ, ruhınıñ, täuelsizdik jolında şeyit ketken äruaqtardıñ betine tükirip jatqanın sezine me eken? Oblıstıq äkimşilik «beker mal şaşpaqtı» dereu toqtatuğa tiis! Süyegin süyretken komsomoldan qorqamın dep jürip, qara halıqtı aşındırıp almauı kerek.

Nwrgeldi Äbdiğaniwlı

Abai.kz

23 pikir