Seysenbi, 2 Mausım 2020
COVID-19 QAZAQSTANDA. Jwqtırğandar — 11308. Jazılğandar — 5587. Qaytıs bolğandar — 41
46 - söz 5534 0 pikir 1 Qazan, 2014 sağat 10:41

"BÄRİNEN DE SEN SWLU"

Aspannan jwldız aqsa bireu baqilıq boldığa sanap, bet sipaytın qazaq öz öneriniñ jarıq jwldızı köz aldında qwldilap barıp kökjiekke siñip ketkende teris aynaldı. Körse de körmegendey boldı. Bar gäp mınada ğana. Qañqu sözge qwrıq bar ma? «Nwrswlu soñğı kezderi işip ketipti» degen söz el arasında jeldey esti. Nege işti? Kim üşin işti? Eşkim swramadı. Mümkin, ol ömirdiñ uın işken şığar. Älde işte qaynağan zapıranın şığarğısı keldi me? Kim biledi, jıldar boyı jalındağan jiger qwm bolıp jasığan şığar… Jartısınan ayırılğan jan jabırqap, jürek jalğızsırağan bolar? Osını sol uaqıtta swrağan bireu boldı ma? Künnen-künge semip bara jatqan jwldızdıñ janına jalau bolğan jan tabıldı ma sol kezde? Joq! Qayta mısıq közdenip miığınan külisti, köşede körse közge şwqıstı.

Halıqtıñ özi ösirip, özi öşirgeni qay jwldız? Bwl qazaqtan şıqqan äygili bişi, balerina, Qazaq SSR-niñ eñbek siñirgen ärtisi Nwrswlu Tapalova bolatın.

Sır twnğan siqırlı sausaq
Otızınşı jıldardıñ basında qazaq muzıka ğılımınıñ atası Ahmet Jwbanov bastağan komissiya Oyıl audanına saparladı. Qonaqtar qwrmetine jayılğan dastarqan men tögilgen än men küy meymandardıñ mereyin ösire tüsti. Äsirese, sol keşte döñgelene bi bilegen büldirşin qız eldiñ nazarın audarğan-dı. Bi bitkenşe qılt etkendi qalt jibermeytin Ahañnıñ qırağı közi siqırlı süyrik sausaqtarğa qadaldı da qaldı. Auıldan attanarda astanağa şaqırılğan önerli jastardıñ işinde 11 jastağı Nwrswlu da bar edi. Äytse de ärtistik önerdi jın-şaytanday köretin sol twstağı auıl psihologiyası talay talanttıñ tanıluına tosqauıl bolğanı anıq. Alayda solardıñ arasınan twlımı jelbiregen Nwrswludıñ ğana keyin Almatığa attanuına äkesi Elubaydıñ ıqpalı zor bolğanğa wqsaydı. Oyıldan şıqqan otarbanıñ üşinşi qabatında teñselip, Almatığa jetken Nwrswludıñ qiyalına qanat bitip, sol sät qattı quanğanı da esinde. Degenmen poyızğa salıp twrıp: «Qızım, Almatığa barğanda ğana jerge tüs. Allağa amanattadım öziñdi», – dep janarı jasaurağan äkesiniñ beynesi ünemi köz aldında twrdı. Almatığa kelgen 13 jastağı balausa qız Memlekettik opera jäne balet teatrınan bir-aq şığadı. Äygili baletmeyster A.Aleksandrovtıñ ayalı alaqanına tüsedi. Bige talabın bayqağan wstazı oğan Mäskeu, Leningrad qalalarındağı horeografiyalıq uçilişelerdiñ wlttıq bi bölimine oquğa tüsuge keñes beredi.
Alayda Nwrswlu öziniñ alğaşqı öner mektebi äri ülken sahnası qazaqtıñ opera teatrında qalğısı keldi. Jas bişiniñ esimi elge künnen-künge tanıla tüsti. Ol Aleksandrov jetekşiligindegi teatr studiyasında oqıp jürse de, sahnadan sırt qalğan joq. Keyin bi padişası Şaranıñ rölderin Nwrswluğa ğana senip tapsıratınday deñgeyge jetti. Bidegi şeberligi sonşa, Nwrswludıñ «Qız Jibek», «Qalqaman-Mamır» qoyılımdarında Şaranı almastırğanın körermen tipti añğarmay da qalatın. 1938 jılğa deyin kardobalet ärtisi, keyin balet bişisi bolğan Nwrswlu qaytalanbas obrazdar jasap şığardı. Äsirese, prima balerina bola jürip wlttıq operalarda jeke biler şığarğan onıñ twnıp twrğan talant ekenin eldiñ bäri moyındağan tws ta osı edi. El arasında Nwrswlu Tapalova dese, «Ooo, Zarema!!!!» dep bas barmağın köteretin deñgeyge jetken jas bişiniñ atağı kün sanap jayılıp kele jattı. Bwl turalı äriptesi, halıq ärtisi Bolat Ayuhanov «Meniñ baletim» degen kitabında: «Nwrswlu – bisiz ömirin elestete almaytın näzik jan. Ol ataqtı Galina Ulanovnamen «Baqşasaray bwrqağında» Zaremanıñ rölin oynadı. Nwrswlu Zaremanı klassikalıq dayındıqsız biledi. Alayda onıñ Zareması nağız şığıstıñ aruı bolıp şıqtı! Onıñ biin körip otırıp bige elitip ketpeu, ğajayıp swlu biine qaray otırıp, onıñ tartımdı äserine erekşe boy aldırmau mümkin emes-tin. Nwrswlu Tapalova dästürli klassikalıq bi öneriniñ tolıp jatqan qım-quıt qiındığın orasan zor erekşe küşimen jeñe bildi. Ol qiındığı mol erekşe täsilderdi beyneler arqılı somdap, olardıñ näzik sezimderin körermenge ayrıqşa jetkize bildi. Bwl bişi nağız wltınıñ bağına jaralğan», – dep jazdı. Oğan qosa Nwrswlu apamızben «Aqqu kölindegi» ispan biin bilegenin esine alğan Bolat Ayuhanov: «Men onıñ qasında jürip ertegidegidey ädemilikti sezindim. Ol bilegen «Er Tarğın» operasınıñ soñğı aktisindegi bii erekşe edi. Nwrswlu bilegen siqırlı sahnağa qaray bergiñ keletin», – dep eske alıptı («Aqtöbe» gazeti, 2008, 28 aqpan). Iä, sahna men körermendi Täñirindey köretin Nwrswlu Tapalova biler aldında qattı tolqıp, ärtisterdiñ biri keşigip jatsa mazasızdanıp, tipti, keyde nayzağayday şıtınap ketedi eken. Alayda sahnada qanat bitken köbelekke wqsaytın onıñ jüzinde älgindegi aşudıñ izi de qalmay, onıñ ornına oymaqtay qana ädemi şwñqır payda bolıp sala beretin-di…
Nwrswlu tökken nwrğa şomıla jürip, onıñ ömirine köleñke tüsirgender de boldı. Tasadan tas atqan teatr intrigası balerinanı biiginen qwlatqısı keldi… Aqırı, 1953 jılı otızğa endi ğana şıqqan Nwrswlu teatrdan ketip tındı. Onıñ talantına tağzım etetin Bolat Ayuhanov bişiniñ ülken sahnadan erte ketkenin talay märte aytıp ta, jazıp ta jürdi. Biraq estir qwlaq pen körer köz bolmadı. Teatrdan ketip, än-bi miniatyurası janrındağı estradalıq salağa auısqan bişi Jambıl atındağı filormoniyağa qızmetke keldi. Bwl jerde Odaq pen demokratiyalıq respublikalardıñ än-bi ansambliniñ jeke bişisi bolıp qızmet etti. Onıñ repertuarında qazaq, qırğız, özbek, armyan, ispan, orıs, tağı basqa wlttardıñ bileri boldı. Öz rölderin käsibi deñgeyde sahnağa alıp şıqqan Nwrswludı alıs-jaqın şetel tanıdı. Äsirese, Mäskeude ötken qazaq ädebieti men öneriniñ onkündiginde öner körsetken Nwrswludıñ bii turalı sol kezdegi Odaq respublikalarınıñ baspasözi jarısa jazıp jattı. Ol bilegen äzirbayjannıñ «Djudjälärim» bii talay jandı tañğaldırdı. Ol adam boyındağı meyirimdilikti, perzentke degen mahabbattı bi önerimen wğındıra biletin has talanttıñ nağız özi bolatın.

«Qwrqıltaydıñ wyası» häm baqıttı ömir
Önerdegi ğana emes, ömirdegi baqtalastarı Nwrswludıñ basınan bağın taydıruğa tırıstı. Ne üşin? Oğan sebep te bar. Qız-qırqınnıñ köz qwrtına aynalğan jigit ağası Nwrswluğa üylendi. Bişiniñ Qwday qosqan qosağı – Şoqır Böltekwlı. Kädimgi qazaq boksınıñ atası atanğan twñğış boksşı, bapker. Kezinde Bauırjan Momışwlınıñ özi: «Eki-aq nağız qazaq bar, biri – men, biri – Şoqır», – degen eken. Deytindey-aq. Qılış jüzinen qan tamğan qırqınşı jıldarı öz tegin «wlı» dep jazdırğan twñğış qazaq osı – Şoqır atamız. Olar opera jäne balet teatrınıñ qabırğasında alğaş kezdesti. Bwl otız altınşı jıldarı Böltekwlınıñ qazaq eline bokstıñ bılğarı qolğabın arqalay kelip, «Bärekeldi!» degizgen twsı-tın. Şarşı alañnıñ şañın qaqqan Şoqır atamız şäkirt tärbielep, boksqa baulu üşin alaqanday alañ izdep, şarq wrıp jürip opera jäne balet teatrınıñ bir bölmesin zorğa swrap aladı. Küy tañdaytın kün emes, qaraköz bauırların janına jiğan Şoq atamız jattığudı bastap ketedi. Alpamsaday alıp äri şımır denesi şiırşıq atqan jas jigit kez kelgen swludı qağıp tüsirerdey kelbetti-twğın. Däl osı teatrda mıñ jigittiñ meselin qaytarğan moyılday möldiregen Nwrswlu Şoqırdıñ jüregine şoq tüsiripti desedi. Ärine, teatr ärtisteri şetinen körikti keletini sözsiz. Sol jerdegi san swludıñ işinen suırılıp şıqqan Nwrswluday jarına ağamızdıñ erkeletip «Luçşe vseh» dep at qoyuı da sodan şığar.
Olar baqıttı edi. Äytse de ömir boyı Jambıl men Masanşı köşeleriniñ qiılısındağı «Ärtister üyiniñ» qwrqıltaydıñ wyasınday ğana bir bölmesinde ğwmır keşken olardıñ twrmısı tım auır bolğan körinedi. Esimderi el auzınan tüspey twrğannıñ özinde bedelin bwldap alaqan jayıp körmegen jandar eken. Belgili jurnalist Meyrambek Tölepbergen ağamız kezinde de, qazir de Şoqır atamız jayında jazudan jalıqqan emes. Onıñ aytuınşa, Şoq atamız ben bi öneriniñ biigine köterilgen Nwrswlu apamızdıñ el aldındağı eñbegi eleusiz qalğan. «Nwrswlu apaydı eñ alğaş 1994 jılı Şoqır ağamızdan swhbat aluğa barğanımda kördim. Qızı üşeui twratın bir bölmeli üydiñ jüdeuligi sonşa, köz toqtatıp qararlıq tük te joq. Ol kezde Böltekwlınıñ atağınan at ürketin. Solay bola twra düniege qızıqpağan qarapayımdılıqtı osı kisilerden kördim. Tipti, Ükimet bergen päterden ağamızdıñ özi bas tartıptı. Onıñ: «Biz «Luçşe vseh» (Nwrswlu apaydı atağanı) ekeumiz osı jalğız bölmede twramız. Bwl – twñğış perzentim düniege kelgen, Şäken Aymanov, Beyimbet Maylin sekildi dostarım däm tatqan şañıraq. Sondıqtan bwl üy mağan tım ıstıq», – degeni bar bir äñgimesinde. Keyin kele qwdayı körşisi belgili muzıka zertteuşisi Petr Aravindi qimay qala berdi. Aqtıq saparğa da, Jirenşe aytpaqşı, osınau «keñ sarayday boz üyinen» attandı. Bwl – meniñ dos pen saltqa adaldıqtı alğaş köruim! Al apay turalı oğan deyin estigenderim añızğa bergisiz edi. Sol zamannıñ suretşileri qazaq qızınıñ swlulığın paş etkisi kelse, Nwrswludı saladı eken-mis. Jadau twrmıstarına qaramastan sol kezdegi apaydıñ kelbetine qarap, «saptı ayaqtıñ sırı ketse de, sını ketpeytinine» közim jetti. Apaydıñ bir qasieti sol, Şoq atam sekildi ol da özi turalı aytqandı wnatpaytın. Tipti, qanşa sözge tartqanımızben şeşilip söylegenin körmeppin. «Kezinde biledik qoy» deytin de qoyatın. Ataqqwmarlıqtan ada adaldıq pen abıroydıñ aq tuın jıqpaytın jandardıñ bir-birin tauıp qosılğandarına tañğalğanım äli esimnen ketpeydi», – dep eske aladı.
Al belgili adamdardıñ belgisiz qırları turalı bildik pe? Mäselen, Şoqır atamız boksşı ğana emes, känigi qılqalamşı. Kezinde Bakudıñ körkemsuret uçilişesin bitirgen onıñ suretşilik qırın joğarı bağalağan jan B.Maylin bolatın. Tatardıñ wlı jazuşısı Ğabdol Toqaydıñ suretin saluğa tapsırıs bergen de sol. Tipti, onıñ «Qazaqfil'mde» suretşi bolğanın bireu bilse, bireu bilmeydi. Al Nwrswlu apay mıñ bwralğan bişi ğana emes, «Jambıl», «Belıe rozı», «Kinokoncert» fil'mderine tüsip, aktrisa atandı.
Iä, olar qazaq üşin ömir sürdi. Biri sportqa, biri önerge ölerdey ğaşıq edi. Olardıñ qarapayımdılığı sonşa, öz esimderinen göri qazaq atınıñ köbirek atalğanın qaladı. Tipti, äli künge eşbir janğa ya Şoqır Böltekwlınıñ, ya Nwrswlu Tapalovanıñ qay jaqtıñ tuması ekeni de belgisiz. Olar at töbelindey qazaqtı alalap böle jarğısı kelmegen edi. Bölmedi de.

Joğalğan jwldız izimen

Qazaqtıñ qos wlı perzentiniñ közin körgen kisilerden olardıñ Aqtotı, Aqswlu esimdi qızdarı bolğan degendi estigenbiz. Jambıl men Masanşı köşeleriniñ qiılısındağı üş qabattı sarı üydi izdep taptıq. Bağıtımız – «Ärtister üyi». Aulada kezdesken jannan jön swraymız. Bir kezde joqşı ekenimizdi bayqadı ma, kün şuaqtap otırğan orıs äjey bizge tayap keldi. Osı sätti paydalanğan biz de bağıtımızdı tüsindirip älekpiz. Öziniñ elu segizinşi jıldan osı üyde twratının aytqan äjey izdegen jandarımızdıñ osında twrğanın aytıp, jön siltedi. Üşinşi qabatqa köterildik. Esikti qaqtıq. Eşkim aşpadı. Sol qabattağı eki-üş esikti qağuğa tura kelgenmen, jan balası eşnärse bilmeytin bolıp şıqtı…
«Bir bilse, sol kisi biler-au» degen soqır ümitpen Şoqır atamızdıñ şäkirti, halıqaralıq därejedegi töreşi, bapker S.Äbdinäliev ağamızdı izdedik. Taptıq. Ol kisiniñ aytuınşa, «Ärtister üyindegi» bir bölmeli üydi qızdarı satıp, basqa jaqqa köşip ketkenine biraz bolğan. Meken-jayların jii auıstıratını sonşalıq, qazir ya Malovodnoe auılında, ne Qarğalı auılında twradı dep estui bar.
Abay atındağı Memlekettik opera jäne balet teatrına tiip sol jaqqa telefon şaldıq. Maqsatımız – keyipkerimiz turalı tittey de bolsa derek tabu. Alayda ondağılar: «Teatrdı jöndeuden ötkizerde barlıq qwjattardı Ortalıq mwrajayğa tapsırğanbız», – dep auzın qu şöppen sürtti. Endigi bağıtımız  Seleznev atındağı horeografiyalıq uçilişe boldı. Derek tappay dağdarğan bizdiñ jolımızdı oñğarıp, bişi, balerina äri osı oqu ornınıñ mwrajay meñgeruşi Anvara Äripqızı kezdese ketti. Osındağı mwrajaydıñ qaq törinen orın bergen wlı bişiler arasınan Nwrswlu Tapalovanıñ da beynesi jarq etti. Bizge keregi osı edi. Atalğan oqu ornınıñ qızmetkerleri järdemin ayamadı. Qwrttay ğana bilim ordasınıñ qazaqtıñ esimi eleusiz qalğan jwldızı Nwrswlu Tapalova turalı azdı-köpti derekterin sarı mayday saqtap qana qoymay, mwrajay törinen orın bergeni de kenezesi kepken köñil qwrğırdı bir köterip tastadı.
Bwdan şığıp Ortalıq Memlekettik kinofotoqwjattar jäne dıbıs jazbaları mwrağatına qaray bağıt tüzedik. Mwrağatta Nwrswlu Tapalovanıñ eluinşi jıldarı tüsirilgen bileri bar taspalar saqtalıptı. Qalıñ qauımnıñ ortasında kilem üstinde mıñ bwrala bilegen onıñ janarınıñ jarqılı men betindegi qos oyıq, köz ilestirmeytin jıldamdıqta qozğalatın buınsız bilek pen süyir sausaqtarğa qadalğan közdi taydırıp äketu mümkin emestey. Sirä, tartılıs küşi degenniñ qwdireti osı şığar… Swlu siqırdıñ işinde otırğanda kenet köz aldımızda kölbeñdegen basqa keyipker eles berdi…
«Bilesiz be, men ol kisini kezdeysoq köşeden keziktirdim. Kim biledi, mümkin, tanımas pa edim. Biraq, bilesiz ğoy, pendeşilik payımmen bireu elden erek qımbat ne öte jadau kiinse, soğan nazar audaratın ädet emes pe? Apaydıñ üstine ilgen kiiminiñ jwpınılığı sonşa, ayap qaradım. Özine qadalğan janardı sezdi me, ol bir sät mağan jalt etip qaradı. Jüregim dir etti. Nwrswlu Tapalova. Kädimgi atı jer jahanğa jayılğan Nwrswlu apay ğoy mınau… Özgergen. Tek bir kezdegi swlu jüzdiñ sarqıtınan sır şertken qara közdegi jarqıl ğana. Tamağıma tas twrğanday ünim şıqpay, qattım da qaldım. Ol ketip bara jattı. Egde tarqan sayın eñkeye tüsetin qarapayım qara kempirge keliñkiremeydi. Swñğaq ta känigi balerinalarğa tän qos tabanın kölbeu tastay takappar da asqaq jüris…». Bwl – Şara Jienqwlovanıñ şäkirti, bişi Ğaynikamal Nığmetjanqızınıñ esteligi.
«Joq! Bwl Nwrswlu Tapalova emes» deydi bizge janwşıra jan dausı şıqqan iştegi ün. Iä, el biletin Nwrswlu sahnada aq köbelekke wqsap wşıp jüretin… Onıñ betinde külgende payda bolatın ädemi qos şwñqır bar edi… Ömir-ay deseñizşi.

Bişini eşkim joqtamadı
Hoş delik, şeñberge sıymağan Şoqır atamız da ötti şolaq jalğannan. İzin basqan şäkirtteri Serik Qonaqbaev, Serik Äbdinäliev, Bolat Nwrseyitov, Bolat Mänkenov bastağan bir top boksşı jigitter arulap şığarıp saldı. Osı kezdi köz aldına äkelgen Serik Äbdenaliev ağamız: «Üydiñ jağdayı kisi qabıldaytınday emes edi. Dereu Serik (Qonaqbaev) kisi şaqırtıp üydi äktetti. Mal soyğızdı..», – dep eske aladı. Keñsaydan orın tappağan soñ örleu jerdi tegistetkisi kelgen boksşı jigitter bul'dozerge aqşa tappay şarq wradı. Abıroy bolğanda Keñsaydıñ sol kezdegi bastığı Şoqır atamızdıñ şäkirti bolıp şığıp, batır Baukeñniñ qasındağı kişkentay bos orınğa jerlegen eken. Söytip, bir kezderi «ov-qa» ojıraya qarap, wltınıñ «wlı» ekenin moyındatqan qos birdey wlı jürek bir jerde toğıstı.
Arağa tört jıl salıp Nwrswlu apamız ömirden ötti. Qızdarı Totı Serik Äbdinälievke habarlasıp, anasınıñ ömirden ozğanın aytadı. Tağı da Serik Qonaqbaev bastağan 3-4 boksşı jigitter bas qosıp, mal soyıp, aqırğı saparğa attandıradı. Ökiniştisi sol, janazağa boksşı jigitterden basqa tiri jan kelip köñil aytpağan. Tiri jan! Önerin ömirine balağan, 13 jasınan bastap külli ğwmırın arnağan opera jäne balet teatrınan da, bir kezderi qızmet etken «Qazaqkoncert», Jambıl atındağı filormoniyadan da jan balası bas swqpağan. Tipti, boksşı jigitter jaldap aparğan jalğız kölik örge qaray jüre almağan soñ, S.Äbdinäliev ağamız bastağan alpamsaday jigitter apamızdı beyit basına deyin arqalarına salıp aparıptı…
Osığan deyin bizdiñ janımızda Nwrswlu apamız turalı derek jinauğa qol wşın sozıp, qolınan kelgenin ayamay jürgen bir jan boldı. Ol – Järdem Aqbisenov degen ağamız. Oyıl öñiriniñ tuması degen atı bolmasa, Nwrswlu apamızğa eşqanday jaqındığı da joq. Osınau atpalday azamattıñ «qazaqtıñ Nwrswluday nar qızınıñ esimi eskerusiz, qabiri qarusız qaldı» dep qaqpağan esigi qalmağan körinedi. Alayda «oy, bauırımdap» atqa qonğan adam bolmaptı.

Qarausız qalğan qabir
Jwma küni Järdem ağanıñ köligimen Keñsay jaqtı betke aldıq. Qorım basına jetkenimizde kün töbeden auıp ketken edi. Kölikten tüsken biz jolbastauşımızdıñ soñınan erip kelemiz. Batır baba Bauırjannıñ basına täu etip, äri jıljıdıq. Kenet kilt toqtağan Järdem ağağa bir, tömpeşikten göri şöp şömelesiniñ ornına köbirek wqsas jerge bir qarağan biz añ-tañbız. Zirat deytindey ya qorşau, ya qwlpıtas joq. Swraulı jüzimizge qarağan ağamız: «Qazaq boksınıñ atası Şoqır atalarıñ men qazaq baletiniñ jwldızı Nwrswlu Tapalova apalarıñ osı jerde jatır», – dedi. Dausında diril bar. Aruaqtarğa bağıştalğan qwranğa tize bügip qol jayğan bizdiñ işki düniemiz alay-düley. Ay men künniñ amanında aruaq aldındağı parızın wmıtpağan atam qazaq tiriniñ bayığanın emes, öliniñ riza bolğanın qalamap pa edi… Köz aldımızda şöp basqan töbe. Qwddı osı şöp wlıların wlıqtay almay jürgen bizdiñ közimizge tüskendey jerge qaraymız. Qayran, jwmbağı köp qos jwdırıq pen sırğa tolı siqırlı sausaqtıñ ieleri! Bwl jalğandağı tarşılıqtan körgen qwqaylarıñ azday, mäñgilik mekenderiñde de tınıstarıñ tarılıp jatır-au!..
Biz ornımızdan twra berdik. Äldeqaydan qarqıldağan qarğanıñ dausı estiledi. Öleksege üymeley qalatın qarğa-qwzğındı «jaman nemeler jüz jasaydı» dep jaqtırmauşı edi bwrınğılar. Mağınasız wzaq jasağannıñ mäni qanşa degendi añğartqandarı şığar. Odan göri biigin bağındırğan soñ özin qiyadan tastap jiberetin qıran erligin maqtan twtadı. Osınau «Ot bol, ot bolmasañ, joq bol!» degen wlı ömir zañına ğana moyınswnğan tağdır ieleri Nwrswlu men Şoqır aldında kinäli jandarday ilbip basıp bara jattıq.

Tüyin
Büginde ya Nwrswlu apamızdıñ, ya Şoqır atamızdıñ atında ne bir köşe, ne bir mektep joq. Tipti, ömir boyı twrğan üylerine eskertkiş-taqta da ilinbegen. Mañğıstau oblısınıñ äkimi Qırımbek Köşerbaev pen Aqtöbe oblısınıñ äkimi Eleusin Sağındıqov ta kezinde talaylarmen qolğap tüyistirgen «ejelgi» boksşılar ekenin el biledi. Ol azday, elimizdegi Boks Federaciyasınıñ prezidenti Timur Qwlıbaev – Şoq atamızdıñ töl şäkirti belgili boksşı Asqar Qwlıbaevtıñ wlı. Endeşe, tizgin wstağan bılğarı qolğapşılar Şoqır atamızdıñ basın qaraytsa, qwrılğanına 75 jıl tolğan opera jäne balet teatrına Nwrswluday öz talantın tarih twñğiığınan arşıp alu ğana qaladı. Sonda ğana respublikalıq deñgeyde Nwrswlu Tapalova atındağı bişiler bayqauı men Şoqır Böltekwlı atındağı sport mektebi aşılsa ğoy degen el ümiti aqtalıp, aruaq aldındağı parızımız öteler edi-au!

 

Dinara İZTİLEU,
Anar DÜYSENBAY.

«Ana tili» gazeti, 16 säuir 2009 jıl.

0 pikir