Särsenbi, 8 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Qoğam 6404 0 pikir 30 Qaraşa, 2015 sağat 17:42

ERDOĞAN ELBASINIÑ KEÑESİNE MWQTAJ BA?

Prezident Erdoğan Elbasınıñ keñesine jügindi

Elbası Nwrswltan Nazarbaev Türkiya prezidenti Redjep Tayıp Erdoğanmen telefon söylesti. Aqordanıñ baspasöz qızmetiniñ aqparattarına süysensek, memleket basşıları telefon arqılı reseylik Su-24 wşağı apatın talqılağan. Bwl turalı abai.kz portalı  Aqordanıñ baspasöz qızmetine silteme jasay otırıp habarlaydı.

Qazaqstan jäne Türkiya prezidentteri ekijaqtı qarım-qatınastardıñ bügingi jağdayı men keleşegin, sonday-aq birqatar öñirlik jäne halıqaralıq özekti mäselelerdi talqılağan. Ärine, bwl jolğı telefon arqılı baylanıs kezinde, äñgimeniñ negizgi auanı Siriyadağı dağdarıs jağdayı men reseylik Su-24M wşağına qatıstı oqiğalar  töñireginde örbigen.

Qazaqstan Prezidenti öz kezeginde, bolğan oqiğağa  ökinişin bildirip, resey-türkiya qarım-qatınasınıñ naşarlauına alañdauşılığın jetkizdi. Sonday-aq, memleket basşısı bwl baylanıstar wzaq jıldar boyı qalıptasqandıqtan, taraptar onı saqtap qalu üşin jauapkerşilik tanıtuı qajettigin atap ötken. Osığan baylanıstı oqiğanı anıqtap, qalıptasqan jağdaydan şığu üşin ekijaqtı komissiya qwru wsındı.

Türkiya Respublikasınıñ tizginin wstap otırğan Rejep Tayıp Erdoğan öz kezeginde Resey Prezidenti Putinmen tayau arada kezdesuge dayın ekenin aytqan.

Bwl jolı telefon arqılı söylesuge türik jağı bastamaşılıq jasağan.

Türik – orıs janjalı: Prezident Nazarbaevtıñ poziciyası şeşuşi röl oynay ma?

Al älemdik sarapşılar reseylik SU-24 bombalauşı wşağı türik äue keñistigine kirip ketip, onı atıp tüsirgennen keyingi bastalğan memleketaralıq janjaldıñ soñı älemdi jaña soğısqa itermelep otırğanın aytadı (http://m.abai.kz/post/view?id=5628). Ras, Qazaqstan men Resey arasındağı integraciyalıq qatınastar qay deñgeyde ekenin aytıp jatudıñ özi  artıq. Al Qazaqstan täuelizdigin eñ birinşi bolıp moyındağan, moyındap qana qoymay, älemge aqsarbas aytıp, süyinşi  swrağan Türkiya (ol kezdegi Prezident Twrğıt Ozal) üşin Ortalıq Aziyada Qazaqstannıñ ornı bölek. Tipti, Qazaqstan Prezidenti Nwrswltan Nazarbaevtı «külli türki jwrtınıñ aqsaqalı, kösemi» dep äspettep, oğan qwrmet körsetudi Erdoğan da ersi körmeydi.

Täuelsizdiktiñ alğaşqı jıldarındağı ekonomikalıq dağdarıs kezinde de tuısqan türik ağayındar mıñ oylanıp, jüz tolğanıp jatpastan täuekelge bel buıp, elimizge investiciya salıp, Qazaqstan ekonomikasınıñ ayaqtan tik twrıp ketuine eleuli üles qostı. Sonımen birge, Türkiya Respublikası Qazaqstanğa investiciya salğan elderdiñ alğaşqı bestigine kiredi. Qazba baylıqtarğa ğana investiciya saluşı özge memleketterge qarağanda türik investorları ekonomikanıñ barlıq salalarına investiciya saluımen erekşelenedi. Soñğı jıldarı qazaq käsipkerleri de qarap qalmay Türkiya ekonomikasına investiciya qwya bastadı. Ötken jılğı eki eldiñ jıldıq tauar aynalımı 4 mlrd astam AQŞ dollranı qwradı. Memleket basşıları aldağı uaqıtta bwl körsetkişti eseley tüsetini Erdoğannıñ ötken jolğı Astanağa jasağan saparı barısında belgili bolğan.

Qazaqstanda mıñnan astam türik kompaniyaları jwmıs isteydi

Büginde elimizde 1400-den astam türik firması qwrılıs, auıl-şaruaşılığı, metallurgiya jäne mwnay-gaz salasında jwmıs istep jatır. Al 1991 jılı Qazaqstan Respublikasınıñ Prezidenti N.Nazarbaev pen Türkiya Respublikasınıñ Prem'er ministri S. Demireldiñ eki jaqtı kelisiminiñ arqasında Türkistan Universitetiniñ atı Q.A.YAsaui atındağı halıqaralıq Qazaq-Türik universiteti bolıp özgertilip, qayta qwrıldı. Sonımen birge, 1992 jıldan beri elimizde qazaq-türik liceyleri jwmıs istep keledi. Bwl liceyler orta oqu orındarına bilim berudiñ soñğı jetilgen tehnologiyasımen jwmıs isteuimen erekşelenedi. Büginge deyin elimizdegi halıqaralıq olimpiada jüldegerleri sanınıñ 70 payızı osı licey tülekteriniñ enşisinde. Bwdan basqa Almatıda Süleymen Demirel atındağı universitet jäne Şet tili jäne iskerlik kar'erası universiteti jwmıs isteydi. 1993 jılı Almatıda altı birdey türik memleketiniñ basşıları (Türik Respublikası, Qazaqstan, Qırğızstan, Türkimenstan, Äzirbayjan jäne Özbekstannıñ) «TÜRKSOY» wyımın qwruğa şeşim qabıldağan bolatın (http://kazakzaman.kz/).

 

Erdoğan eliniñ Prezident Nazarbaevqa degen qwrmeti erekşe edi

Qazaqstan Prezidenti Nwrswltan Nazarbaevtı Türkiyanıñ irgesin qalağan Mwstafa Kemal Atatürikpen teñ qwrmetteytini jasırın emes. Mısalı, Täuelsizdiktiñ şirek ğasırında Altaydan auğan türik bauırlarımız Türkiyanıñ tört birdey köşesine Prezident Nazarbaevtıñ esimin bergen.

2011 jıldıñ säuirinde Nazarbaevtıñ qwrmetine Nevşehir qalası köşeleriniñ birin atağan. 2012 jıldıñ qazanında Nazarbaev esimi Qırşehir qalasındağı, al 2013 jılı Gebze qalasındağı köşege, 2015 jılı Adana qalasındağı ortalıq dañğıldardıñ birine berilgen.

Al Türkiyanıñ astanasında Qazaqstan Respublikasınıñ prezidenti Nwrswltan Äbişwlı Nazarbaevtıñ eskertişi 2010 jılı boy köterdi.

Tüyin: Ras,  büginde uşığıp ketken Resey men Türkiya janjalına Prezident Nazarbaev qana nükte qoyatınına köptegen sayasatkerler senimdi edi. Keşe Elbasına özi habarlasıp, keñesin swrağan türik Prezidenti Tayıp Erdoğannıñ da ümiti osı bolsa kerek-ti. Bwnday jağdaylarda beytarap poziciyanı bek  wstanatın Qazaqstan Prezidenti  osı jolı qaytpek? Bir mälimdemesinde Prezident Nazarbaev «Resey wşaqtarı Türkiyağa şabuıl jasağan joq» dep edi (http://www.azattyq.org/archive/news/latest/330/330.html?id=27397537).

Al keşegi Erdoğanmen söyleskennen keyin, Elbası Resey men Türkiyanı tatulastıruğa nietti ekenin añğarttı. Dese de, Qazaqstan Prezidentine türkiyalıqtardıñ  qwrmeti men senimi erekşe. Elbasın Erdoğannan artıq sıylaytın Türkiyanıñ senimi seyilip ketpese igi edi.

Nwrgeldi Äbdiğaniwlı

Abai.kz

0 pikir