Seysenbi, 14 Şilde 2020
COVID-19 QAZAQSTANDA. Jwqtırğandar — 61755. Jazılğandar — 35911. Qaytıs bolğandar — 375
Kök tudıñ jelbiregeni 3744 0 pikir 24 Aqpan, 2015 sağat 13:05

MEMLEKETTİÑ GÜLDENUİNE BÄRİMİZ MÜDDELİMİZ!

Qazaqstan Respublikası

Parlamenti Senatınıñ Törağası

Q.K.Toqaevqa

Qwrmetti Qasım-Jomart Kemelwlı!

Öziñiz jaqsı bilesiz, atamız qazaqta «Jaqsınıñ jaqsılığın ayt, nwrı tasısın. Jamannıñ jamandığın ayt, qwtı qaşsın!» degen keremet söz bar.

Basqanı bılay qoyğanda, Sizdiñ Sırtqı İster ministri, QR Prem'er-ministri bolğan jıldarıñızda Elbası jolğa qoyğan Köşi-qon sayasatınıñ dwrıs jürgiziluine, alıstan keletin qandastarımızdıñ şetelden viza räsimdeu, elimizge kelip qwjattanu jağında siñirgen eñbegiñizdi biz bwl künde sağına eske alamız, auzımızdıñ suı qwrıp aytıp jüremiz.

Sizdiñ käsibi diplomattığıñızdıñ, qıtay tiline jetiktigiñizdiñ arqasında, köp kedergiler şeşilip, Şıñjañdağı etnikalıq qazaqtardıñ Atajwrtqa oraluına jaqsı jağday jasaldı, dañğıl jol aşıldı...

Tipti, sol elde tuıp ösken, oqığan bizdiñ özimiz Sizdiñ «Belasu» kitabıñızdıñ «Aspan astındağı dauıl» attı tarauın oqığanda barıp, Qıtaydıñ bizge qwpiya bolıp kelgen köp sırın bildik qoy!

Biraq, osı Elbası bastağan, öziñiz atsalısıp qostağan etnikalıq qazaqtardıñ atamekenge oraluına qatıstı mäselege kedergiler köbeyip otır. Aldımen 1992 jılı 23 qırküyekte qabıldanğan «Şetelderdegi qazaq diasporası ökilderiniñ Qazaqstan Respublikasında bolğan kezinde äleumettik-ekonomikalıq jeñildiktermen qamtamasız etu turalı» Ükimettiñ №791 qaulısınıñ küşin joyılıp, memleket tarapınan är jılı 20 mıñ otbasığa dep bölinip kele jatqan kvota pışaqkesti toqtadı. Odan beride, 2012 jılı 28 naurızda №362 Qaulı qabıldanıp, keluşiniñ «Sottalmağandığı» turalı anıqtama alu jäne «Şığu parağı» degen talap qoyıldı. 2011 jıldıñ 22 şildesinde Prezident qol qoyğan, 16 tamızdan bastap resmi qoldanısqa engen №478 «Qazaqstan Respublikasınıñ keybir zañnamalıq aktilerine Halıqtıñ köşi-qonı mäseleleri boyınşa özgerister men tolıqtırular engizu turalı» QR Zañında: «Sonday-aq, Qazaqstan aumağınan ketken adamdar men olardıñ wrpaqtarınan, eger olar tarihi Otanı retinde twraqtı twru üşin Qazaqstan Respublikasına qaytıp oralğan bolsa» - degen batpanday bap jol ortadan alınıp tastaldı. Keyin Qazaqstan halqı Assambleyasınıñ kezekti bir jinalısında Elbasığa jazuşı Smağwl Elubay arqılı aytqızıp, «tüsip qalğan» mätindi 17 künde qayta qalpına keltirttik...

Jüz jasağır ardaqtı Nwrswltan Äbişwlı «Qandastarımızğa jol aşuımız kerek. Qazaqtıñ jeri keñ. Ornalasamın degen jerin özi tañdasın!» dep, Qazaq köşin bwrınğı arnasına salmaq bolıp, tapsırma beruin ğoy, berdi!

Sol zañ jobasın qazir Mäjilis talqılap jatır. Alla qalasa, jaqında Senatqa da baradı.

Biraq, Qıtay qazaqtarınan talap etilip otırğan EKİ ANIQTAMA bwl Zañ ayasında emes, tek Ükimet qaulısı arqılı küşin joyadı ne özgertiledi eken. Bes birdey senator hat ta jazdı, biraq Ükimet äli ünsiz. Osı №111 Qaulıdağı EKİ ANIQTAMA qwjattı şetelge şığatın azamattarına Qıtay ükimetiniñ bermeytinin, ol turalı arnayı qabıldanğan zañ-erejeleriniñ bar ekenin Prem'er–ministr K.Mäsimov öte jaqsı biledi. Demek, Ükimet onı özgertuge, qazaqtardıñ keluine jol aşuğa tım ıntalı emes. Uäjderine qarağanda, Ükimet «EKİ ANIQTAMA» qwjattı şetten keletin qandastarımızdan «Memlekettik jäne qoğamdıq qauipsizdikti qamtamasız etu maqsatına» talap etip otır eken.

Sonda är jıldarı Ükimetti basqarğan S.Tereşenko (1991-1994), Ä.Qajıgeldin (1994-1997), N.Balğımbaevtardan (1997-1999) bastap, Qasım-Jomart Kemelwlı öziñiz (1999-2002), keşegi Imanğali Tasmağambetov (28.01.2002-11.06.2003) pen D.Ahmetovke (2003-2007) deyin alıs-jaqın şetelderden tıp-tınış, jım-jırt kelip Qazaqstan aumağına qonıstanıp jatqan oralmandar, bügin ayaq astınan kedergige wşıradı?

Şette tarıday şaşırap jürgen qandastarımızdıñ wltaralıq dostıq pen qoğamdıq tınıştıqtı saqtaudağı sauattılığı men eñbegine, tipti, Elbasımızdıñ özi dän riza!

Qwrmetti Qasım-Jomart Kemelwlı, Sizden ötinerimiz bireu-aq: Ükimettiñ №111 Qaulısındağı EKİ ANIQTAMA qwjattı şetelge şığatın azamattarına Qıtay ükimetiniñ bermeytinin, ol turalı arnayı qabıldanğan zañ-erejeleriniñ bar ekenin eskere otırıp, ol talaptardı alıp tastauğa üles qosuıñızdı swraymın. Ortaq Otanımız, Qazaqstan Respublikasınıñ güldenuine bärimiz müddelimiz jäne osığan ayanbay eñbek etuge dayınbız.

Auıt MWQIBEK, aqın.

24.02.2015.

Astana.

Abay.kz

0 pikir