Jeksenbi, 20 Qırküyek 2020
COVID-19 QAZAQSTANDA. Jwqtırğandar — 107199. Jazılğandar — 101822. Qaytıs bolğandar — 1671
Qwyılsın köşiñ 6063 29 pikir 20 Mamır, 2018 sağat 09:05

Süyinşi, şekaraşılar deportaciyalağan Jaynagül elge oraldı!

Almatı äuejayındağı şekaralıq baqılau qızmetkerleri «Qıtay azamatısıñ» dep, kelgen jerine keri qaytarğan Jaynagül elge oraldı! Bügin. Aman-esen eken. Jaynagül mingen Istambwl – Almatı bağıtındağı wşaq tañğı 04:45-te äuejayğa kelip qondı. Osıdan 17 kün bwrın Mısırdağı oquın ayaqtap, Qazaqstanğa kelgende, şekaraşılar şetke tepken qandasımızdı kütip aluğa, 1 jarım jasar säbii Aqjolmen birge biz de bardıq.

Jaynagül Ğajapqızınıñ wltı – qazaq. Qıtay azamatşası. Qazaqstanda jürip-twruğa berilgen ıqtiyarhatınıñ merzimi 2021 jılğa deyin jaramdı bolğan. Küyeui Nwrseyit Tölegen men wlı 1,5 jasar Aqjol Nwrseyitwlı Qazaqstan azamatı. Jas otbası Mısırda bilim alıp, oquların ayaqtasımen Qazaqstanğa kelgen. Äuejaydağı şekaraşılar Jaynagüldiñ ıqtiyarhatınıñ jaramsızdığın aytıp, sol küni-aq, kelgen jağına qaytarıp jibergenin elden bwrın Abai.kz aqparattıq portalı jazğan edi.

Bügin anasın asığa kütken säbidiñ tilegi orındaldı. Jaynagül aman-esen jetti elge.

Biz sol küni, 3-mamır küni tañğı 03:20-da äuejayda bolğan oqiğanıñ jay-japsarın, jalğasın Jaynagüldiñ özinen swrap bildik.

Jaynagül Ğajapqızı:

- Almatıdan Dubayğa jetken soñ, sol jaqtan Türkiyağa wştım. Türkiyada Fazıl deytin ağalardıñ qasında twrdım. Ol kisiler meniñ jatın ornımdı, twraqjayımdı rettep berdi. Qwjat retteumen, arı-beri jürgende jol körsetip, jetetin jerime jetkizip, qoldarınan kelgen bar kömekterin ayap qalğan joq.

Türkiyadağı atqaminer azamattar meni «Qıtaydıñ qazağı» degen sipattan tıs, «Türkiya qazağı» degen sipat berip, Konsulge alıp bardı. Jağdayımdı aytıp, tüsindirdi. Sonday-aq, Mäjilis deputatı Bekbolat ağanıñ tapsıruımen, ol kisiniñ kömekşisi Erden ağa Qazaqstan Elşiligine barıp, barlıq jağdaydı tüsindirip, meniñ mäselemdi zañdı jolmen, tezirek şeşip beruin swradı. Söytip, 1 aptanıñ işinde viza aldım.

Äuejaydağı oqiğa turalı aytar bolsam, biz Mısırda oqıp, tikeley reys bolmağan soñ, Dubay arqılı wşıp kelgen edik. Äsili meniñ ıqtiyarhatımnıñ merzimi 2021 jılğa deyin jaramdı bolğan. Soğan senip, eş uayımsız kelgen edim. Äri zañ boyınşa ıqtiyarhatı bar adamğa viza berilmeydi degen ereje bolğan.

Äuejaydağı şekaraşılar: «6 ayda bir teksertip twrmağandıqtan ıqtiyarhat küşin joyğan. Sondıqtan siz keri qaytarılasız» dep, meni Dubayğa qaytardı. Basqa sebepterin aytpadı.

Biz Almatı äuejayına tım bolmağanda 1 täulik qaldıra twrudı swradıq.  Tipti bolmasa jartı täulik küte twruın ötindik. Jarıq tüsip, el jwmısqa şıqqanşa äuejayda qalsaq dedik. Şekaraşılar ol ötinişimizdi orındağan joq. Men eldi ayıptamaymın. Bwl, sol qızmetkerdiñ qateligi dep oylaymın.

Şekaraşığa bizge eşqanday eskertu jasalmağanın, ıqtiyarhattıñ jaramsız ekenin bilmegenimizdi aytqan edik, şekaralıq baqılau qızmetkeri, özimizge dürse qoya berdi. «Nege öziñ zañdı oqıp, bilip jürmeysiñ?» dedi. Ras, men Köşi-qon zañı özgergen, özgermegenin bilgen joqpın. Menen ketken qatelik osı bolsa kerek.

Keyin osı «Abai.kz» saytında jazılğannan keyin bildik. Äueli eskertu berilip, ekinşi jolı  ayıppwl salıp, üşinşi ret tärtip bwzğan jağdayda ğana elden şığaru kerek eken. Ol jağınan biz sauatsız boldıq.

Iä, biz şetelde twrdıq, oqıdıq. Köp jağdaydan habarsızbız. Biraq, däl osılay, elime kelgende esikten kirgizbey, qwddı qılmısker sekildi äuejayda jartı täulik twrğızbay quıp şıqqanı adam retinde janıma battı.

Men tipti, sol küni şekaralıq tekseruden ötip twrğanda auırıp, qwlap qaldım. Däriger kelip tekserdi. «Seniñ ayağıñ auır. Qattı qobaljuğa bolmaydı» dep däri berip, su berip jatqanda, şekaraşılar qağazdı toltırıp ülgergen eken.

Meni dereu qaytarıp jiberdi. Pasportımdı qolıma da bergen joq. Qwddı qılmısker sekildi deportaciyaladı. Bireudi öltirgen adam siyaqtı boldım. Pasportımdı Dubaydıñ äuejayında twrğanda da qolıma bermedi. Öytkeni, şekaradan qaytarılğan degennen keyin, qanday qılmıspen qaytarılğan dep, olar da qorıqtı. Meni şekaradan şığıp kete me dep, baqılauğa aldı.

Sol Dubaydıñ äuejayında 23 sağat twrdım.  Men sol küni sağat 07:00 şamasında äuejayğa kelip tüstim. Dubaydağılar mağan 16:00-ge deyin uaqıt berdi. Äytpese Mısırğa qaytaramız dedi. Öytkeni Mısırdan kelgen edim.  Men: Mısırdağı oquım ayaqtalğanın, ol jerdegi tirkeuimniñ uaqıtı bitkenin, olar kirgizbeytinin ayttım.  «Onda Qıtayğa jiberemiz. Sebebi, Qıtay azamatşasısıñ» dedi. Ol jaqta eşkimim joq ekeni aytıp, uaqıt swradım. Sağat 16:00-ge deyin uaqıt berdi. Osı uaqıtqa deyin viza almasam, Qıtayğa deportaciyalaytının ayttı.

Sol aralıqta azamattar jügirip jürip, Türkiyağa elektrondı viza aldıq. Sağat 15:45-te elektrondı viza qolıma tidi.  Sosın ğana, pasportımdı berip, keşke deyin bilet alıp, ketuim kerektigin eskertti.  Swrap jürip, keşki 18:00-ge deyin bilet satıp aldım. Söytip, wşaq wşatın tañğı 06:00-ge deyin äuejayda jürdim.  Türkiyağa 4-mamır küni 14:00 şamasında jettim.  Mine, tura 16 kün boldım onda.  

Birinşiden, Allağa sansız şükir aytamın. Jalğızın jauğa bermegen qazağım meni de qañğırtıp qoymadı. Mine, bas-ayağı 16 künde elge keldim. Alıp keldi. Meniñ otbasımnıñ tağdırına, meniñ tağdırıma bey-jay qaramay, atsalısıp jügirip jürip qwjattarımdı rettep bergen ağalarıma alğısım şeksiz. Sonıñ işinde, özderiñizge, Bekbolat, Erden ağalarğa, Türkiyadağı barlıq atqaminer azamattarğa şeksiz rahmet aytamın.

Nwrseyit Tölegenwlı:

– Meniñ alğıstan basqa aytarım joq. Bügin qattı quanıştımın. Bizdiñ otbasınıñ basına tüsken qiındıqqa qoldau bildirip, tileules bolğan barlıq ağalarğa, qazaq halqına rahmet aytamın. Äsirese, birinşi bolıp kelip, meniñ otbasımnıñ tağdırına bey-jay qaramağan, sizge, «Abai.kz» saytına, basqa da jurnalist bauırlarğa,  Bekbolat, Erden ağalarğa  alğıs aytamın. Sizderge Allanıñ nwrı jausın!

Esteriñizge sala keteyik, juırda «Abai.kz» aqparattıq portalında «Masqara! Almatı äuejayı. Şekaralıq baqılau qızmeti jükti äyeldi keri qaytardı» attı maqala jariya boldı. Onda Nwrseyit Tölegenwlı esimdi Qazaqstan azamatınıñ jükti äyelin Almatı äuejayındağı şekaralıq baqılau qızmetiniñ elden deportaciyalağanı bayandaldı.

Oqiğanıñ qısqaşa mazmwnı bılay: 2 mamır küni tañğı 03:20 şamasında Nwrseyit Tölegenwlı, äyeli Jaynagül Ğajapqızı jäne 1,5 jasar wlı Mısırdan Almatı äuejayına kelip qonadı. Jaynagül QHR azamatşası. Qazaqstandı jürip-twruı üşin berilgen ıqtiyarhatı bar. Iqtiyarhattıñ jaramdılıq merzimi 2021 jılı ayaqtaluı tiis bolğan. Alayda bwlar Qazaqstan aumağında 183 künnen artıq uaqıt bolmağandıqtan, Jaynagüldiñ ıqtiyarhatı avtomattı türde jaramsız dep tanılğan. Äuejaydağı şekara qızmeti solay dep tüsindirgen. Osılayşa Nwrseyittiñ özin jäne 1,5 jasar wlın elde qaldırıp, jükti äyelin sol küni Mısırğa qaytarıp jibergen. Bwl jaylı mına siltemeden tolıq oqi alasızdar. http://abai.kz/post/69884

Nwrseyittiñ basına tüsken auır jağdaydı tolıq bayandağan maqala «Abai.kz» aqparattıq portalında jariyalandı. İle-şala bwl mäsele qoğamdıq pikir tudırıp, basqa da aqparat qwraldarı atalğan maqalanı köşirip bastı. Atap aytsaq, «qazaquni.kz», «dalanews.kz», «kaz.365info.kz», «talqy.kz», «minber.kz», «adyrna.kz» sayttarı Nwrseyittiñ mäselesin qoğam talqısına wsındı.

Endi sol turalı jazayıq:

03.05.2018 jıl. Sağ.20:07. Abai.kz : «Masqara! Almatı äuejayı. Şekaralıq baqılau qızmeti jükti äyeldi keri qaytardı». 8150 oqılım. 69 pikir.

03.05.2018 jıl. Avtorı – Nwrgeldi Äbdiğaniwlı. . Abai.kz-ke silteme bergen.  Qazaquni.kz:  «Masqara! Äuejaydan jükti äyeldi keri qaytarğan Şekaralıq baqılau qızmeti sauatsız ba, jauapsız ba?!.» 21390 oqılım. 8 pikir.

03.05.2018 jıl. Avtorı – Nwrgeldi Äbdiğaniwlı. . Abai.kz-ke silteme bergen.  adyrna.kz: «Masqara! Almatı äuejayı. Şekara qızmeti jükti äyeldi keri qaytardı». 1122 oqılım.

03.05.2018 jıl. Avtorı – Nwrgeldi Äbdiğaniwlı. . Abai.kz-ke silteme bergen.  minber.kz: «Almatı äuejayı: Kedendik baqılau qızmeti jükti äyeldi keri qaytardı». 216 oqılım.

04.05.2018 jıl. Sağ.10:18. kaz.365info.kz: «Jılamaşı, Nwrseyit… Kedenşiler onıñ jükti äyelin elden nege quadı?». 277 oqılım.

04.05.2018 jıl. dalanews.kz: «Iqtiyarhatı jaramsız». Şekara qızmeti jükti äyeldi keri qaytardı». 2047 oqılım.

04.05.2018 jıl. talqy.kz: «Şırıldap jılap 1,5 jastağı wlı qaldı».

Sonday-aq, bwl mäselege äleumettik jeli qoldanuşıları da ün qosıp, talqı jasadı. Materialdı bölisken jwrttıñ qarası köp.

Biz «Masqara! Almatı äuejayı. Şekaralıq baqılau qızmeti jükti äyeldi keri qaytardı» attı maqalamızdı jazu barısında Almatı Halıqaralıq äuejayında ornalasqan Keden qızmetine habarlastıq. Äuejaydağı Kedendik qızmet mamanı Ermek Bolatbekwlı degen azamat, bwl iske Keden qızmetiniñ qatısı joq ekenin ayttı.

«Bwl iske Keden qızmetiniñ tük qatısı joq. Jekelegen adamdarmen aynalıspaymız. Ol kisi şekaralıq tekseristen ötu kezinde wstalğan ğoy. Şekara qızmetkerleri adamdardıñ qwjattarın tekseredi. Solar biledi bwl istiñ män-jayın», - dep jauap qayırdı.

Ermek Bolatbekwlı wsınğan kontakti boyınşa Almatı äuejayındağı şekara qızmetine habarlastıq. Telefon twtqasın orıs tilinde söyleytin bir kelinşek köterdi. Äuejaydıñ şekara qızmeti telefon arqılı keñes, aqparat bermeytinin ayttı.

«Biz telefon arqılı aqparat nemese keñes bermeymiz. Biz 24 sağat boyı jwmıs jasaymız. Almatı Halıqaralıq äuejayınıñ 2 qabatındağı Halqaralıq wşu beketinde ornalasqanbız. Sol jerge kelip, öziñizge kerek tilde aqparat ala alasız», - dep qısqa qayırdı.

Sodan, äuejaydıñ şekaralıq baqılau qızmetine bardıq. Ondağılar Jaynagüldi keri qaytarğan şekaraşılar jwmıs auısımın tapsırıp ketkenin ayttı. Degenmen, biz talap qoydıq. Atı-jönin jariyalaudan üzildi-kesildi bas tartqan şekaralıq baqılau qızmetiniñ mamanı komp'yuter bazasınan bolğan jaydı anıqtap, bizge ıqtiyarhattıñ jaramsızdığınan keri qaytarılğanın, resmi tüsinikteme nemese pikir bere almaytının ayttı.

Jaynagüldi elden deportaciyalaudıñ dwrıs-bwrıstığın bilu üşin biraz estiktiñ tabaldırığın tozdırdıq

Aqırı mine, Jaynagül aman-sau elge oraldı. Endi Jaynagül Ğajapqızı Qazaqstan azamattığın aludı josparlap otırğanın aytadı.

Nwrgeldi Äbdiğaniwlı

Abai.kz

29 pikir