Särsenbi, 8 Säuir 2020
COVID-19 QAZAQSTANDA. Jwqtırğandar — 697. Jazılğandar — 51. Qaytıs bolğandar — 6
46 - söz 3217 0 pikir 30 Qazan, 2015 sağat 10:59

ORAZALIĞA: KÜNTİZBEMDE JOQ OTIZI QAZANNIÑ

Bügin aytıstıñ aqtañgeri Orazalı Dosbosınov bauırımnıñ dünieden qaytqanına 11 jıl. Meniñ bauırıma degen sağınışımdı osı öleñmen ğana basqanmın. Kün jwma. Orazdıñ basına täu etuge ketip bara jatırmın...

2004 jıl 30 qazan

Däl sol jılı, däl sol küni qara joldıñ üstinde üşeumiz kölik apatına wşırap edik. Däl sol tüni aytıs öneriniñ aqtañgeri Orazaäli Dosbosınov mert boldı. 
Avtor 

Däl sol jılı,
Däl sol küni önerdiñ,
Özegine öksik toldı, ne dermin?..
Sodan beri 
Borkemikpin,
Ügildim,
Sodan beri 
Körsoqırmın,
Kereñmin.

Nege tağdır däl sol küni bülindi,
Ap ketkenin bile me eken kimimdi?
Qara dala tösindegi qara jol
suırıp alıp jüregim men tilimdi
qağıp tüsti meniñ qaysar inimdi.

Qimastıqtan twrar jası möldirep,
Üşeumizdi oylaptı jwrt öldi dep.
Sizge – qayğı, 
Bizge – ölim sol sapar,
Qatarımız qaldı-au, dünie-ay, seldirep.

2004...
Jılnamamda joq jıl ol,
Bar bolğanmen jan qarığan şoq jıl ol.
Küntizbemde joq otızı qazannıñ,
Balqıp bitken qazandağı oq bir ol.

Qazir aytıs köre almaymın,
Körmeymin.
Kökiregimdi örtep boldı köldey mwñ.
Bireudi izdep öz-özimnen şöldeymin,
Bireudi izdep bökterlerge örleymin...

Sol bir jıldan,
Sol bir künnen bastalğan
osı dertten qwtılmadım qaşqanmen.
Qabirine baram jalğız qarğamnıñ
qara bwlttar jöñkilgende aspanda.

Ölimin be?
Tirimin be?
Bilmeymin,
Sodan beri eki jaqqa birdeymin.
Tiri bolsam,
Nege köppen jürmeymin?
Öli bolsam,
Nege körge kirmeymin?!.

2004...
Jılnamamnan sızılğan,
Ol men üşin rettik san bwzılğan.
Küntizbemde joq otızı qazannıñ –
Üzilgen jan,
Sınğan süyek,
Qızıl qan ...

Jaras Särsek

Facebook-tegi paraqşasınan

0 pikir