Beysenbi, 6 Tamız 2020
COVID-19 QAZAQSTANDA. Jwqtırğandar — 94882. Jazılğandar — 67031. Qaytıs bolğandar — 1058
Aymaq 3107 0 pikir 18 Qaraşa, 2017 sağat 23:51

Jalağaştağı jarqın ister jalğasın tauıp jatır

Qızılorda oblısınıñ Jalağaş audanında «Serpin» industrialdı öndiris aymağında ornalasqan   «Örken Älem» JŞS-nıñ «Arnayı kiim tigu şeberhanasınıñ» jalpı qwnı 38,2 mln teñgeni qwraydı. «Nätijeli jwmıspen qamtu jäne jappay käsipkerlikti damıtudıñ 2017-2021 jıldarğa arnalğan bağdarlamasınıñ» birinşi bağıtı boyınşa 20 adam üş ay merzimde tiginşi mamandığın oqıp, käsibi dayarlıqtan ötken.  Ceh meñgeruşisi Aqılhan Bosşaevanıñ aytuınşa, osı uaqıtqa deyin jwmıssız otırğan qız-kelinşekter jwmısqa belsene kirisip ketken körinedi. Memlekettik tapsırıs arqılı äskeri kiimder tigip jatqan olardıñ şeber qolınan şıqqan bwyımdar sapalı körinedi. Eñbekaqıları uaqıtılı. Sonday-aq, jılı da jaylı şeberhanada jwmıs jasauğa  barınşa qolaylı jağday jasalğan. Keleşekte käsip ayasın keñeytip, jalpı 40 adamdı jwmıspen qamtu josparlanıp otır.

Bwdan äri aymaqtıq aqparat qwraldarınıñ ökilderi Jañatalap auılındağı «Ayzere» jün tütetin cehınıñ jwmısın kördi. Auıl twrğını Meyramkül Romanqwlova «Nätijeli jwmıspen qamtu jäne jappay käsipkerlikti damıtu» bağdarlaması boyınşa 1 mln teñge jeñildetilgen nesie, sonımen qatar, «Biznestiñ jol kartası – 2020» bağdarlaması arqılı 600 mıñ teñge grant ielenip, atalğan jobanı jüzege asırıp otır.

Joba jetekşisi M.Romanqwlovanıñ aytuınşa,  osı uaqıtqa deyin auıldağı uaq maldıñ jüni iske aspay, ısırap bolıp jatatın. Endi auıl twrğındarı mal jünin osında äkelip ötkizedi. Odan äri jün juılıp, öñdelip, boyalıp, kiizder, tekemetter, körpe-körpeşeler äzirlenedi. Mwnda qazirgi tañda üş adam jwmıs jasaydı. Jobanıñ bastı maqsatı – kiiz üy jabdıqtarın dayındau bolğandıqtan, olar türli-tüsti jipter iirip, kiiz üydiñ bauların, beldeulerin toqidı. Bir sözben aytqanda, wlttıq naqıştağı bwyımdardı äzirleu isi jas wrpaqpen jalğasatını auıldıñ qarttarın da quantadı.

Al Mädeniet auılındağı «Janayım» balabaqşası osı jıldıñ qazan ayınan jwmısın bastağan bolatın. Büginde balabaqşada 3-5 jas aralığındağı 50 bala mektepke deyingi tärbiemen qamtılğan. Jalpı mwnda 11 adam jwmıs jasaydı. Balabaqşa meñgeruşisi Güljan Hayrullaqızın äñgimege tartqanımızda, ol jobanıñ qwrıltayşısı jas käsipker A.Ämireeva balabaqşa ğimaratına qajetti üydi satıp alıp, talapqa say jabdıqtağan. Balalar mwnda qazaq jäne orıs tilderin üyrenip, jalpı bilim beru bağdarlamasınıñ ayasında tärbielenude. Balabaqşanıñ qızmet aqısı – 3000 teñge, onıñ işinde köp balalı analarğa jeñildikter qarastırılğan.

Audandağı käsipkerlik jobalardıñ işinde köpjıldıq täjiribesi bar «Säygülik» şarua qojalığınıñ ornı erekşe. Olay deytin sebebimiz, bwl otbasılıq käsipkerlik qwrılım osıdan tört jıl bwrın, yağni 2013 jılı jwmısın bastağan edi. Dälirek aytsaq, sol jılı memlekettik «Sıbağa» bağdarlamasımen «Auıl kredittik seriktestigi» JŞS-nan 5 mln  teñge nesie alıp, et bağıtında müyizdi iri qara malın ösirudi qolğa alğan bolatın. Alğaşqıda 35 bas maldı kütimge alıp, onı köbeytu maqsatında köp jwmıstar jasadı. Sonıñ nätijesinde, büginde şarua qojalığında müyizdi iri qara malınıñ sanı 150-ge juıqtadı. Biılğı jılı jüz  analıqtan 62 payız töl alındı.

«Säygülik» şarua qojalığınıñ törağası Qabılbek Nwrmağanbetovtıñ negizgi mamandığı – mal därigeri, sondıqtan ol bwl şaruanıñ qır-sırın jetik biledi. Öziniñ aytuınşa, jılqı baptap, tazı ertip, sayat qwratın qazaqtıñ töl dästürin janına jaqın twtadı. Sondıqtan balaların jeti atasın bilip, jeti qazınasın tügendep, wlttıq qwndılıqtı wğınıp, ata käsipke beyim boluğa baulıdı. Şañıraq şırayı, altı balanıñ anası Baqıt apamız ağarğan önimderinen ayran, qwrt, may, irimşigin dayındap, kelinderin de osığan üyretip otıradı. Eñbegi qaytıp, eki wlı mal şaruaşılığına den qoydı. Al osığan deyin äkesiniñ bastamasına qolğabıs etip kelgen Älimbek Nwrmağanbetov büginde «Sıbağa» bağdarlaması boyınşa öz aldına käsip aşıp, jwmısın bastadı. Qazirgi tañda «Säygülik» şarua qojalığında qısqı mausımğa äzirlik jwmıstarı ayaqtalıp, qıstau basına elektr jarığın jetkizu bağıtında jwmıstar jürgizilip jatır eken. Jañalıqqa janı qwmar Qabılbek ağamız mwnda kün közinen quat alatın qondırğı ornatuğa arnayı mamandarğa tapsırıs beripti.

Auıl-aymaqqa qadiri mol azamat büginde auıldıq ardagerler keñesiniñ törağası, eldiñ birligi men ıntımağın saqtap, auıl jastarınıñ adal eñbek etuine, jalpı qarapayım eñbekke degen qwrmettiñ qalıptasuına köp köñil böledi. Ötken jılı «Mereyli otbası» oblıstıq bayqauınıñ jüldesin jeñip alğan bwl şañıraqta bayıptı tärbieniñ berekeli ülgisi saqtalğan.

Berik Amanhan

Qızılorda

Abai.kz

0 pikir