Beysenbi, 2 Säuir 2020
COVID-19 QAZAQSTANDA. Jwqtırğandar — 402. Jazılğandar — 27. Qaytıs bolğandar — 3
Bilik 5564 0 pikir 31 Naurız, 2016 sağat 17:24

ERLAN SIDIQOV: «EKSPO-2017» JAÑA QUAT KÖZDERİN TABUĞA JOL AŞADI

 

Erkindikti enşilegen egemendigimizdiñ tarihında köñil marqayar tolayım tabıs­tar tolıp jatır. Şeşendigi men kösemdigi daugerşilikte, batırlığı men aqıldılığı jaugerşilikte sınalıp, qayrattı qajırlılıqpen qadamın nıq basqan Alaş wrpağı armanın alasartqan emes.

Asıl arman eşqaşan adastırğan da emes. Täuelsizdigimizge tirek, eldigimizge tilek, barşa qazaqqa jürek bolğan Astanamız märtebemizdi biik­tetip, aybınımızdı asqaqtattı. Alıstı ja­qın­dattı. Qazaq Elin jatqa tanıttı. Tanıta da bermek. Onıñ bir ayqın däleli – bü­kilälemdik EKSPO-2017 körmesi bolmaq.


Mwnday auqımdı şaranı Astanada wyımdastıru turalı eñ alğaş Memleket basşısı bastama köterdi. 2011 jılğı 10 mausımda Parijdegi Halıqaralıq körmeler byurosınıñ (HKB) Bas hatşısı Vinsente Gonsales Lossertales­ke Qazaqstan Respublikasınıñ resmi ötinimi tapsırıldı. 2012 jılğı 14 naurızda Memleket basşısı Qazaqstannıñ elordasında HKB-niñ sarapşılar komissiyasımen kezdesu ötkizip, onıñ ayasında «EHRO-2017» körmesin ötkizu bizdiñ elimiz üşin wlttıq joba bolıp tabılatının erekşe atap ötti. 2012 jılğı 12 mausımda Parijdegi Halıqaralıq körmeler byurosınıñ Bas assambleyasınıñ 151-şi otırısında Astananıñ resmi tanıstırılımı bolıp ötti.

Al üstimizdegi jıldıñ qañtar ayınan bastap «EKSPO-2017»körmesiniñ qoğamdıq keñesiniñ qwramına qazaqstandıq jäne halıqaralıq tanımal qoğamdıq qayratkerler, sonıñ işinde ğalımdar kire bastağan. Atalmış keñeske törağa bolıp  Astanadağı  L.N. Gumilev atındağı Evraziyalıq wltıq  universitettiñ rektorı Erlan SIDIQOV saylandı.

Jaqında Erlan Battaşwlı respublikalıq «Ayqın» gazetine swhbat beripti. Onda Erlan Battaşwlı, «EKSPO-2017» is jüzinde bwrınğıdan da senimdi jäne tepe-teñdikti qalıpta wstaytın bolaşaqtıñ energiyasın älemge jariyalaytın halıqaralıq mañızdı şara ekendigin aytqan.

«Energiyanıñ basqa közderin, türlerin paydalanudı jüzege asıruğa baylanıstı, älemdik mäseleni kün tärtibine şığarıp, qalıptastıratın öndiristiñ jaña strategiyalıq salaları payda boldı dep oylaymın. «EKSPO-2017» körmesin Astanada ötkizu bizdiñ elimizge öte tiimdi bolmaq, bwl mäsele boyınşa elimizge ülken basımdıq beredi jäne «jasıl» ekonomikanıñ damuında älemdik köşbasşılardıñ biri boladı. Osı bağıttağı eñ ozıq, eñ mıqtı jañartılğan tehnologiyalardı bir alañğa jinaytın körme jarqırağan jahandıq oqiğa bolmaq, «jasıl» ekonomikanıñ bolaşaqtağı damuına jäne jañartılğan, basqa quat közderin paydalanuda jaña tınıs beredi»,- deydi Erlan Battaşwlı.

Qazirgi kezdegi ömirdiñ şındığı barlığın, bükil älemdik ekonomikanı «jasıl» ekonomikanıñ energiyanı ünemdeu tehnologiyası jağına bwrıluğa mäjbürleude. Bwl klimattıñ özgeruine jäne şikizatqa täueldilikten alşaqtauğa baylanıstı. Osı twrğıda äñgime örbitken rektor, qoğamdıq keñes törağası  Erlan Sıdıqov mırza, «jasıl damu» ideyası Qazaqstannıñ 2050 jılğa deyingi Damu strategiyasınıñ negizgi basımdılığı bolıp tabılatını söz etken.

«Sizderge, jurnalisterge belgili, «jasıl damu» ideyası Qazaqstannıñ 2050 jılğa deyingi Damu strategiyasınıñ negizgi basımdılığı bolıp tabıladı. 2013 jıldıñ 30 mamırında Qazaqstan Respublikasınıñ Prezidenti Nwrswltan Nazarbaev «Qazaqstan Respublikasınıñ «jasıl» ekonomikağa ötui turalı koncepciyası» bekitti. Bwl eñ aldımen – kün köziniñ quatı, jeldiñ, jer astınıñ qızuı energiyası, biojanarmay, sonday-aq elektr energiyasın ünemdep jäne onıñ şığının birneşe esege tömendetetin jañartılğan energiya ünemdeu tehnologiyası siyaqtı energiya közderin jañartuğa qatıstı jwmıstar»,-deydi Erlan Sıdıqov mırza.    

Abai.kz

0 pikir