Särsenbi, 8 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Bizdiñ şeneunik 4551 13 pikir 26 Qazan, 2017 sağat 16:13

«Jırtıq tesikke külipti» degen osı şığar...

 

 

Prem'erimizdiñ Armeniyada jasağan mälimdemesine qarap otırıp, qazaqtıñ «Jırtıq tesikke küledi» degen mäteli oyıma tüsti.

Sonımen Armeniyanıñ astanası Erevanda ötip jatqan Euraziya ekonomikalıq odağına müşe elderdiñ ükimetaralıq keñesinde QR prem'er-ministri Baqıtjan Sağıntaev ne dedi? Bılay dedi: «QHR-dıñ 2016 jılğı mälimetteri boyınşa, Qıtaydan Qırğızstanğa engen importtıq tauarlar 2,6 mlrd dollar, al Qırğızstannıñ deregi – 900 mln dollar. Qırğızstan qıtaydıñ kiimderi men ayaq kiimderin Qazaqstan men Reseyden göri köbirek äkeledi».

Al, äkelse ne bolıptı? Demek, Qıtay men Qırğızstan arasındağı sauda aynalımı Qazaqstan - Resey - Qıtay arasındağı tauar tasımalınan köp artıq. Bwl – bir. Ekinşiden, Qırğızstan men Qıtay arasındağı sauda-sattıq – eki eldiñ mäselesi. Oğan kiligudiñ qajeti qanşa?

«Tek Qırğızstanda ğana Qıtay importınıñ dinamikası saqtalıp twr», - deydi Ükimet basşımız. Qazaqstan men Resey eşteñe öndire almay otırsa, Qırğızstanda ğana Qıtay importınıñ dinamikası saqtalmağanda qaytedi?.. Euraziyalıq ekonomikalıq odaq qwrıp, sol odaqtıñ şeñberinde barımen bölise almay, birlesip öndiristi jolğa qoya almay otırıp, älgindey pikir bildiru – bwl endi sıpayılap aytqanda wyat mäsele.

Qazaq-qırğız şekarasındağı qarbalas turalı ayta kelip prem'erimiz: «Qazaqstan jağı salıqtan tüsetin tüsimdi kemitip almau men kontrabandalıq äreketterdi tıyudan özge äreketke barıp otırğan joq», -deydi. Oyboy-ou, mına sözdi kim aytıp otır özi? Au, kontrabandanıñ kökesi bizde emes pe? Anau Qorğas pen Dostıq kedeninde künde  wrlıq. Qıtaydan tauardı basıp alıp, ıñıranıp äreñ ötetin avtokeruenderge salınatın salıqtıñ qanşası memleket qazınasına qwyılıp, qanşası wrı qaltalarğa ketip jatır? Osı bir jalqı swraqqa Sağıntaev Erevanda otırıp sayrağanınday sayrap jauap bere ala ma? Qazirgi Ükimet basşısı «ğasır qılmısı» atalğan äygili «Qorğas isin» wmıta qoymağan şığar. Qılmıstıq qwjatı 150 tom bolğan bwl oqiğadan Qazaqstannıñ kedeni sabaq alıp, sabasına tüsti dep ayta alar ma eken bizdiñ prem'erimiz? Äy, qaydam... Sondıqtan Qazaqstan salıqtan tüsetin tüsimdi kemitip almau men kontrabandalıq äreketterdi tıyudı aldımen özinen bastağanı abzal. Äytpese, jırtıqtıñ jırtañdap tesikke külgeninen eşteñe önbeydi.

D. Qasenwlı

Abai.kz

13 pikir