Jeksenbi, 27 Qırküyek 2020
COVID-19 QAZAQSTANDA. Jwqtırğandar — 107723. Jazılğandar — 102666. Qaytıs bolğandar — 1699
Sın 3421 0 pikir 2 Şilde, 2015 sağat 10:23

QAZWU-DEGİ ŞIKİLİK nemese BİZDİÑ ELDE NEGE JEMQORLIQ KÖP?

QazWU-dıñ «Inemen qwdıq qazğan» studentterdi bilim qazınasın izdep kelip, bazınağa jolıqtı. Daudıñ bası oqudıñ tölem qarajatı. Eldiñ bildey bilim ordası QazWU-dıñ 191 studentinen kelip tüsken arız nätijesinde aldıñğı aptada oqu ordasınıñ 3 esepşisi qamauğa alındı. Olarğa studentter oquğa tölegen qarajattan 120 million teñgeni jımqırdı dep ayıp tağıluda. Studentterdiñ aytuınşa, Universitet basşılığı 100-den astam studentke oqudıñ qarajatın tölemese diplom bermeytini turalı aytqan. Al studentter aqşa tölegenderin aytıp, zar qağadı. Al, is qozğağan policeyler tergeudiñ qwpiyalığına baylanıstı qanday da bir naqtı aqparat jariyalamadı.

Ädildik izdep, arız aytqan studentter Äl-Farabi atındağı Qazaq Wlttıq universitetine milliondap aqşa qarız. Biriniñ 4 jıl boyı tölegen oqu aqısı joğalıp ketse, endi biriniñ kartoçkasına esepşiler aldap aqşa qwyıp, artınşa özderi sol qarajattı şeşkenderi üşin jauapqa tartılğan.

 «Almatı» arnasınıñ tilşileri oqu ordasınıñ basşılığı qanday da bir tüsinikteme beruden bas tartıp, äuelde tilşiler men studentterden jasırınğanın jazadı. Olar keñseleriniñ esigin işten ilip, bwqpantaylağan. Soñında, boy bermey, aqırı basşılıqpen jüzdesken studentterge universitet rektorınıñ qabağı qatulı orınbasarı studentterdiñ özin «twtqındalğan esepşilerdiñ sıbaylası» dep ayıptaydı. Sonday-aq  aqşası joğalğan bilimgerler 200 emes, bar-joğı 10 student dep otır.

«Ökinişke qaray kelisim-şarttağı şarttar orındalmaytın bolsa, biz öz tarapımızdan eşqanday diplom bere almaymız. Tolıqqandı töleu kerek», – dep aqşaların qaytadan tolıq ötemegenge diplom berilmeytinin kesip ayttı QazWU oqu-isi jönindegi prorektorı Darhan Ahmet-Zaki.

Al, bwl iske baylanıstı Bilim jäne Ğılım vice-ministri Tahir Balıqbaev:

"Qazirgi uaqıtta universitettiñ basşılığı ötken jılı mekemeniñ ekonomikalıq qızmetiniñ, buhgalteriyanıñ keybir jwmısşılarınıñ öz qızmettik babın paydalana otırıp, zañsız aqşa ala bastağanın anıqtadı. Büginde tergeu jürip jatır, studenttermen jwmıs jasalıp jatır, bwl jağdaydı şeşiledi. Tergeu ayaqtalğanda bilemiz. Qazaq Wlttıq universitetimiz reytingter bağalanatın halıqaralıq baylanıstarı, ğılımi mümkinşiligi, mwğalimderiniñ mümkinşiligi jağınan eldegi eñ üzdik oqu orındarınıñ biri bolıp sanaladı, sondıqtan bwl jağday oqu ornınıñ abıroyına aytarlıqtay nwqsan keltirmeui kerek. Qazirgi uaqıtta zañdı bwzdı ma, joq pa, twjırım aytpaymız, tergeu jürip jatır. Biraq bwl jağday oqu procesine, qabıldau procesine äser etpeydi", - dep tüsinikteme berdi, äri tergeu ayaqtalğanınan keyin belgili bir keñes pen şaralardıñ qabıldanatının ayttı.

İstiñ şikiliginiñ şeti 2014 jıldıñ soñında biline bastağan. Baspasöz qızmetiniñ mälimetinşe, esepşiler 2008 jıldan bastap qarajattardı jımqırumen baylanıstı zañğa qayşı alayaqtıq äreketter jasap kelgen.

Esteriñizge salsaq, 2008-2010 jıldarı Universitet basşılığına Baqıtjan Jwmağwlov kelgen edi. Keyin Bilim ministri bolğan Baqıtjan Jwmağwlov, orınbasarı Şayahmetov «1 milliard teñge jımqırdı» ayıbımen isti bolğan soñ qızmetinen ketken bolatın. QazWU-degi batpan qwyrıq qılmıstıñ tamırı Jwmağwlov rektor bolğan twsqa say keledi.

İstiñ anıq-qanığın qwzırlı organdar anıqtay jatar. Biz oqırmanğa: «El bolıp, etegimizdi jiğalı eñbektegen baladan, kemseñdegen qariyağa deyin wrı bop kettik pe?» degen saual tastaymız. Alpauıt kompaniyalardı bılay qoyğanda eñ ziyalı degen bilim ordası, jazuşılar odağı, mektep, baspa ... jemqorlıqpen bası şatılmağan birde-bir mekeme qalmay baradı. Bilikti sınau, basşını kinälau barlıq jerde bar ürdis. Al milliondağan halıqtıñ soğan jol berui, mekeme, basşı bitkendi jemqor atandırıp, paramen isti şeşuge halıqtıñ peyildi bop twratını qalay? Halıqtıñ aqşası köp pe, älde bilimi joq pa? Wrı bitkenge tañday qağa bergenşe, wyatımızdı bir sät tarazılap körsek eken.

 

Abai.kz

 

0 pikir