Jeksenbi, 31 Mamır 2020
COVID-19 QAZAQSTANDA. Jwqtırğandar — 10858. Jazılğandar — 5220. Qaytıs bolğandar — 40
Körşiniñ köleñkesi 17844 39 pikir 1 Naurız, 2018 sağat 09:21

Çjan Han'huey mırzanıñ elşilik qızmetinen merziminen bwrın ketuin talap etemiz!

Qıtay Halıq Respubliksı

 Törağası Si Czin'pin mırzağa

Qazaqstan Respublikası

 Sırtqı ister ministri

Q.Q. Äbdirahmanovqa

Qazaqstan azamattarı atınan

 

AŞIQ HAT

Qazaqstan men Qıtay ejelden körşi, dos el. Qıtay Qazaqstan Täuelsizdigin alğan kezde, sol täuelsizdikti alğaşqılardıñ biri bolıp moyındap,  diplomatiyalıq baylanıs ornatqan memleket.

Sol şınayı dostıq pen qarım-qatınastıñ arqasında eki eldiñ de ekonomikası qarıştap damıdı, şegarası bekidi. Äsirese, eki elde bölinip qalğan etnikalıq qazqtardıñ barıs-kelisi jiilep, älemdik zañnamalar ayasında köşi-qon sayasatı jolğa qoyıldı.

Ökinişke oray, sol soñğı bir-eki jıldıñ köleminde Qıtaydıñ Şıñjañ ölkesinde twratın etnikalıq qazaqtardıñ sayasi qısımğa wşırauı bizdiñ köñilimizge qattı qayau tüsirdi . Naqtılap aytsaq, arğı bettegi tuıs-tuğanmen barıs-kelisti bılay qoyıp, telefon arqılı söylesudiñ özi mwñ bolıp otır. Baylanıs tügel üzildi...

Mwnday jağdayda, osı eldegi halıqtıñ arız-armanın tıñdap, eki el basşılarına jetkizetin, özi elşilik qızmetin ötep jatqan eldiñ sayasi jağdayı men twraqtılığı turalı memleket basşısına dwrıs aqparat jetkizetin, söytip, wzaqtan beri jalğasıp kele jatqan dostıqtıñ altın arqauın odan arı bekemdey tüsetin elşiler ekeni belgili.

Jasıratını joq, Qıtay Halıq Respublikasınıñ Qazaqstandağı Tötenşe jäne ökiletti elşisi  Çjan Han'huey mırza bwl missiyasın orınday alğan joq. Kerisinşe, bwzdı!

Atap aytar bolsaq:

1. Çjan Han'hoy 2016 jılı Astanada BAQ ökilderimen kezdesude Qıtay men Qazaqstan arasındağı vizalıq rejim sayasatına qatıstı pikirin bildirip, qazaq biliginiñ äreketin sınğa aldı. Nätijesinde, «Qazaqstan men Qıtay arasında qalıptasqan dostıq baylanıstardı, sonday-aq QR-dağı QHR Elşiliginiñ diplomattarınıñ tuıstarı QR-na sapar jasau üşin qolaylı jağdaylar qwru mümkindigin qarastıru turalı ötinişin jäne özara senimdilik pen özara tüsinistikti nığaytudı eskere otırıp, osı twlğalar sanatına konsuldıq alımsız Qazaqstanda ärbir kirude 90 künge deyin bolu qwqığın beretin «V2» qızmettik vizaların räsimdeu turalı şeşim qabıldanğan eken (QR Salıq kodeksi, 553 b.). Al, kerisinşe, Qıtaydıñ qazaqstandıqtarğa viza berudi şektegeni belgili bolıp otır. Qazaqstan tarapımen qabıldanıp jatqan oñ qadamdarğa qaramastan, Qıtay tarapı 2016 jılğı 1 aqpanda qazaqstandıq azamattar üşin jeke turistik (turistik top 5 nemese odan köp adamnan qwraluı tiis) jäne iskerlik vizalardı räsimdeude şekteulerdi bir jaqtı engizgen. Qısqası, Çjan Han'huey mırza öziniñ diplomatiyalıq qızmette sauatsızdığın körsetip, külkige qalğan. Keñ peyildi, dostıqqa adal Wlı Dala eli Qıtay Elşisiniñ bwl ausarsoqtığına tiksine qarağan bolatın. Sol basqosuda qızdı-qızdımen «Olar (Qazaqstan biligi – red.) kimmen betpe-bet kelip otırğandarın bile me?» dep dauıs köterip, qoqan-loqı körsetkenin bükil düniejüzi estidi.

Esiñizde bolsın, Qazaqstan – Qazaqstan bolğalı älemniñ eñ ülken derjavası sanalatın AQŞ-tıñ özi bizdiñ Otanımızğa bwlay bir auız qattı söz aytıp körgen emes. Batıstağı alıp körşimiz Resey de solay. Wlt Köşbasşısı Nwrswltan Nazarbaev dünieniñ qay tükpirine barsa, zor qwrmetpen qarsı alınadı. Tipti, Hançjou qalasında ötken G-20 Sammitine Nwrswltan Nazarbaev Si Czin'pin mırzanıñ erekşe qonağı bolıp qatısqan joq pa?!

2. Biz Qıtayda twtqığa tüsken etnikalıq qazaqtardıñ osında bölinip qalğan tuıstarınıñ mäselesin köterip birneşe märte baspasöz mäslihatın ötkizdik. Mıñdağan adamnıñ ötinişin jiıp, Qıtay Elşiligine tapsırdıq. Mine, üş aydıñ jüzi boldı, Çjan Han'huey mırza sonıñ bireuine äli qanağattandırarlıq jauap bergen joq. Esesine, Elşi mırza Qıtaydıñ şetelge bağıttalğan diaspora sayasatın orındaudan arığa asa alğan joq. Şıñjañ ölkesinde dinge qarsı aşıq küres jürip, qwran kitaptar men jaynamazdar örtelip, namaz oquğa tiım salınıp jatqanda Çjan, Almatıda şetten kelgen qazaqtardı jiıp alıp, mwsılmandardıñ Oraza ayt merekesine aspa-tök dastarqan jayıp, toylap beredi. Bwl ne qılğan «sayasat»? Mwsılmandardı mazaqtau ma, älde eki jüzdilik pe?! Söytip, Qazaqstanğa Qıtaydan köşip kelgen qazaqtı ekige bölip, arazdıq tudıruda;

3. Qazaqstan men Qıtay arasındağı diplomatiyalıq qarım-qatınas 1992 jılıdıñ 3 qañtarınan beri ornaptı. Sodan beri Qıtaydıñ qanşama Tötenşe jäne ökiletti elşisi Elimizge kelip qızmet atqardı, täp osı Çjan Han'huey elşi bolğan kezdegidey eki eldiñ arasındağı etnikalıq qazaqtıñ qwqığı taptalğan joq jäne mäselesi uşıqqan emes...

Qısqası, Çjan Han'huey mırza elşi boludan göri eges tudırğısı kelip twratın adam sekildi.

Sondıqtan biz eki eldiñ Wlı Dostığı men strategiyalıq barıs-kelisi bwrınğıday bayandı boluı üşin, Qıtay Halıq Respublikasınıñ Qazaqstandağı Tötenşe jäne ökiletti elşisi  Çjan Han'huey mırzanıñ Elimizdegi Elşilik qızmetinen merziminen bwrın ketuin qatañ talap etemiz!

Sonday-aq, QR Sırtqı ister ministri Q.Q. Äbdirahmanov mırzadan bizdiñ osı qatañ talabımızdı QHR Törağası Si Czin'pin mırzağa jetkizudi ötinemiz!

Qwrmetpen:

Jarqınbek Jwmadan

Rizaman Ahmet

Qojamqwl Aybübi

Ajıbek Oraz

Abai.kz

39 pikir