Beysenbi, 13 Tamız 2020
COVID-19 QAZAQSTANDA. Jwqtırğandar — 101372. Jazılğandar — 76756. Qaytıs bolğandar — 1269
Aymaq 4433 0 pikir 14 Tamız, 2017 sağat 06:53

Qostanaydağı Ibıray kesenesin «Sakral'» saqtap qaldı

Qostanay –halqımızdıñ ıstıq ıqılası men iltipatına bölengen talay-talay azamattardıñ kindigi kesilgen qasietti ölke. Solardıñ biri ğana emes, biregeyi de körnekti ağartuşı, wlı wstaz, talanttı aqın,tälimdi jazuşı Ibıray Altınsarin atamız ekendigine dau joq. Alayda bir ökiniştisi, tuğan jerimizdiñ dañqtı wrpağına degen qwrmetimiz oydağıday bolıp otır dep ayta almas edik. Onıñ bayağıda boy kötergen eskertkişi äbden tozğan, är jeri şıtınap, müldem eskirgen. Zaman talabına da say kelmeydi. Bügingi künniñ ruhına say jañadan bir zäulim eskertkiş twrğızuğa eşkimniñ de moynı jar berer emes.

Al endi osındağı Ibıray Altınsarin atındağı keseneniñ jayın aytsaq janımız auıradı. Büginde ol da äbden azıp-tozğan. Qañğıbastardıñ mekendeytin ornına aynalğan. Keybir daraqı jastar osında kelip aqañdı simirgendi wnatatın körinedi. Özi oblıs ortalığınıñ däl irgesinde twrğandıqtan it pen qws ta äues. Olay bolatın sebebi, onıñ naqtı iesi joq. Sondıqtan da eşkimniñ da bası auırmaydı, baltırı da sızdamaydı. Obalı ne, bwl jaydı aytıp, dabıl qaqqan ziyalı qauımnıñ barmağan jeri, aşpağan esigi joq. Alayda, osında oblıstı basqaruğa kelgen öz ölkemizdiñ tülegi de, ne bolmasa şetten kelgeni de bwl mäselege tipti de nazar audarmadı. Jwrtşılıqtıñ dabılına qwlaq ta aspadı.

Osılayşa kesene jöndelip, halıq igiligine jaraydı-au degen ümitimiz üziler şaqta, quanıştı habar estidik. Keseneni tübirimen qayta jañğırtu jwmıstarı bastalıp, tipti jaqın arada ayaqtalatın körinedi. Ol bitken soñ bwl kesene arşığan jwmırtqaday äp-ädemi bolatın türi bar. Jöndeu-smetalıq qwjattı dayındauğa ğana 4,5 million, al onı jüzege asıruğa 60 millionnan astam teñge bölinipti. Keleşekte bwl keseneni öz menşigine alatın qojayın da tabılıptı. Bwl eskertkiştiñ körkin aşu üşin Mañğıstaudan märmär tas aldırılıp, säuletine säulet qosuğa barın salıp jatqan jayı bar.

Börkimizdi aspanğa atıp quandıq. Osılayşa Ibıkeñniñ aruağı riza bolatın igilikti istiñ atqarılğanınıñ kuäsi bolıp, köñilimiz bir jaylanıp qaldı. Bilik basındağılar halıqqa bir taban bolsa da jaqınday tüsken eken dep işimiz de jılığan.

Alayda, talay jıldan beri kütim körmegen bwl keseneniñ ayaq astınan jañartılıp, jañğırtılıp sala beruiniñ özindik sırı bar eken. Elimizde mañızdı jerlerge aparatın turistik marşruttı qamtitın  «Qazaqstannıñ sakral'dı geografiyası» attı joba qabıldanıptı. Oğan oblısımızdan osı kesenesimen qatar Keyki batırdıñ kesenesi, Amankeldi Imanovtıñ ziratınıñ basındağı eskertkişi, Torğaydağı geoglif tärizdi eskertkiştermen qatar osı Altınsarin kesenesi de engiziletin körinedi. Minekey, köpten beri qisını kelmey jürgen bwl şaruanıñ ıñ-şıñsız äri jedel bituiniñ bir sırı osında jatqan sekildi.

Qalay bolğanda da Qostanay jwrtı Ibıray atasınıñ kesenesiniñ qayta tülep, jañadan aşıluın tağatsızdana kütip jür.

Kesenedegi jöndeu jwmıstarınan körinis

Jaybergen Bolatov, Qostanay

Abai.kz

 

 

0 pikir