Seysenbi, 31 Naurız 2020
Wjdan 4407 0 pikir 28 Qazan, 2015 sağat 09:11

NWRBAEV KÖLİGİ HÄM ŞABADANDAĞI AQŞA


27 qazanda Qarağandı oblıstıq sotında «Ahmetov isi» boyınşa kuägerlerden jauap alu odan äri jalğastı. Sot Qarağandı qalasınıñ industrialdıq parkiniñ infraqwrılımdıq nısandarın saluda byudjet qarjısın wrlau epizodın qarastıruda.

Bügingi otırısta beyne baylanıs arqılı Almatı qalasındağı kuägerlerden jauap alındı. Solardıñ biri «Somnus» JŞS-niñ direktorı N. Elğondin özinen «Sapa Project Group» JŞS-niñ jetekşisi D. Nwrbaevtıñ qondırğı jetkizuge kömek swrap, materialdıq sıyaqı esebinde «Toyota Land Kruzer Prado» avtoköligin beruge keliskenin aşıp ayttı.

Ayta ketelik, bwğan deyingi sot otırıstarınıñ birinde kuäger retinde jauap bergen Qazaqstandıq önerkäsiptik korporaciyanıñ bas direktorınıñ orınbasarı Äljan Aqmoldaev Qarağandı oblısınıñ eks-äkimi S. Ahmetovtiñ qamqorlığınıñ arqasında öziniñ kompaniyasınıñ industrialdıq parktegi infraqwrılımdıq nısandı saluğa tiimdi qosalqı merdigerlikke qol jetkizgenin mälimdegen edi. Sot zalındağı sözinde ol qondırğını jetkizuge Duman Nwrbaevtıñ «Sapa Project Group» kompaniyasınıñ kömegin paydalanğanın habarlağanı mälim. Al bügingi otırıstağı kuäger N. Elğondin Ä. Aqmoldaevtıñ sotqa bergen tüsinikterin rastadı.

Kuäger sottaluşı D. Nwrbaevtıñ öziniñ eski dosı ekenin jasırmadı.  2012 jılı bir jwmıs wsınıp, oğan öziniñ kelisimin bergenin aşıq ayttı. Ayıptauşı tarap onıñ sotqa deyingi tergeu kezinde bergen tüsinikterin oqıp berdi. Onıñ mätini tömendegidey:

«2012 jıldıñ basında mağan studenttik şaqtağı dosım D. Nwrbaev habarlasıp, bir jwmıs wsındı. Sebebi ol meniñ şetelderden tauar jetkizumen aynalısatın firmamnıñ barın biletin. Duman Qarağandı qalasında ülken bir jobanı qolğa alğanın, sol boyınşa ««Sapa Project Group» JŞS-ne iri kölemde aqşa tüsetinin habarladı. Ol sonday-aq, tapsırıs beruşige kelisim-şart boyınşa kem degende 2 mln. AQŞ dollarına juıq aqşa qaytaru qajettigin ayttı. Odan keyingi is-äreketter tapsırıs beruşiniñ qwzırında ekenin, osı iske järdemdesuimdi ötindi. Men kelistim. Biraq ol istiñ egjey-tegjeyin tüsindirip jatpadı. Tek tapsırıs beruşige aqşanı qaytaru üşin oğan «Sapa Project Group» arqılı sırttağı firmalardıñ kömegimen qarjını qolma-qol aqşağa aynaldıru kerektigin jetkizdi. Jäne onday firmalardıñ işinen «Somnus» JŞS-in tañdap alğanın ayta kele joba iske asırılğannan keyin materialdıq sıyaqı esebinde «Toyota Land Kruzer Prado» avtoköligin beruge uäde etti. Arada birneşe apta ötkende D. Nwrbaev tağı habarlasıp, bwl sızbağa tağı birneşe firmanıñ kömegi kerektigin mälimdedi. Men onday firması bar dostarım köp ekenin ayttım».

Kuägerdiñ aytuınşa, keyinirek «Somnus» JŞS-i jäne özi tapqan «Perfect Education», «Gepipetrade» JŞS-teri arqılı «Sapa Project Group»-tan tüsken barlıq qarajat qolma-qol aqşağa aynaldırılğan. Alayda D. Nwrbaev oğan uäde etken «Toyota Land Kruzer Prado» avtoköligin bermey ketipti. Memlekettik ayıptauşı kuägerdiñ tergeuge bergen jauabında mınaday dälelder barın sotqa oqıp berdi: ««Gepipetrade» JŞS-i men «Sapa Project Group» JŞS-i arasında tehnologiyalıq qondırğını jetkizuge soması 117 mln. 549 mıñ teñgege kelisim-şart jasalğan. «Perfect Education» JŞS-i men «Sapa Project Group» JŞS-i arasında da osığan wqsas kelisim-şart jasaladı. Onıñ qwnı 504 mln. 770 mıñ teñge dep körsetiledi. «Somnus» pen «Sapa Project Group»-tiñ şottarına 657 mln. 768 mıñ teñge tüsedi. Nätijesinde atalğan tört kompaniyanıñ şottarına 1 mlrd. 280 mln. 808 mıñ 263 teñge tüsip, birden qolma-qol aqşağa aynaldırıladı».

Ahmetov isi. Kuäger J. Ahaşev şabadandağı aqşa turalı ayttı

27 qazanda «Ahmetov isi» boyınşa sot otırısı jalğasıp, Almatı qalasındağı kuägerlerden «onlayn» tärtibimen sotta jauap alındı. «Eco-Treatment systems» JŞS-niñ bwrınğı qızmetkeri Jänibek Ahaşev sottaluşı Duman Nwrbaevpen birlesip Qarağandı oblısınıñ basşılığına arnalğan aqşanı qalay jibergeni turalı äñgimeledi. J. Ahaşev D. Nwrbaev «Eco-Trading systems» JŞS-niñ 25 payızdıq ülesin satıp aludı wsınğannan keyin «Eco-Treatment systems» kompaniyasına resmi türde jwmısqa ornalasadı. Osıdan keyin Nwrbaevtıñ keñesşisine aynalğan kuäger Qarağandı qalasınıñ industrialdıq parkindegi şaruaşılıq-twrmıstıq suağarlardı tazalau stanciyasınıñ qwrılısı turalı bılay tüsinik berdi: «2011 jılı Nwrbaev mağan qwnı 1 mlrd. teñge twratın Qarağandı qalasınıñ industrialdıq parkindegi şaruaşılıq-twrmıstıq suağarlardı tazalau stanciyasınıñ qwrılısı jöninde Aqmoldaevpen kelissözder jürgizip jatqanın ayttı. Ol jobanıñ paydalılığı jağınan bizdi öte qızıqtıratınına ekpin tüsirdi».

Jänibek Ahaşev sotqa habarlağanday, almatılıqtar jobanı jüzege asıruğa kiriskenimen keyinirek «Eco-Treatment systems» JŞS-niñ tek qwrılıs-montaj jwmıstarımen ğana aynalısatının, al qondırğını jetkizu bögde kompaniyalarğa jükteletinin estidi. Söytip ol bwğan narazılıq bildiredi. Osı jerde käugerdiñ sotqa deyingi tergeuge bergen jauabın memlekettik ayıptauşı oqıp berdi: «Bwğan narazılıq bildirdim. Biraq Nwrbaev bwl tapsırıs beruşiniñ qoyğan talabı ekendigin, onıñ talqılanbaytının eskertti. Eger de talappen kelispesek, kelisimge qol jetkize almaymız, bedelimizge de nwqsan keledi dedi. Mwnday talaptı Aqmoldaev qoyğanın estidim. Men onı wzaq uaqıt «Centr-stroy Komplekt NS» JŞS-niñ basşısı dep sanap kelgen edim. Säl keyinirek «Centr-stroy Komplekt NS» JŞS-niñ direktorı Asanov ekenin, al Aqmoldaev kompaniyanıñ jwmısın üylestiruşi ekenin bildim».

Sonımen qatar, J. Ahaşev D. Nwrbaevtıñ Birikken Arab Ämirlikterinde tirkelgen kompaniyalardıñ şotına aqşa audarudıñ joldarın swrap, ötiniş jasaydı. Anığında D. Nwrbaev oğan şeteldik bir kompaniyanıñ derektemesin elektrondıq poştasına jiberip, atalğan derektemege aqşa audarudıñ joldarın öziniñ tanıstarınan swrastırudı ötinedi. Biraq J. Ahaşev bwl mäseleniñ şeşimin taba almaydı. Sodan keyin D. Nwrbaev bireuge aqşa aparıp beru üşin kuägerdi janına ilesip jüruge şaqıradı. Mwnday oqiğa eki ret bolıptı. «2012 jılı mamır ayınıñ basında Nwrbaev bireuge iri kölemde aqşa aparıp beru kezinde janına ilesip jürudi ötindi. Biz Almatıdağı «Eco-Treatment systems» JŞS-niñ keñsesinen şığıp, «Almatı Palas» sauda üyiniñ janına keldik. Sol jerde men Dumannıñ avtokölik bagajınan şabadan alıp şıqqanın kördim. Ekinşi ret mwnday oqiğa 2012 jıldıñ kökteminiñ soñında boldı. D. Nwrbaev ekeumiz meniñ avtoköligimmen firmanıñ keñsesinen şığıp, «Nwrlıtau» biznes ortalığınıñ avtotwrağına toqtadıq. Nwrbaev atalğan joba boyınşa şabadandağı aqşalar Qarağandı oblısınıñ basşılığına jiberilip jatqanın ayttı», - dep äñgimeledi J. Ahaşev.

Ämina BÄKİR

Abai.kz

0 pikir